33%ஆகக் குறைந்துள்ள பிறப்பு வீதம்!

குழந்தைப் பிறப்பு வீதம், 2024ஆம் ஆண்டில் அது 220,761ஆகக் குறைவடைந்துள்ளது என்றும் இது, 33 சதவீத வீழ்ச்சியாகக் கணிக்கப்பட்டுள்ளது என்றும் தெரிவிக்கப்படுகிறது.

கொவிட்-19 தொற்றுப் பரவலுக்கு முந்தைய காலத்துடன் ஒப்பிடும்போது, ​​புதிய பிறப்புகளில் சரிவு ஏற்பட்டுள்ளதாக மக்கள் தொகை கணக்கெடுப்பு மற்றும் புள்ளிவிவரத் திணைக்களம் தெரிவித்துள்ளது. இது பல தசாப்தங்களில் பதிவான மிகக் குறைந்த பிறப்பு விகிதமாகும். இந்த நிலைமை குறித்து, அதிகாரிகள் எச்சரிக்கையும் விடுத்துள்ளனர்.

2023ஆம் ஆண்டின் பிற்பகுதியில், நாட்டின் வருடாந்த பிறப்புகளில் கூர்மையான சரிவைக் காட்டும் நீண்டகால விளைவுகள் பற்றி? அப்போதைய கல்வி அமைச்சர் சுசில் பிரேமஜயந்தவினால் எச்சரிக்கை விடுக்கப்பட்டிருந்தது.

பிறப்பு வீதம் குறைவதற்கு பங்களிக்கும் காரணிகள் பற்றியும், வல்லுநர்கள் சுட்டிக்காட்டுகின்றனர். இலங்கையின் கருவுறுதல் விகிதம் பல வருடங்களாக கீழ்நோக்கிச் சென்றுகொண்டிருக்கிறது. இது, சிறிய குடும்பங்களுக்கான விருப்பத்தை பிரதிபலிக்கிறது என்றும் அவர்கள் எடுத்துரைத்துள்ளனர்.

நாட்டின் சமீபத்திய பொருளாதார நெருக்கடிகள், அந்த நீண்டகாலச் சரிவை அதிகப்படுத்தியுள்ளன. 2022ஆம் ஆண்டில் கொவிட்-19 தொற்றுப் பரவல் மற்றும் அதைத் தொடர்ந்து ஏற்பட்ட பொருளாதார சரிவு நாட்டின் மக்கள்தொகைக்கு இரட்டை அடியைக் கொடுத்தது. இதனால், பல தம்பதிகள் திருமணத்தையும் கர்ப்பமாவதையும் ஒத்திவைக்க வேண்டிய கட்டாயம் ஏற்பட்டுள்ளது என்றும் அவர்கள் சுட்டிக்காட்டியுள்ளனர்.