ஒரு வகுப்பில் மாணவர் எண்ணிக்கை பத்துக்கும் குறைவாக இருத்தல் அல்லது பாடசாலையின் மொத்த மாணவர் எண்ணிக்கை ஐம்பதுக்கும் குறைவாகக் காணப்படுதல் மற்றும் பாடசாலை அமைந்துள்ள இடத்திலிருந்து ஐந்து கிலோமீட்டர் தூரத்திற்குள், மூடப் பரிசீலிக்கப்படும் பாடசாலையின் வகைக்கு சமமான அல்லது அதைவிட உயர்ந்த தரத்திலான பாடசாலை அமைந்திருத்தல் ஆகியவையே அந்த நிபந்தனைகளாகும்.
எந்தவொரு மாணவரினதும் பாடசாலைக் கல்விக்குத் தடை ஏற்படாத வகையில், மூடப்படுவதற்குப் பிரேரிக்கப்பட்ட பாடசாலையில் கல்வி கற்கும் மாணவர்களை, அவர்கள் இலகுவாகச் சென்றடையக்கூடிய பொருத்தமான பாடசாலையில் இணைக்க வேண்டும் என, பாடசாலைக் கட்டமைப்பு நடவடிக்கைகள் குறித்து அமைச்சினால் வெளியிடப்பட்டுள்ள சுற்றறிக்கை மற்றும் அறிவுறுத்தல்கள் கோவையில் குறிப்பிடப்பட்டுள்ளது.
இந்த நிபந்தனைகளின்படி, ஒரு பாடசாலையைத் தற்காலிகமாக மூடுவதற்கு மாகாண மறுசீரமைப்புக் குழு அல்லது கல்வி அமைச்சின் மறுசீரமைப்புக் குழு பரிசீலிக்க முடியும் என்றும் அதில் கூறப்பட்டுள்ளது.
"அனைத்துப் பாடசாலைகளையும் சீரமைக்கும் நிகழ்ச்சித்திட்டத்தின்" கீழ் இந்த அறிவுறுத்தல்கள் வெளியிடப்பட்டுள்ளன. ஒவ்வொரு மாணவருக்கும் வசிக்கும் இடத்திற்கு அருகில் அனைத்து வசதிகளுடன் கூடிய தரமான கல்வியை வழங்கும் பாடசாலையை பெற்றுக்கொடுப்பதே பாடசாலைகளைச் சீரமைப்பதன் நோக்கமாகும். மாகாணக் கல்விப் பணிப்பாளர் ஒவ்வொரு மூன்று வருடங்களுக்கும் ஒருமுறை மாகாணத்தில் உள்ள பாடசாலைகளின் சீரமைப்பை மேற்கொள்ள வேண்டும் என்றும் அதில் குறிப்பிடப்பட்டுள்ளது.