உரிமைகள் உயர்ஸ்தானிகர் அலுவலகத்தின் (OHCHR) ஆணையை நீட்டிப்பதற்கான திருத்தப்பட்ட வரைவுத் தீர்மானத்திற்கு 22 நாடுகள் இணை அனுசரணை வழங்கியுள்ளன.
செப்டம்பர் மாத ஆரம்பத்தில் சமர்ப்பிக்கப்பட்ட இந்த வரைவுத் தீர்மானத்தின் பிரதான அனுசரணையாளர்களாக ஐக்கிய இராச்சியம், கனடா, மலாவி, மொண்டெனேகுரோ, மற்றும் வடக்கு மெசிடோனியா ஆகிய நாடுகள் விளங்கின.
ஆனால், அக்டோபர் 1ஆம் திகதி சமர்ப்பிக்கப்பட்ட திருத்தப்பட்ட வரைவுத் தீர்மானத்திற்கு, பிரதானமாக ஐரோப்பிய நாடுகள் உட்பட மேலும் 22 நாடுகள் இணை அனுசரணையாளர்களாக கைச்சாத்திட்டுள்ளன.
இலங்கை தொடர்பான இந்தத் தீர்மானத்திற்கு அனுசரணை வழங்கும் 27 நாடுகளில் பத்து நாடுகள், ஐக்கிய நாடுகள் மனித உரிமைகள் பேரவையின் (UNHRC) தற்போதைய சுழற்சிக்கான உறுப்பு நாடுகளாகும்.
இந்தத் தீர்மானம் அக்டோபர் 8 ஆம் திகதி பரிசீலனைக்கு எடுத்துக்கொள்ளப்படும்.
இந்த ஆணை நீட்டிப்பின் மூலம், இலங்கை அடுத்த இரண்டு ஆண்டுகளுக்கு OHCHRஇன் கண்காணிப்பின் கீழ் இருக்கும். எவ்வாறாயினும், நல்லிணக்கம், பொறுப்புக்கூறல் மற்றும் மனித உரிமைகள் தொடர்பான முன்னேற்றங்கள் குறித்த அடுத்த விரிவான அறிக்கை 2027 செப்டம்பர் மாதம் UNHRC யில் சமர்ப்பிக்கப்படவுள்ளதால், அரசாங்கத்திற்கு அதுவரை ஒரு இடைவெளி கிடைக்கும்.
OHCHR இன் இலங்கை பொறுப்புக்கூறல் திட்டத்தின் (OSLap) பதவிக்காலமும் இந்தத் தீர்மானத்தின் மூலம் நீட்டிக்கப்படும்.
இந்தத் திட்டம், இலங்கையில் இடம்பெற்ற மனித உரிமை மீறல்கள் அல்லது சர்வதேச மனிதாபிமான சட்டத்தின் பாரிய மீறல்கள் தொடர்பான எதிர்கால பொறுப்புக்கூறல் செயல்முறைகளுக்கான சாத்தியமான உத்திகளை உருவாக்குவதற்கும், உறுப்பு நாடுகளில் உள்ள தகுதியான அதிகார வரம்புகள் உட்பட தொடர்புடைய நீதித்துறை மற்றும் ஏனைய நடவடிக்கைகளுக்கு ஆதரவளிப்பதற்கும் ஒரு சாட்சிய சேகரிப்புப் பொறிமுறையாகும்.
அரசாங்கத்தின் ஊழல் எதிர்ப்பு முயற்சிகளையும், பல தசாப்தங்களாக நாட்டில் நிலவிய பிளவுபடுத்தும் இனவாத அரசியல் மற்றும் இன மோதல்களால் ஏற்பட்ட பாதிப்புகளையும் துன்பங்களையும் அரசாங்கம் ஏற்றுக்கொண்டதையும் புதிய தீர்மானம் அங்கீகரிக்கும் அதே வேளையில், புதிய சட்டம் இயற்றப்படும் வரை பயங்கரவாதத் தடைச் சட்டத்தைப் பயன்படுத்துவதற்குத் தடை விதித்து, அச்சட்டத்தை உடனடியாக நீக்க வேண்டியதன் அவசரத் தேவையையும், இணையப் பாதுகாப்புச் சட்டத்தில் திருத்தம் செய்ய வேண்டியதன் அவசியத்தையும் இது எடுத்துக்காட்டுகிறது.
இலங்கையில் பல வெகுஜன புதைகுழிகள் அடையாளம் காணப்பட்டிருப்பதைக் குறிப்பிடும் இந்தத் தீர்மானம், தற்போது நடைபெற்று வரும் பணிகளுக்குப் போதுமான வளங்கள் வழங்கப்பட வேண்டியதன் அவசியத்தை வலியுறுத்துகிறது. சர்வதேசத் தரங்களுக்கு ஏற்ப புதைகுழித் அகழ்வுகளை மேற்கொள்வதற்குத் தேவையான நிதி, மனித மற்றும் தொழில்நுட்ப வளங்களை உறுதி செய்ய, சர்வதேச ஆதரவை முன்கூட்டியே நாடுமாறு இலங்கை அரசாங்கத்தை இது கோருகிறது.
மேலும், நடைபெற்று வரும் பணிகளுக்குப் போதுமான வளங்கள் வழங்கப்பட வேண்டியதன் அவசியத்தையும், காணாமல் போனோர் அலுவலகம் சுதந்திரமாகவும் திறமையாகவும் செயல்படுவதன் முக்கியத்துவத்தையும் இது வலியுறுத்துகிறது. சர்வதேசத் தரங்களுக்கு ஏற்ப புதைகுழித் அகழ்வுகளை மேற்கொள்வதற்குப் போதுமான நிதி, மனித மற்றும் தொழில்நுட்ப வளங்களை உறுதி செய்வதற்காக சர்வதேச ஆதரவை முன்கூட்டியே நாடுமாறும், சில முக்கிய மனித உரிமை மீறல் வழக்குகள் மற்றும் ஈஸ்டர் ஞாயிறு குண்டுவெடிப்புகளை விசாரித்து வழக்குத் தொடரும் போது திறன்களை வலுப்படுத்த சர்வதேச உதவியை நாடவும் அரசாங்கத்தை இது வலியுறுத்துகிறது.
சுதந்திரமான ஒரு பொது வழக்குத் தொடுநர் அமைப்பை நிறுவுவதற்கான அரசாங்கத்தின் உறுதிப்பாட்டைப் பாராட்டுதலுடன் ஏற்றுக்கொள்வதோடு, இது முழுமையாகவும், சுதந்திரமாகவும், திறமையாகவும், வலுவாகவும் இருக்க வேண்டும் என்றும் அது கேட்டுக்கொள்கிறது. கடந்த தசாப்தங்களில் இடம்பெற்ற மனித உரிமை மீறல்கள் மற்றும் சர்வதேச மனிதாபிமான சட்ட மீறல்கள் தொடர்பான வழக்குகளை விசாரிப்பதற்காக ஒரு சுதந்திரமான சிறப்பு ஆலோசகருடன் கூடிய ஒரு நீதித்துறைப் பொறிமுறையை உருவாக்குவது குறித்துப் பரிசீலிக்குமாறு அரசாங்கத்தை இது ஊக்குவிக்கிறது.