சிறுவர் நிதியத்தின் (UNICEF) இலங்கைக்கான பிரதிநிதி எம்மா பிரிகாம் (Emma Brigham) தெரிவித்தார்.
பாதிக்கப்பட்ட இலங்கை மக்களின் மொத்த எண்ணிக்கை 14 இலட்சம் ஆகும்.
சூறாவளியால் குழந்தைகள் மீது ஏற்பட்ட தாக்கத்தை அறிய ஐக்கிய நாடுகளின் சிறுவர் நிதியம் மேற்கொண்ட ஆரம்ப மதிப்பீட்டில் இந்தத் தகவல்கள் வெளியாகியுள்ளதாக அவர் கூறினார்.
சாலைகள் மற்றும் தகவல் தொடர்பு இன்னமும் தடைபட்டுள்ளதால், இந்த எண்ணிக்கை மேலும் அதிகரிக்கக்கூடும் என்றும் அவர் சுட்டிக்காட்டினார்.
நாட்டின் வரலாற்றில் ஏற்பட்ட மிக மோசமான பொருளாதார நெருக்கடியால் அதிக ஆபத்துக்குள்ளான மக்கள், 'டித்வா' சூறாவளியால் மேலும் நெருக்கடிக்கு உள்ளாகிவிட்டதாக அவர் தெரிவித்தார்.
உலக வங்கியின் சமீபத்திய அறிக்கைப்படி, 2019 முதல் 2024 வரை நாட்டின் வறுமை நிலை 11.3%லிருந்து 24.5% ஆக இருமடங்காக அதிகரித்துள்ளது என்றும், இலங்கையில் மில்லியன் கணக்கான குடும்பங்கள் வாழ்வதற்கே சிரமப்படுவதாகவும் பிரிகாம் குறிப்பிட்டார்.
நாட்டின் பெரும்பாலான குடும்பங்கள் தங்கள் அடிப்படைத் தேவைகளைப் பூர்த்தி செய்யக்கூட சவால்களை எதிர்கொள்வதாகவும் அவர் தெரிவித்தார்.
குழந்தைகளுக்கும், அவர்களின் பாதுகாப்புக்கும், நல்வாழ்வுக்கும் தேவையான சேவைகள் 'டித்வா' சூறாவளியால் தடைபட்டுள்ளமை குறித்து ஐக்கிய நாடுகளின் சிறுவர் நிதியம் ஆழ்ந்த கவலையடைவதாக அவர் கூறினார்.
தங்கள் அன்புக்குரியவர்களை இழந்த குடும்பங்களுக்குத் தனது ஆழ்ந்த அனுதாபங்களைத் தெரிவிப்பதாகவும், பாதிக்கப்பட்ட குடும்பங்களுடன் UNICEF துணை நிற்பதாகவும் அவர் கூறினார்.
அதிக ஆபத்து நிறைந்த சூழ்நிலைகளில் உள்ள குழந்தைகளுக்கு மிக விரைவில் உதவி தேவை என்றும், உயிர்களைப் பணயம் வைத்து ஆபத்தில் இருக்கும் குடும்பங்களுக்கு உதவுவது என்பது காலத்துடன் போராடும் ஒரு பணி என்றும் பிரிகாம் தெரிவித்தார்.
'டித்வா' சூறாவளி இலங்கையை விட்டு வெளியேறியிருந்தாலும், அதன் தாக்கத்திலிருந்து இலங்கை இன்னமும் மீளவில்லை என்றும் அவர் கூறினார்.
சூறாவளியால் வீடுகளுக்கும் அத்தியாவசிய அடிப்படைக் கட்டமைப்புகளுக்கும் கடுமையான சேதம் ஏற்பட்டுள்ளதாகவும், அத்தியாவசிய சேவைகள் தடைபட்டுள்ளதாகவும் அவர் தெரிவித்தார்.
இதனால் பலரும் இடம்பெயர்ந்துள்ளதாகவும், குழந்தைகளிடையே தொற்று நோய்கள் பரவுதல், ஊட்டச்சத்து குறைபாடு, மற்றும் வாழ்விடச் சூழல் பாதுகாப்பின்மை ஆகியவை அதிகரிக்கும் அபாயம் எழுந்துள்ளதாகவும் அவர் குறிப்பிட்டார்.
இந்தக் காரணங்களால் குழந்தைகளிடையே கடுமையான மன அழுத்தம் ஏற்படக்கூடும் என்றும் அவர் சுட்டிக்காட்டினார்.
உயிர்களைக் காப்பாற்றுவதற்கான உதவிகளையும், பேரழிவின் நிலையை மதிப்பிடுவதற்கும் ஐக்கிய நாடுகளின் சிறுவர் நிதியம் அரசாங்கத்துடன் இணைந்து பணியாற்றுவதாகவும் அவர் தெரிவித்தார்.
'டித்வா' சூறாவளியால் இலங்கையில் 1,373,899 பேர் பாதிக்கப்பட்டுள்ளதாகவும், 15,688 வீடுகள் சேதமடைந்துள்ளதாகவும் ஐக்கிய நாடுகள் சபை தெரிவித்துள்ளது.
இவற்றுள் 432 வீடுகள் முழுமையாக அழிந்துவிட்டதாகவும் ஐக்கிய நாடுகள் சபை மேலும் தெரிவித்தது.