லுணுவில ஹெலி விபத்தில் உயிரிழந்த விமானிக்கு பதவி உயர்வு!

சியம்பலாபிட்டியவுக்கு, குரூப் கெப்டன் (Group Captain) தரநிலை பதவி உயர்வு வழங்கப்பட்டுள்ளது.

அவரது முன்மாதிரியான சேவை மற்றும் கடமைக்கான அர்ப்பணிப்பு மிக உயர்ந்த மரியாதையுடன் கருதப்படும் என்று இலங்கை விமானப்படை அறிவித்துள்ளது.

இதேவேளை, வென்னப்புவ - லுணுவில பகுதியில் அவசரமாக தரையிறக்கப்பட்ட ஹெலிகொப்டர் விபத்தில் உயிரிழந்த விமானி குறித்து விமானப்படை விசேட குறிப்பொன்றை வெளியிட்டுள்ளது.

மோசமான காலநிலை காரணமாக பாதிக்கப்பட்ட மக்களுக்கு அத்தியாவசிய உணவுப் பொருட்களை விநியோகிக்கும் நடவடிக்கையின் போது இந்த விபத்து இடம்பெற்றுள்ளது.

நேற்று முன்தினம் (30) மாலை, இலங்கை விமானப்படைக்கு சொந்தமான பெல் - 212 (Bell - 212) ரக ஹெலிகொப்டர் ஒன்று வென்னப்புவ, லுணுவில பாலத்திற்கு அருகில் இருந்த குழுவினருக்கு உணவுப் பொருட்கள் உள்ளிட்ட உபகரணங்களை வழங்கிக் கொண்டிருந்த போது, ​​அவசரமாக தரையிறக்கப்பட்டது.

இதன்போது ஹெலிகொப்டர், அருகில் இருந்த கால்வாயில் விழுந்து விபத்துக்குள்ளானது.

விபத்து இடம்பெற்றபோது, ​​விமானிகள் இருவர் உட்பட 5 விமானப்படை வீரர்கள் ஹெலிகொப்டரில் இருந்தனர். பிரதேசவாசிகளும் பொலிஸாரும் இணைந்து அவர்களை உடனடியாக மீட்டு மாரவில வைத்தியசாலையில் அனுமதித்தனர்.

எவ்வாறாயினும், இதில் பிரதான விமானி விங் கொமாண்டர் நிர்மாள் சியம்பலாபிட்டிய (Wing Commander Nirmal Siyambalapitiya) உயிரிழந்ததாக பொலிஸார் தெரிவித்தனர்.

இவ்வாறு உயிரிழந்தவர், 3,000 க்கும் மேற்பட்ட பறக்கும் மணிநேரங்களை நிறைவு செய்த 41 வயதுடைய அனுபவம் வாய்ந்த விமானி என்று இலங்கை விமானப்படை குறிப்பிட்டுள்ளது.

விபத்தில் காயமடைந்த ஏனைய நான்கு விமானப்படை அதிகாரிகள் மாரவில வைத்தியசாலையில் சிகிச்சை பெற்று வருகின்றனர்.

திடீரென உயிரிழந்த இந்த விமானி குறித்து சமூக ஊடகங்களில் பல உருக்கமான பதிவுகள் வெளியாகியுள்ளன.

அவற்றில் ஒரு பதிவு இதோ:

சின்னஞ்சிறு மகனின் அன்புக்குரிய தந்தையான நிர்மாள், DITWA சூறாவளியால் தனது வாழ்க்கையை அகாலமாக அர்ப்பணித்த, விலைமதிப்பற்ற ஒரு இலங்கை விமானியாக, நேற்றைய தினத்தில் இலங்கை மக்களின் இதயங்களில் அழியாத நினைவை வைத்துவிட்டு இணைந்துகொண்டார்...