இன்று (01) அதிகாலை 1.15 மணியளவில் இந்த துப்பாக்கிச் சூட்டுச் சம்பவம் இடம்பெற்றுள்ளதுடன், வேனில் பயணித்த மூவர், பொலிஸாரால் கைது செய்யப்பட்டுள்ளனர்.
கம்பஹா பொலிஸ் மோட்டார் சைக்கிள் பிரிவின் பொலிஸ் பரிசோதகர் உள்ளிட்ட அதிகாரிகள் குழுவினர், நிட்டம்புவ - கட்டுநாயக்க வீதியில் உதம்விட்ட சந்தியில், வீதித் தடையிட்டு சோதனை நடவடிக்கையில் ஈடுபட்டிருந்தனர்.
பின்னர், சந்தேகத்திற்கிடமான முறையில் வேயங்கொட பகுதியிலிருந்து நிட்டம்புவ திசை நோக்கி ஒரு வேன் பயணித்துள்ளது.
குறித்த வேனை நிறுத்துமாறு பொலிஸார் சைகை காட்டியபோதும், வேன் நிறுத்தாமல் சென்றதால், பொலிஸ் மோட்டார் சைக்கிள் பிரிவினர் வேனைப் பின்தொடர்ந்து சென்று, நிட்டம்புவ நகரில் சமிஞ்சை விளக்குகள் எரியும் போது, வேனின் முன் மற்றும் பின் வலது பக்க டயர்கள் மீது T-56 துப்பாக்கியால் துப்பாக்கிச் சூடு நடத்தியுள்ளனர்.
இதனையடுத்து வேனில் இருந்த மூவர் கைது செய்யப்பட்டுள்ளதுடன், அவர்கள் அதிக போதையில் இருந்ததாக தெரியவந்துள்ளது.
சாரதி லெல்லோபிட்டியவைச் சேர்ந்தவர் எனவும், ஏனையவர்கள் இரத்தினபுரியைச் சேர்ந்தவர்கள் எனவும் தெரியவந்துள்ளது.
சந்தேகநபர்கள், அத்தனகல்ல நீதவான் நீதிமன்றில் முன்னிலைப்படுத்தப்படவுள்ளனர்.