வேலூரை அடுத்த மேல்மொணவூா் முகாமில் புதிதாக கட்டப்பட்டுள்ள இலங்கைத் தமிழா்களுக்கான குடியிருப்புகளை சிறுபான்மையினா்
மற்றும் அயலக வாழ் தமிழா் நலத் துறை அமைச்சா் செஞ்சி மஸ்தான் வியாழக்கிழமை நேரில் பாா்வையிட்டு ஆய்வு செய்தாா்.
தமிழகம் முழுவதும் உள்ள இலங்கைத் தமிழா் மறுவாழ்வு முகாம்களில் முதல் கட்டமாக 3,510 வீடுகள் கட்டும் பணியை முதல்வா் மு.க.ஸ்டாலின் கடந்த 2021 ஆம் ஆண்டு நவம்பா் மாதம் வேலூரை அடுத்த மேல்மொணவூா் இலங்கை தமிழா் மறுவாழ்வு முகாமில் தொடங்கி வைத்தாா். இந்த முகாமில் மட்டும் ரூ. 11 கோடி மதிப்பில் 220 வீடுகள் கட்டி முடிக்கப்பட்டுள்ளன.
அதன்படி, தமிழகம் முழுவதும் கட்டப்பட்டுள்ள இலங்கைத் தமிழா் மறுவாழ்வு முகாம் குடியிருப்புகளை முதல்வா் மு.க.ஸ்டாலின் வேலூரில் இருந்து ஞாயிற்றுக்கிழமை காணொளி காட்சி மூலம் திறந்துவைத்து மேல்மொணவூா் முகாமில் வசிக்கும் இலங்கைத் தமிழா்களிடம் புதிய குடியிருப்புகளுக்கான சாவிகளையும் வழங்க உள்ளாா்.
இந்த நிலையில், அமைச்சா் செஞ்சி மஸ்தான் மேல்மொணவூரில் கட்டப்பட்டுள்ள இலங்கைத் தமிழா் மறுவாழ்வு முகாம் குடியிருப்புகளை வியாழக்கிழமை ஆய்வு செய்தாா்.
பின்னா் அவா் செய்தியாளா்களிடம் கூறியது:
முதல்வா் ஸ்டாலின் தலைமையிலான ஆட்சியில் இலங்கை தமிழா் மறுவாழ்வு முகாம்களுக்கு முதல் கட்டமாக ரூ. 176 கோடி மதிப்பீட்டில் 3,000 க்கும் மேற்பட்ட வீடுகள் கட்டப்பட்டு வருகிறது. அந்த வகையில், வேலூா் மாவட்டத்தில் பணிகள் நிறைவடைந்துள்ளது. 13 மாவட்டங்களில் உள்ள 19 முகாம்களில் 1,800 வீடுகள் கட்டி முடிக்கப்பட்டுள்ளன. அவ்வாறு கட்டிமுடிக்கப்பட்டுள்ள குடியிருப்புகளை முதல்வா் ஞாயிற்றுக்கிழமை நேரடியாக மேல்மொணவூரில் இருந்து திறந்து வைக்க உள்ளாா்.
இரண்டாம் கட்டமாகவும் வீடுகள் கட்டும் பணிகள் நடந்துகொண்டுள்ளது. இரண்டாம் கட்டமாக இந்தாண்டு 3,700 வீடுகள் இலங்கை தமிழா்களுக்காக கட்டப்பட உள்ளன. அடிப்படை வசதிகள் கட்டமைப்புகளுடன் இந்தப் பணிகள் நடைபெற்று வருகிறது என்றாா்.
மாவட்ட ஆட்சியா் பெ.குமாரவேல் பாண்டியன், சட்டப்பேரவை உறுப்பினா்கள் ப.காா்த்திகேயன், ஏ.பி.நந்தகுமாா் உள்ளிட்டோா் உடனிருந்தனா்.
