ஏற்படுத்திய 'டித்வா' சூறாவளி ஏற்பட்டு இன்றுடன் சரியாக ஒரு மாதம் நிறைவடைகின்றது. அனர்த்தம் ஏற்பட்டு ஒரு மாதத்திற்குப் பின்னரும், பத்து இலட்சத்திற்கும் அதிகமான மக்களுக்கு அவசர மனிதாபிமான உதவி தேவைப்படுவதாக ஐக்கிய நாடுகள் சபை தெரிவித்துள்ளது. இவர்களில் ஐந்து இலட்சத்திற்கும் அதிகமானோர் சிறுவர்களாவர்.
சில மாகாணங்களில் இன்னமும் வெள்ளப்பெருக்கு மற்றும் மண்சரிவுகள் ஏற்பட்டு வருவதுடன், அவ்வப்போது மழையும் தீவிரமடைந்து வருகின்றது. எதிர்வரும் திங்கட்கிழமை முதல் மீண்டும் மழைவீழ்ச்சி அதிகரிக்கக்கூடும் என வானிலை ஆய்வு மையம் எச்சரித்துள்ளது.
டித்வா அனர்த்தத்தினால் இடம்பெயர்ந்த சில குடும்பங்கள் மீண்டும் குடியேற ஆரம்பித்த போதிலும், குறிப்பாக கண்டி, நுவரெலியா மற்றும் பொலன்னறுவை மாவட்டங்களில் பெய்து வரும் மழையினால் மீண்டும் வெள்ளப்பெருக்கு மற்றும் மண்சரிவுகள் ஏற்பட்டுள்ளன. இதன் காரணமாக பிரதான வீதிகள் சிலவற்றை மூடவும் நேரிட்டுள்ளது.
ஐக்கிய நாடுகள் சபையின் மதிப்பீட்டின்படி, 1.8 மில்லியன் மக்கள் இன்னும் இந்த அனர்த்தத்தின் பாதிப்பிலிருந்து மீளவில்லை. அவர்களில் 1.2 மில்லியனுக்கும் அதிகமான மக்களுக்கு உடனடி மனிதாபிமான உதவிகள் தேவைப்படுவதுடன், அவர்களுள் 527,000 பேர் சிறுவர்களாவர்.
இலங்கையின் ஒன்பது மாகாணங்களும் கடுமையாகப் பாதிக்கப்பட்டுள்ளதாகவும், அத்தியாவசிய சேவைகள் சீர்குலைந்துள்ளதால் பெண்கள், சிறுவர்கள் மற்றும் மாற்றுத்திறனாளிகளின் பாதுகாப்பு ஆபத்தான நிலையை எட்டியுள்ளதாகவும் ஐநா சுட்டிக்காட்டுகிறது.
பசி மற்றும் உணவுப் பாதுகாப்பற்ற நிலை அதிகரித்துள்ளது. இதன் காரணமாகப் பல குடும்பங்கள் தமது உணவு வேளைகளைக் குறைத்துக் கொள்ளும் நிலைக்குத் தள்ளப்பட்டுள்ளன.
யுனிசெப் (UNICEF) நிறுவனத்தின்படி, 12 மாவட்டங்களில் சிறுவர் பாதுகாப்பு தொடர்பான சிக்கல்களும், 13 மாவட்டங்களில் கல்விக்கான தடைகளும் ஏற்பட்டுள்ளன. 19 மாவட்டங்களில் சிறுவர் போஷாக்கு தொடர்பான பாரிய பிரச்சினைகள் நிலவுவதுடன், 11 மாவட்டங்களில் சிறுவர்கள் நீர் மற்றும் சுகாதார வசதிகளைப் பெறுவதில் சிக்கல்களை எதிர்கொள்கின்றனர்.
குறிப்பாகத் தற்காலிகப் பராமரிப்பு நிலையங்களில் உள்ள சிறுவர்களின் பாதுகாப்பு குறித்த கவலைகளும், பாலின அடிப்படையிலான வன்முறைகள் (GBV) அதிகரிக்கும் அபாயமும் காணப்படுவதாக அந்த நிறுவனம் வலியுறுத்துகிறது.
சர்வதேச புலம்பெயர்வு அமைப்பு (IOM) குறிப்பிடுகையில், 272,000 இற்கும் அதிகமான மக்கள் இன்னும் இடம்பெயர்ந்த நிலையில் உள்ளனர். உலக வங்கியின் மதிப்பீட்டின்படி, டித்வா சூறாவளியால் ஏற்பட்ட பொருளாதார இழப்பு 4.1 பில்லியன் டொலர்களாகும். இது நாட்டின் மொத்த உள்நாட்டு உற்பத்தியில் (GDP) 4% ஆகும்.
டித்வா சூறாவளியால் தமது இருப்பிடங்களை இழந்த மலையகத் தமிழ் மக்கள், தற்போது மிக மோசமான நிலையில் உள்ளனர். மலையக சிவில் சமூக முன்னணியின் வீரே வீரசிங்கம் அவர்கள் குறிப்பிடுகையில், இம்மக்கள் எதிர்கொள்ளும் பிரதான பிரச்சினை மொழிப் பிரச்சினையாகும் எனச் சுட்டிக்காட்டினார்.
நிவாரணங்களைப் பெற்றுக்கொள்வதிலும் ஏனைய நிர்வாகச் செயற்பாடுகளிலும் மொழி ஒரு தடையாக உள்ளதுடன், மேலதிகமாகப் பல கலாசார மற்றும் நிர்வாக ரீதியான சிக்கல்களையும் அவர்கள் எதிர்கொள்ள வேண்டியுள்ளது.