ஜோதிடத்துக்குப் புலப்படாமல்போன 'டித்வா'!

‘டித்வா’ சூறாவளியினால் உருவான அந்த வேதனையான நினைவுகள் இன்னும் சமூகத்திலிருந்து முழுமையாக மறைந்துவிடவில்லை.

இது தொடர்பில் உருவான சமூக உரையாடலில், முறையான வானிலை எச்சரிக்கைகள் அரசாங்கத் தரப்பிலிருந்து வழங்கப்படவில்லை என்ற குற்றச்சாட்டு முதன்மையாகக் காணப்பட்டது. எனினும், சூறாவளி என்பது மிகக் குறுகிய மணித்தியாலங்கள் அல்லது சில நாட்களுக்குள் உருவாகும் ஒரு நிகழ்வு என்பதால், பல வாரங்களுக்கு முன்னதாகவே துல்லியமாகக் கணிப்பது கடினம் என்பது அறிஞர்களின் கருத்தாகும். ஆனாலும், இவ்வாறான அனர்த்த அபாயம் குறித்து இலங்கை மற்றும் இந்திய வானிலை அதிகாரிகள் முன்கூட்டியே எச்சரித்திருந்தமை பின்னர் தெரியவந்தது.

அதேவேளை, நமது நாட்டில் ஒரு பிரபலமான கலாச்சார அங்கமாகவும், பாரிய நிதிப் புழக்கத்தைக் கொண்ட ஒரு கட்டமைப்பாகவும் விளங்கும் சோதிடத்தினால் (Astrology) ஏன் இந்தச் சூறாவளியை முன்கூட்டியே கணிக்க முடியவில்லை? என்ற கேள்வி தற்போது சமூகத்தில் பேசுபொருளாகியுள்ளது. மானுடவியல் ரீதியாக இதனை ஆராயும்போது அறிவியல், கலாச்சாரம், தத்துவம் மற்றும் தர்க்கம் ஆகிய நான்கு பரிமாணங்களின் ஊடாகப் பார்க்க வேண்டும்.

நிரயன மற்றும் சாயன எனும் கோட்பாடுகளின் அடிப்படையில் இயங்கும் சோதிடர்கள், இன்றும் பல ஆயிரம் ஆண்டுகள் பழமையான புவி மையக் கோட்பாட்டையே (Geocentric theory) பின்பற்றுகின்றனர். ஆனால், சூரியன் பூமியைச் சுற்றி வருவதாகக் கூறும் இக்கோட்பாடு, பின்னர் வந்த வானியலால் (Astronomy) முழுமையாக நிராகரிக்கப்பட்டது. அத்துடன், யுரேனஸ், நெப்டியூன் மற்றும் புளூட்டோ போன்ற கிரகங்களைச் சோதிடம் கருத்தில் கொள்ளாததும் இதற்கொரு காரணமாகும்.

மானுடவியல் ரீதியாகப் பார்க்கும்போது, வெறும் அறிவியல் கண்டுபிடிப்புகளை மட்டும் கொண்டு நாம் இதனைத் தீர்மானிக்க முடியாது. ஏனெனில், சோதிடத்திற்குப் பின்னால் வலுவான கலாச்சார மற்றும் தத்துவப் பின்னணிகள் உள்ளன. எனினும், கடந்த காலத்துடன் ஒப்பிடுகையில் பூமியின் காலநிலை மற்றும் சூழல் பாரிய மாற்றங்களுக்கு உள்ளாகியுள்ளது. பழைய நூல்களில் கூறப்பட்டுள்ள கிரக நிலைகளை, இன்றைய புவி வெப்பமடைதல் போன்ற சூழலில் ஏற்படும் இயற்கை அனர்த்தங்களுடன் ஒப்பிடுவதில் சிக்கல்கள் உள்ளன.

சோதிடத்தில் கிரகங்களின் அமைவிடம் மற்றும் தரவுகளின் துல்லியம் குறித்து பல்வேறு வியாக்கியானங்கள் உள்ளன. ஒரே கிரக நிலையை வெவ்வேறு சோதிட முறைகள் வெவ்வேறு விதமாக விளக்குகின்றன. இதனை ஸ்ரீ ஜயவர்தனபுர பல்கலைக்கழகத்தின் முன்னாள் சிங்களப் பேராசிரியரும், கீழைத்தேய மொழிகளில் பாண்டித்தியம் பெற்றவருமான கௌரவ பேராசிரியர் விமல் பலகல்ல முன்வைத்த தர்க்கமாகும்.

சோதிடத்தின் எல்லைகளும் பௌதீக யதார்த்தமும்

"அதிக மழை பெய்யலாம்", "வெள்ளப்பெருக்கு ஏற்படலாம்" போன்ற பொதுவான கருத்துக்களையே பெரும்பாலான சோதிடர்கள் முன்வைக்கின்றனர். ஒரு சூறாவளியின் துல்லியமான நேரம், இடம் மற்றும் வேகம் ஆகியவற்றைக் கணக்கிடும் அளவிற்கான நுணுக்கமான தரவுக்கட்டமைப்பு சோதிடத்தில் நடைமுறையில் இல்லை என்பதே அறிஞர்களின் கருத்தாகும்.

இலங்கை கிரகஸ்புட பஞ்சாங்கத்தின் நிறுவுனர் எஸ்.டபிள்யூ. கஸ்தூரிரத்ன குறிப்பிடுகையில், சோதிடம் கிரகங்களின் சார்பு நிலைகளை அடிப்படையாகக் கொண்டது, ஆனால் வானிலை அறிவியல் செயற்கைக்கோள் தொழில்நுட்பம் மற்றும் வளிமண்டல அழுத்தம் போன்ற பௌதீகத் தரவுகளை அடிப்படையாகக் கொண்டது.

இயற்கை அனர்த்தம் என்பது பௌதீகச் சூழலில் ஏற்படும் உடனடி மாற்றமே தவிர, கிரகங்களின் பாதையினால் தீர்மானிக்கப்படுவதல்ல என்பது அறிவியல் ரீதியான கருத்தாகும். 2004 சுனாமி பேரழிவிற்கு சில நாட்களுக்கு முன்னர், சில ஊடகங்கள் "இயற்கை அனர்த்தங்கள் இனி முடிவுக்கு வந்துவிட்டன" என வெளியிட்ட தவறான கணிப்புகள் இதற்குச் சிறந்த உதாரணமாகும்.

முழு பூமிக்கும் பொதுவான கிரகத் தாக்கங்களைக் கொண்டு, ஒரு குறிப்பிட்ட புவியியல் பிரதேசத்திற்கு (உதாரணமாக: மேல் மாகாணம் அல்லது சபரகமுவா) மட்டும் ஏற்படும் பாதிப்புகளைத் தனிமைப்படுத்தி அடையாளம் காண்பது சோதிடத்திற்கு கடினமான ஒன்றாகும்.

பேராதனைப் பல்கலைக்கழக தத்துவத்துறையின் முன்னாள் பேராசிரியர் குணபால தர்மசிறி சுட்டிக்காட்டுகையில், ஒரே நேரத்தில் பிறக்கும் இரு பிள்ளைகளின் சோதிடக் கட்டம் ஒன்றாக இருந்தாலும், அவர்களின் வாழ்க்கைப்பாதை மற்றும் மரணம் முற்றிலும் வேறாக அமையலாம். இதனைச் சோதிடத்தால் விளக்க முடியாது.

சோதிடம் என்பது நிகழ்தகவு விதியின் (Theory of Probability) அடிப்படையில் அமைந்த ஒரு பாடமே தவிர, அது ஒரு துல்லியமான அறிவியல் (Exact Science) அல்ல. மனித முயற்சி மற்றும் புத்தியின் மூலம் விதியை மாற்ற முடியும் என்பதை முதிர்ச்சியடைந்த சோதிடர்களும் ஏற்றுக்கொள்கின்றனர்.

நடுத்தர வர்க்கத்தின் நிச்சயமற்ற தன்மையும் சோதிடமும்

தற்போதைய சமூகத்தில் சோதிடம் வேகமாகப் பரவுவதற்கு முக்கிய காரணம் நடுத்தர வர்க்கத்தினரிடையே நிலவும் எதிர்காலம் குறித்த நிச்சயமற்ற தன்மையாகும். பொருட்கள் மற்றும் சேவைகளின் விலைகள் உயர்ந்தாலும் வருமானம் அதிகரிக்காததால், அவர்களின் 'உண்மை வருமானம்' (Real Income) வீழ்ச்சியடைந்துள்ளது. அத்துடன் பணவீக்கம் காரணமாகச் சேமிப்புகளின் மதிப்பும் குறைந்துவிட்டது.

செயற்கை நுண்ணறிவு (AI) போன்ற புதிய தொழில்நுட்பங்களால் வேலை இழப்பு ஏற்படும் என்ற அச்சம் மற்றும் பிள்ளைகளின் கல்விக்காகச் செலவிடப்படும் அதிகப்படியான தொகை என்பன நடுத்தர வர்க்கக் குடும்பங்களின் நிதி ஸ்திரத்தன்மைக்கு அச்சுறுத்தலாக அமைந்துள்ளன. மதங்களால் வெறுக்கப்பட்ட 'ஆடம்பரம்' (Vanity) இன்று சமூகத்தின் முக்கிய நோக்கமாக மாறியுள்ளது. அடைய முடியாத கனவுகளைத் துரத்துவதால் பலர் மன அழுத்தத்திற்கு ஆளாகியுள்ளனர்.

அரசின் சுகாதாரம் மற்றும் கல்விச் சேவைகளின் தரம் வீழ்ச்சியடைந்துள்ளதால், தனியார் துறையின் சேவைகளைப் பெற வேண்டிய கட்டாயம் ஏற்பட்டுள்ளது. இது அவர்களின் 'செலவிடத்தக்க வருமானத்தை' (Disposable Income) மேலும் குறைக்கிறது. எதிர்காலத்தில் தாம் ஒரு "புதிய ஏழை வர்க்கமாக" மாறிவிடுவோமோ என்ற அச்சம் சமூகத்தில் பரவியுள்ளது.

இந்த பொருளாதார நெருக்கடியில் இருந்து தப்பிக்கப் பலரது தீர்வாக வெளிநாடு செல்வது அமைந்துள்ளது. எதிர்காலம் குறித்த இந்த நிச்சயமற்ற தன்மைக்கு யதார்த்தமான தீர்வுகள் இல்லாத நிலையில், மக்கள் மறைபொருள் (Mystic) தீர்வுகளைத் தேட முனைகின்றனர். சோதிடம் இன்று நடுத்தர வர்க்கத்தின் ஒரு "சமூக நாகரீகமாக" (Social Fashion) மாறியிருப்பதற்கு அறிவியல் அல்லது தர்க்கரீதியான காரணங்களை விட, இந்த மன ரீதியான கையறு நிலையே முக்கிய காரணமாகும்.

கலாநிதி பிரனீத் அபயசுந்தர