முன்னாள் அமைச்சர் ஜொன்ஸ்டன் பெர்னாண்டோ உள்ளிட்ட நால்வருக்கு உடனடியாக நடைமுறைக்கு வரும் வகையில் வெளிநாடு செல்ல வத்தளை நீதவான் நீதிமன்றம் தடை விதித்துள்ளது.
முன்னாள் அமைச்சர் ஜொன்ஸ்டன் பெர்னாண்டோ, அவரது புதல்வர் ஜொஹான் பெர்னாண்டோ, சத்தோச நிறுவனத்தின் முன்னாள் போக்குவரத்து முகாமையாளர் இந்திக ரத்னமால மற்றும் சத்தோச லொறி சாரதி சமன் ஆகியோருக்கே இவ்வாறு வெளிநாட்டு பயணத்தடை விதிக்கப்பட்டுள்ளது.
குற்றப்புலனாய்வுத் திணைக்களம் மற்றும் பொலிஸ் நிதிக்குற்றப் புலனாய்வுப் பிரிவினரால் மேற்கொள்ளப்பட்ட விசாரணையில், சத்தோச நிறுவனத்திற்குச் சொந்தமான வாகனங்களைப் பயன்படுத்தி இரண்டு இலட்சத்து நாற்பத்து நான்கு ஆயிரம் (ரூபா 244,000) நிதி மோசடி செய்யப்பட்டுள்ளமை தெரியவந்துள்ளது.
இந்தச் சம்பவம் தொடர்பில் தற்போது கைது செய்யப்பட்டு நீதிமன்றத்தில் முன்னிலைப்படுத்தப்பட்ட சந்தேக நபர்கள் இருவரை எதிர்வரும் ஜனவரி மாதம் 09ஆம் திகதி வரை விளக்கமறியலில் வைக்கவும் வத்தளை நீதவான் உத்தரவிட்டுள்ளார்.
எவ்வாறாயினும், இந்த வழக்கின் பிரதான சந்தேக நபராக அடையாளம் காணப்பட்டுள்ள முன்னாள் அமைச்சர் ஜொன்ஸ்டன் பெர்னாண்டோ தற்போது பிரதேசத்திலிருந்து தப்பிச் சென்று பொலிஸாரைத் தவிர்த்து வருவதாகத் தெரிவிக்கப்படுகிறது.
சந்தேக நபரான முன்னாள் அமைச்சரைக் கைது செய்வதற்காகப் பல பொலிஸ் குழுக்கள் ஏற்கனவே விசேட நடவடிக்கைகளை ஆரம்பித்துள்ளன.
இதேவேளை, சதொசவிற்குச் சொந்தமான லொறி ஒன்றை முறைக்கேடாகப் பயன்படுத்திய குற்றச்சாட்டு தொடர்பில், சதொசவின் முன்னாள் போக்குவரத்து முகாமையாளர் இந்திக்க ரத்னமலல நிதிக்குற்ற விசாரணைப் பிரிவினரால் கைது செய்யப்பட்டுள்ளதாகப் பொலிஸார் தெரிவித்தனர்.
முன்னாள் அமைச்சர் ஜொன்ஸ்டன் பெர்ணான்டோவின் புதல்வரான ஜொஹான் பெர்ணான்டோ, சதொசவிற்குச் சொந்தமான லொறி ஒன்றை முறைக்கேடாகப் பயன்படுத்தியதாகக் கூறப்படும் சம்பவம் தொடர்பிலேயே இந்தக் கைது நடவடிக்கை மேற்கொள்ளப்பட்டுள்ளது.