இலங்கைத் தொலைத்தொடர்பு ஒழுங்குமுறை ஆணைக்குழுவினால் முடக்கப்பட்டுள்ளதாகத் தெரிவிக்கப்படுகிறது.
மொழி கற்றலுக்காகப் பயன்படுத்தப்படும் அச்சிடப்பட்ட பாடசாலைப் பொருட்களில் இது சேர்க்கப்பட்டமை குறித்து சமூகத்தில் எழுந்த கடும் விமர்சனங்களைத் தொடர்ந்து, தொலைத்தொடர்பு ஒழுங்குமுறை ஆணைக்குழு (TRCSL) நாட்டின் இணைய சேவை வழங்கினூடாக அந்த இணையத்தளத்தைப் பயன்படுத்துவதைக் கட்டுப்படுத்தியுள்ளது.
தற்போதைய அரசாங்கத்தின் புதிய கல்விச் சீர்திருத்தத்தின் கீழ் 6 ஆம் தரத்திற்காகத் தயாரிக்கப்பட்ட கையேட்டில், ஓரினச்சேர்க்கை கூட்டாளிகளைத் தேடும் இணையத்தளத்தின் பெயர் குறிப்பிடப்பட்டுள்ளமை பாடசாலை மாணவர்களுக்குப் பாரிய ஆபத்தை ஏற்படுத்துவதாக முன்னாள் அமைச்சர் விமல் வீரவங்ச குற்றம் சாட்டியுள்ளார். இந்தச் சம்பவத்திற்காகப் பிரதமர் மற்றும் கல்வி அமைச்சர் ஹரிணி அமரசூரிய பதவி விலக வேண்டும் என்றும் அவர் வலியுறுத்தியுள்ளார்.
இது நாட்டையும் எதிர்காலத் தலைமுறையையும் அழிப்பதற்காகச் செய்யப்பட்ட சதி என உலப்பனே சுமங்கல தேரர் குற்றம் சாட்டியுள்ளதுடன், சதியாளர்களைக் கைது செய்ய வேண்டும் என்றும் வலியுறுத்தினார்.
எவ்வாறாயினும், இந்தச் சம்பவம் குறித்துப் பதிலளித்துள்ள கல்வி அமைச்சு, இது தொடர்பான முறைப்பாட்டின் அடிப்படையில் விசாரணை நடத்தப்பட்டதாகவும், அது உறுதிப்படுத்தப்பட்ட பின்னர் உடனடியாகத் திருத்த நடவடிக்கைகள் எடுக்கப்பட்டதாகவும் தெரிவித்துள்ளது.
இது தொடர்பாகக் குற்றப்புலனாய்வுத் திணைக்களம் முன்னெடுக்கும் விசாரணைகளின் முடிவுகளின் அடிப்படையில் மேலதிக நடவடிக்கைகள் எடுக்கப்படும் என்றும், எதிர்காலப் பாடத்திட்டச் சீர்திருத்தங்களின் போது இவ்வாறான குறைபாடுகள் ஏற்படுவதைத் தவிர்க்க நடவடிக்கை எடுக்கப்படும் என்றும் அமைச்சின் அதிகாரிகள் தெரிவித்துள்ளனர்.
புதிய கல்விச் சீர்திருத்தத்தின் கீழ் வெளியிடப்பட்டுள்ள 6 ஆம் தர ஆங்கில மொழி முதலாம் தவணைக் கையேட்டில், ஓரினச்சேர்க்கை கூட்டாளிகளைத் தேடும் இணையத்தளத்தின் பெயர் குறிப்பிடப்பட்டுள்ளமை தொடர்பில் கல்வி, உயர்கல்வி மற்றும் தொழிற்கல்வி அமைச்சின் செயலாளர் நாலக கலுவெவ டிசம்பர் 31 ஆம் திகதி குற்றப்புலனாய்வுத் திணைக்களத்தில் (CID) முறைப்பாடொன்றைச் செய்துள்ளார்.
கல்விச் சீர்திருத்தச் செயல்முறை குறித்துப் பல்வேறு தரப்பினரால் முன்வைக்கப்படும் குற்றச்சாட்டுகளின் ஒரு பகுதியாக, சதித்திட்டத்தின் அடிப்படையில் இந்த இணையத்தளம் கையேட்டில் சேர்க்கப்பட்டதா என்பது குறித்து விசாரணை நடத்துமாறு தனது முறைப்பாட்டில் தெரிவித்துள்ளதாகச் செயலாளர் ஊடகங்களிடம் கூறினார்.
"கல்விச் சீர்திருத்தச் செயல்முறை குறித்துக் கடந்த காலங்களில் பல்வேறு தரப்பினரால் அடிப்படை ஆதாரமற்ற குற்றச்சாட்டுகள் முன்வைக்கப்பட்டன. எனவே, ஏற்பட்டுள்ள இந்தச் சூழலானது, ஏதேனும் ஒரு தரப்பினரால் சதித்திட்டத்தின் அடிப்படையில் செய்யப்பட்டதா என்ற நியாயமான சந்தேகம் எங்களுக்கு உள்ளது."
இது குறித்துக் கல்வி அமைச்சு உள்வாரியான விசாரணைகளையும் முன்னெடுத்து வருவதாக நாலக கலுவெவ மேலும் தெரிவித்தார்.