பாராளுமன்ற உறுப்பினர் நாமல் ராஜபக்ஸவிற்கு எதிராகத் தொடரப்பட்டுள்ள வழக்கில் சாட்சியமளிப்பதற்காக வெளிநாடுகளில் வசிக்கும் இரண்டு சாட்சிகளுக்கு அழைப்பாணைகள் முறைப்படி வழங்கப்பட்டுள்ளதா என்பது குறித்து அறிக்கை சமர்ப்பிக்குமாறு குற்றப் புலனாய்வுப் பிரிவினருக்கு (CID) கொழும்பு மேல் நீதிமன்றம் இன்று (16) உத்தரவிட்டுள்ளது.
இலங்கையில் ரக்பி விளையாட்டை மேம்படுத்துவதற்காக இந்திய நிறுவனமான 'கிரிஷ்' (Krrish) நிறுவனத்திடமிருந்து பெறப்பட்ட 70 மில்லியன் ரூபா நிதியைக் கையாடல் செய்ததாகக் கூறப்படும் குற்றச்சாட்டின் பேரிலேயே நாமல் ராஜபக்ஸவிற்கு எதிராக இவழக்குத் தொடரப்பட்டுள்ளது.
முதலாம் மற்றும் இரண்டாம் தரப்புச் சாட்சிகளுக்கு அழைப்பாணைகள் கிடைக்கப்பெற்றுள்ளதா என்பது குறித்து இந்திய உயர்ஸ்தானிகராலயத்திடம் விசாரித்து அறிக்கை சமர்ப்பிக்குமாறு நீதிமன்றம் குற்றப் புலனாய்வுப் பிரிவினருக்குப் பணித்துள்ளது.
பிரதி சொலிசிட்டர் ஜெனரல் வசந்த பெரேரா விடுத்த கோரிக்கையை ஆராய்ந்த பின்னரே கொழும்பு மேல் நீதிமன்ற நீதிபதி நாதியா அபர்ண சுவண்டுருபொட இந்த உத்தரவைப் பிறப்பித்தார்.
குறித்த இரண்டு சாட்சிகளும் தற்போது வெளிநாடுகளில் வசித்து வருவதுடன், வெளிவிவகார அமைச்சு ஊடாகவே அழைப்பாணைகள் அனுப்பப்பட்டுள்ளதாகப் பிரதி சொலிசிட்டர் ஜெனரல் நீதிமன்றத்திற்குத் தெரிவித்தார்.
எவ்வாறாயினும், அந்த ஆவணங்கள் அவர்களுக்கு முறைப்படி கிடைக்கப்பெற்றுள்ளதா என்பது குறித்த உறுதிப்படுத்தல் இதுவரை கிடைக்கப்பெறவில்லை எனவும் அவர் குறிப்பிட்டார்.
இதற்கமைய, வழக்கு விசாரணையை எதிர்வரும் ஜனவரி 18 ஆம் திகதிக்கு ஒத்திவைத்த நீதிமன்றம், அன்றைய தினமும் நாமல் ராஜபக்ஸ விளக்கமறியலில் வைக்கப்பட்டிருக்கும் பட்சத்தில் அவரை நீதிமன்றத்தில் முன்னப்படுத்துமாறு சிறைச்சாலைகள் அத்தியட்சகருக்கு உத்தரவிட்டுள்ளது.
சிறைச்சாலை அதிகாரிகளால் நாமல் ராஜபக்ஸ இன்று நீதிமன்றத்தில் பலத்த பாதுகாப்பிற்கு மத்தியில் முன்னிலைப்படுத்தப்பட்டிருந்தமை குறிப்பிடத்தக்கது.


