பலத்த காற்று மற்றும் கடல் கொந்தளிப்பு குறித்து வளிமண்டலவியல் திணைக்களத்தினால் அதிஉயர் எச்சரிக்கை கொண்ட 'சிவப்பு அறிவித்தல்' (Red Alert) விடுக்கப்பட்டுள்ளது.
இலங்கைக்கு வடகிழக்காக, தென்கிழக்கு வங்காள விரிகுடா கடற்பரப்பில் நிலைகொண்டிருந்த தாழமுக்கமானது ஆழ்ந்த தாழமுக்கமாக (Deep Depression) வலுப்பெற்றுள்ளதைத் தொடர்ந்து இவ் எச்சரிக்கை விடுக்கப்பட்டுள்ளது.
காலநிலைத் தொகுதியின் நகர்வும் சூறாவளி எச்சரிக்கையும்
-
இன்றைய நிலை (16): இத்தொகுதியானது இலங்கையிலிருந்து மேலும் விலகிச் சென்று, இன்று (16) மாலை வேளையில் தென்மேற்கு மற்றும் அதனையொட்டிய மத்திய மேற்கு வங்காள விரிகுடா கடற்பரப்பில் சூறாவளியாக (Cyclonic Storm) வலுப்பெற அதிக வாய்ப்புள்ளதாக வளிமண்டலவியல் திணைக்களம் தெரிவித்துள்ளது.
-
நாளைய எதிர்வுகூறல் (17): நவம்பர் 17 ஆம் திகதியளவில் இது மத்திய மேற்கு வங்காள விரிகுடா கடற்பரப்பில் தீவிர சூறாவளியாக (Severe Cyclonic Storm) வலுப்பெறக்கூடும் எனவும் திணைக்களம் எதிர்வுகூறியுள்ளது.
கடற்றொழிலாளர் மற்றும் கடற்படையினருக்கான விசேட அறிவுறுத்தல்கள்
-
தடைசெய்யப்பட்ட கடற்பரப்புகள்: வட அகலாங்கு 05° தொடக்கம் 15° வரையிலும், கிழக்கு நெட்டாங்கு 80° தொடக்கம் 90° வரையிலுமான கடற்பரப்புகள் மற்றும் காங்கேசன்துறை தொடக்கம் திருகோணமலை, பொத்துவில் ஊடாக ஹம்பாந்தோட்டை வரையிலான கரையோரத்திற்கு அப்பாற்பட்ட கடற்பரப்புகளில் மறு அறிவித்தல் வரை கடற்றொழில் மற்றும் கடற்பயண நடவடிக்கைகளில் ஈடுபடுவதைத் தவிர்க்குமாறு அறிவுறுத்தப்பட்டுள்ளது.
-
பாதுகாப்பான இடங்களுக்குத் திரும்புக: குறித்த கடற்பரப்புகளில் தற்போது கடற்றொழில் மற்றும் கடற்பயண நடவடிக்கைகளில் ஈடுபட்டுள்ளவர்கள் உடனடியாகப் பாதுகாப்பான இடங்களுக்குச் செல்லுமாறு வளிமண்டலவியல் திணைக்களம் கேட்டுக்கொண்டுள்ளது.
இது தொடர்பில் திணைக்களத்தினால் வெளியிடப்படும் எதிர்கால வானிலை எதிர்வுகூறல்கள் மற்றும் அறிவித்தல்கள் குறித்து மிகுந்த அவதானத்துடன் இருக்குமாறு கடற்றொழிலாளர் மற்றும் கடற்படைச் சமூகத்தினருக்கு மேலும் அறிவுறுத்தப்பட்டுள்ளது.


