நிதியமைச்சராக ஜனாதிபதி அநுர குமார திசாநாயக்க நேற்று பிற்பகல் நாடாளுமன்றத்தில் சமர்ப்பித்த தேசிய மக்கள் சக்தி அரசாங்கத்தின் மூன்றாவது தேசிய வரவு செலவுத் திட்டத்தின் (81 ஆவது வரவு செலவுத் திட்ட உரை) மூலம், பொருளாதாரத்தை ஸ்திரப்படுத்துவதிலிருந்து விரிவாக்கம் (Expansion) நோக்கித் திருப்பப்பட்டுள்ளது.
இம்மாதம் அனைத்துலக நாணய நிதியத்தின் (IMF) 7 ஆவது மீளாய்வுக்கான பணியாளர் மட்ட இணக்கப்பாடு எட்டப்பட்டுள்ளதாக உறுதிப்படுத்திய ஜனாதிபதி, 2027 மார்ச் மாதத்தில் தற்போதைய வசதி முடிவடைந்த பின்னர் அடுத்தகட்டத் திட்டத்திற்குச் செல்வதா என்பதை மதிப்பிடுவதற்குப் பிரதி நிதியமைச்சர் தலைமையில் விசேட அமைச்சரவைக் குழுவொன்று நியமிக்கப்பட்டுள்ளதாகவும் தெரிவித்தார்.
2027 பிரதான நிதி இலக்குகள் (இணைப்பு III):
-
மொத்த வருமானமும் நன்கொடைகளும்: ரூபா 6,180 பில்லியனாகும் (GDP இல் 15.8%). இதில் ரூபா 6,150 பில்லியன் அரச வருமானமாகவும், ரூபா 30 பில்லியன் நன்கொடைகளாகவும் அமையும். பொருட்கள் மற்றும் சேவைகள் வரி (VAT உட்பட) ரூபா 3,592 பில்லியன் (58.1%), வருமான வரி ரூபா 1,341 பில்லியன் (21.7%), வெளிநாட்டு வர்த்தக வரி ரூபா 754 பில்லியன் (12.2%) மற்றும் வரியற்ற வருமானம் ரூபா 463 பில்லியன் (7.5%) என மதிப்பிடப்பட்டுள்ளது.
-
ஆரம்பச் செலவீனமும் குறைநிரப்பு மதிப்பீடும்: ஆரம்பச் செலவீனம் ரூபா 7,673 பில்லியனாகும் (GDP இல் 19.7%). வட்டிச் செலுத்துகைகளுக்கு ரூபா 2,643 பில்லியன் (வருமானத்தில் 43%), அரச முதலீடுகளுக்கு ரூபா 1,750 பில்லியன், மானியங்களுக்கு ரூபா 1,472 பில்லியன் மற்றும் சம்பளத்திற்காக ரூபா 1,410 பில்லியன் ஒதுக்கப்பட்டுள்ளது. 'திட்வா' (Ditwah) சூறாவளிக்குப் பின்னரான புனரமைப்புப் பணிகளுக்கான ரூபா 260 பில்லியன் குறைநிரப்பு மதிப்பீட்டுடன் சேர்த்து மொத்தச் செலவீனம் ரூபா 7,933 பில்லியனாக உயர்கிறது (மொத்த அரச முதலீடுகள் ரூபா 2,010 பில்லியனாகும்).
-
வரவு செலவுத் திட்டப் பற்றாக்குறையும் உபரியும்: ஆரம்ப வரவு செலவுத் திட்டப் பற்றாக்குறை ரூபா 1,493 பில்லியனாகவும் (GDP இல் 3.8%), குறைநிரப்பு மதிப்பீட்டுடன் சேர்த்து அது ரூபா 1,753 பில்லியனாகவும் (4.5%) காணப்படுகின்றது. முதற்கட்ட உபரி (Primary Surplus) IMF எல்லையான 2.3% ஐத் தாண்டி ரூபா 1,150 பில்லியனாக (2.9%) பதிவாகியுள்ளது.
-
நடுத்தரக் கால இலக்குகள்: 7%+ நிலைபேறான பொருளாதார வளர்ச்சியை எட்டுதல், வருமானத்தை GDP இல் 20% வரை உயர்த்துதல் மற்றும் 2027 பெப்ரவரி மாதத்தில் உச்சக்கட்டத்தை அடையும் என எதிர்பார்க்கப்படும் எல்-நினோ (El Niño) காலநிலை மாற்றத்தை எதிர்கொள்வதற்காக ரூபா 5 பில்லியன் அவசர நிதியத்தை ஒதுக்குதல் ஆகியன இதில் அடங்கும்.
உழைக்கும் போதான வரி விலக்கு எல்லை ரூபா 162,500 ஆக அதிகரிப்பு; அத்தியாவசிய உணவு வரிகள் குறைப்பு
தனிநபர் வருமான வரி (PAYE) திருத்தம் (அரசுக்கு ஏற்படும் வருமான இழப்பு ரூபா 16.0 பில்லியன்):
-
வரி விலக்கு எல்லை: வருடாந்த வரி விலக்கு எல்லை ரூபா 1.8 மில்லியனிலிருந்து 1.95 மில்லியனாக உயர்த்தப்பட்டுள்ளதால், மாதாந்தம் ரூபா 162,500 வரை உழைக்கும் சம்பளதாரர்கள் முழுமையாக வரியிலிருந்து விடுவிக்கப்படுகின்றனர்.
-
புதிய 12% வரி அடுக்கு: 6% இலிருந்து 18% ஆக இருந்த சடுதியான அதிகரிப்புக்குப் பதிலாக 6%, 12%, 18%, 24%, 30% மற்றும் 36% என 6 அடுக்குகளைக் கொண்ட வரி கட்டமைப்பு அறிமுகப்படுத்தப்பட்டுள்ளது. வரி அறவிடப்படக்கூடிய முதலாவது ரூபா 850,000 இற்கு 6% உம், அதனைத் தொடர்ந்து ரூபா 600,000 வீதமான நான்கு பகுதிகளுக்கு 12%, 18%, 24% மற்றும் 30% என்ற விகிதத்திலும் வரி அறவிடப்படும். அதிகபட்ச 36% வரி விகிதம் மாதாந்த வருமானம் ரூபா 433,000 ஐத் தாண்டுபவர்களுக்கு மாத்திரமே பொருந்தும். இதன் ஊடாக மாதாந்தம் ரூபா 750 முதல் 15,750 வரையான வரிச் சேமிப்பு கிடைக்கப்பெறும்.
வர்த்தகத் தீர்வை, வட் (VAT) மற்றும் விசேட வர்த்தகப் பொருள் வரித் திருத்தங்கள் (சுத்தச் செலவு ரூபா 28.44 பில்லியன்):
-
செஸ் (CESS) மற்றும் பால் (PAL) வரிகள்: சுமார் 800 இறக்குமதிப் பொருட்களின் CESS வரி 25% ஆல் குறைக்கப்படுவதுடன், இறக்குமதி செய்யப்படும் சூரிய மின்கலங்கள் (Solar Batteries) மற்றும் செய்தித்தாள் அச்சுக் காகிதங்கள் மீது விதிக்கப்பட்டிருந்த PAL வரி முற்றாக நீக்கப்படுகின்றது.
-
வட் (VAT) வரி விலக்கு: 2027 ஏப்ரல் முதல் பாடசாலை அப்பியாசக் கொப்பிகள், பாடநூல்கள் மற்றும் அச்சிடப்பட்ட கல்விப் பொருட்களுக்கான வட் வரி நீக்கப்படுகின்றது.
-
சுற்றுலா மேம்பாட்டு வரி இரத்து: 2027 ஏப்ரல் 1 முதல் சுற்றுலா மேம்பாட்டு வரி (TDL) முற்றாக இரத்துச் செய்யப்படுகின்றது.
-
இன்று (நவம்பர் 13) முதல் அமுலாகும் விசேட வர்த்தகப் பொருள் வரிகள் (SCL): இறக்குமதி செய்யப்படும் நெத்தலிக் கருவாடு ஒரு கிலோகிராமிற்கான வரி ரூபா 100 இலிருந்து 10 ஆகவும், மாசிக் கருவாடு ஒரு கிலோகிராமிற்கான வரி ரூபா 302 இலிருந்து 10 ஆகவும் குறைக்கப்பட்டுள்ளது. காய்ந்த மிளகாய் (தூள் மற்றும் நெற்று) ஒரு கிலோகிராமிற்கான வரி ரூபா 50 ஆல் குறைக்கப்பட்டுள்ள அதேவேளை, இறக்குமதி செய்யப்படும் சீனி ஒரு கிலோகிராமிற்கான வரி ரூபா 10 ஆல் அதிகரிக்கப்பட்டுள்ளது.
அரச ஊழியர் சம்பள உயர்வுக்கு 110 பில்லியன்; 110,000 பேருக்குப் புதிய வேலைவாய்ப்புகளும் கொடுப்பனவுகளும்
அரச ஊழியர் சம்பள உயர்வின் இறுதிக் கட்டத்திற்காக ரூபா 110 பில்லியன் ஒதுக்கப்பட்டுள்ளதுடன், அரச சேவையிலுள்ள வெற்றிடங்களை நிரப்புவதற்காக 110,000 புதிய ஊழியர்களை ஆட்சேர்ப்பு செய்யவும் வரவு செலவுத் திட்டத்தில் திட்டமிடப்பட்டுள்ளது.
இலக்கு வைக்கப்பட்ட கொடுப்பனவு அதிகரிப்புகள் (2027 ஏப்ரல்/ஜூலை மற்றும் 2028 கட்டங்களாக):
-
வைத்தியர்கள்: DAT கொடுப்பனவு ரூபா 70,000 இலிருந்து 95,000 ஆக உயர்த்தப்படுகின்றது.
-
பல்கலைக்கழக விரிவுரையாளர்கள்: மாதாந்தக் கொடுப்பனவு ரூபா 25,000 ஆல் அதிகரிக்கப்படுகின்றது.
-
நிறைவேற்று அதிகாரிகள்: போக்குவரத்துக் கொடுப்பனவு ரூபா 50,000 இலிருந்து 100,000 ஆக இரட்டிப்பாக்கப்படுகின்றது.
-
தாதியர் மற்றும் துணை மருத்துவ சேவைகள்: விசேட கடமைக் கொடுப்பனவு ரூபா 6,000 இலிருந்து 12,000 ஆக இரட்டிப்பாக்கப்படுகின்றது.
-
சிறைச்சாலை அதிகாரிகள்: இடர் கொடுப்பனவு ரூபா 8,000 இலிருந்து 16,000 ஆக இரட்டிப்பாக்கப்படுகின்றது.
-
பொலிஸ் மற்றும் முப்படையினர்: பொலிஸ் உத்தியோகத்தர்களுக்கு மாதாந்தம் ரூபா 10,000 மேலதிக உணவு மற்றும் தங்குமிடக் கொடுப்பனவு வழங்கப்படுவதுடன், முப்படை உறுப்பினர்களின் நாளாந்த உணவுக் கொடுப்பனவும் அதிகரிக்கப்படுகின்றது.
-
கிராம உத்தியோகத்தர்கள் மற்றும் ஓய்வூதியதாரர்கள்: கிராம உத்தியோகத்தர்களின் பயணக் கொடுப்பனவு ரூபா 1,600 இலிருந்து 4,000 ஆக உயர்த்தப்படுவதுடன், 2020–2024 ஓய்வூதியதாரர்களுக்கு மாதாந்தம் ரூபா 2,500 மேலதிக இடைக்காலக் கொடுப்பனவு வழங்கப்படும்.
மாணவர்களுக்கு ரூபா 10,000 பங்குத் தொகுப்பு; இரட்டைப் பிரஜாவுரிமை இலவசம்
-
தனியார் மூலதன முதலீடுகள்:
மன்னார் படுகையில் நான்கு எண்ணெய் மற்றும் எரிவாயு ஆய்வு வலயங்களைத் திறத்தல், சப்புகஸ்கந்த சுத்திகரிப்பு நிலையத்தை விரிவுபடுத்துதல் மற்றும் துறைமுக முனையங்களுக்கான அரச-தனியார் பங்குடைமை (PPP) வாய்ப்புகளைத் திறத்தல் ஆகியவற்றுடன், ஸ்ரீலங்கன் விமான சேவையை மறுசீரமைக்க விசேட நிபுணர் குழுவொன்றை நியமிக்கவும் முன்மொழியப்பட்டுள்ளது. -
மாணவர்களுக்குப் பங்குச் சந்தை பிரவேசம்:
18 வயதுக்கு மேற்பட்ட சனத்தொகையில் 0.7% ஆனோர் மாத்திரமே பங்குச் சந்தையில் கொடுக்கல் வாங்கல்களில் ஈடுபடுவதால், பல்கலைக்கழக மற்றும் மூன்றாம் நிலைக் கல்வி மாணவர்களுக்கு ரூபா 10,000 வரையிலான பங்குத் தொகுப்பை (Share Portfolio) வழங்க முன்மொழியப்பட்டுள்ளது. -
உட்கட்டமைப்பு, வீட்டுவசதி மற்றும் இரட்டைப் பிரஜாவுரிமை: நெடுஞ்சாலைகள் மற்றும் புகையிரத பாதைகளுக்காக ரூபா 487 பில்லியனும், குடிநீர் மற்றும் சுகாதார வசதிகளுக்காக ரூபா 77 பில்லியனும் ஒதுக்கப்பட்டுள்ளது. குறைந்த வருமானம் பெறும் குடும்பங்களுக்காக 70,000 வீடுகளை நிர்மாணிக்கவும், இலங்கையர்களின் வாழ்க்கைத் துணைவர்கள், பிள்ளைகள் மற்றும் பேரப்பிள்ளைகளுக்கு இலவசமாக இரட்டைப் பிரஜாவுரிமை வழங்கவும் யோசனை முன்வைக்கப்பட்டுள்ளது. இதற்கு மேலதிகமாக, ஒலிம்பிக் தங்கப் பதக்கமொன்றுக்காக ரூபா 100 மில்லியன் பணப் பரிசு வழங்கப்படும்.
26 நாட்கள் கொண்ட வரவு செலவுத் திட்ட விவாதம் இன்று (நவம்பர் 13) ஆரம்பமாகவுள்ளதுடன், இரண்டாம் வாசிப்பு மீதான வாக்கெடுப்பு நவம்பர் 20 ஆம் திகதி மாலை 6.00 மணிக்கும், இறுதி மூன்றாம் வாசிப்பு மீதான வாக்கெடுப்பு டிசம்பர் 14 ஆம் திகதியும் நடைபெறவுள்ளது.