எரிபொருள் விலை குறைய வாய்ப்பில்லை!

காலங்களில் உள்நாட்டில் எரிபொருள் விலை திருத்தத்தின் போது விலைக்குறைப்பு ஒன்றை எதிர்பார்க்க முடியாது என இலங்கை பெற்றோலியக் கூட்டுத்தாபகனத்தின் (CPC) முகாமைத்துவப் பணிப்பாளர் மயூர நெத்திகுமார தெரிவித்துள்ளார்.

கடந்த மார்ச் மற்றும் ஏப்ரல் மாதங்களுடன் ஒப்பிடுகையில் தற்பொழுது உலக சந்தையில் எரிபொருள் விலையில் ஓரளவு வீழ்ச்சி தென்பட்ட போதிலும், மத்திய கிழக்கு யுத்தம் ஆரம்பமாவதற்கு முன்னர் காணப்பட்ட விலையை விட தற்போதைய உலக சந்தை விலை இன்னும் அதிகமாகவே உள்ளதாக அவர் சுட்டிக்காட்டியுள்ளார்.

விலை திருத்தம் குறித்து இன்று மாலை இறுதித் தீர்மானம்!

இன்றைய தினத்திற்கான (29) உலக சந்தையின் எரிபொருள் விலை நிலவரங்கள் இன்று மாலை வெளியாகும் எனத் தெரிவித்த முகாமைத்துவப் பணிப்பாளர், அதன் பின்னரே உள்நாட்டு எரிபொருள் விலை திருத்தம் குறித்த இறுதி முடிவுகள் எட்டப்படும் எனக் குறிப்பிட்டுள்ளார்.

இது குறித்து அவர் மேலும் விவரித்ததாவது:

தற்போதைய சூழலில் இந்த மாதத்திலோ அல்லது அடுத்த மாதத்திலோ, ஏன் பெரும்பாலும் செப்டம்பர் மாதம் வரையில் எரிபொருள் விலையில் எவ்வித குறைப்பையும் எதிர்பார்க்க முடியாது என்பதைத் திட்டவட்டமாகக் கூற முடியும்.

விலைகள் அதிகரிக்கப்படுமா என்பது குறித்து தற்போதைய நிலையில் கூற முடியாது. அது குறித்து தற்பொழுது ஆய்வுகள் முன்னெடுக்கப்பட்டு வருகின்றன. எரிபொருளின் விலையை தற்போதைய மட்டத்திலேயே பேணுவதா அல்லது சிறிய அளவிலான விலை அதிகரிப்பை மேற்கொள்வதா என்பது குறித்து அடுத்தடுத்து நடத்தப்படும் கலந்துரையாடல்களின் போதே தீர்மானிக்கப்படும்.

உலக சந்தை நிலவரங்களை ஆராய்ந்து இறுதி முடிவு எடுக்கப்படும். எனினும், விலைகளில் பாரியளவிலான அதிகரிப்பு எதுவும் ஏற்படாது என்பதால் பொதுமக்கள் இது குறித்து அநாவசிய அச்சம் கொள்ளத் தேவையில்லை.

வழமையாக மாதத்தின் 31ஆம் திகதியே விலை திருத்தங்கள் அறிவிக்கப்படும் போதிலும், இம்முறை மே 31 ஞாயிற்றுக்கிழமை என்பதால் இன்றைய தின நிலவரங்களின் அடிப்படையில் கலந்துரையாடல்கள் ஆரம்பிக்கப்படவுள்ளன.

இலங்கையை வந்தடைந்த மசகு எண்ணெய் கப்பல்கள்!

இதேவேளை, இலங்கைக்குத் தேவையான மசகு எண்ணெயைச் சுமந்த கப்பல்களின் வருகை குறித்தும்  மயூர நெத்திகுமார இங்கு தகவல்களைப் பகிர்ந்துள்ளார்:

• WTI மசகு எண்ணெய்: நேற்றைய தினம் (28) 89,000 மெட்ரிக் தொன் WTI ரக மசகு எண்ணெயைத் (WTI Crude Oil) தாங்கிய கப்பலொன்று நாட்டை வந்தடைந்துள்ளது.

• மர்பன் மசகு எண்ணெய்: அதேபோன்று, எதிர்வரும் 31ஆம் திகதியாகும்போது மேலும் 95,000 மெட்ரிக் தொன் மர்பன் ரக மசகு எண்ணெயைக் (Murban Crude Oil) கொண்ட மற்றுமொரு கப்பல் நாட்டை வந்தடையவுள்ளதாகவும் அவர் மேலும் தெரிவித்துள்ளார்.