இரு பெண்களுக்குத் துப்பாக்கி முனையில் அச்சுறுத்தல் விடுத்த குற்றச்சாட்டில் விளக்கமறியலில் வைக்கப்பட்டிருந்த நாடாளுமன்ற உறுப்பினர் அர்ச்சுனா ராமநாதன், இன்று (29) மல்லாகம் நீதவான் நீதிமன்றத்தினால் பிணையில் விடுவிக்கப்பட்டார்.
கடந்த ஏப்ரல் 25ஆம் திகதி, நீதிமன்றத்தினால் தனக்குச் சொந்தமானது எனத் தீர்ப்பளிக்கப்பட்ட காணியொன்றைச் சுத்தம் செய்ய முற்பட்ட போதே இந்த மோதல் ஏற்பட்டுள்ளது.
குறித்த காணியின் ஒரு பகுதி தமக்குச் சொந்தமானது என இரு பெண்கள் உரிமை கோரியதை அடுத்து ஏற்பட்ட வாய்த்தர்க்கம், துப்பாக்கி முனையிலான அச்சுறுத்தலாக மாறியதாகக் கூறப்படுகிறது.
இந்தச் சம்பவம் தொடர்பாக இளவாலை பொலிஸாரினால் கைது செய்யப்பட்ட நாடாளுமன்ற உறுப்பினர் அர்ச்சுனா, ஏப்ரல் 29ஆம் திகதி வரை விளக்கமறியலில் வைக்கப்பட்டிருந்தார்.
அத்துடன், இந்தச் சம்பவத்துடன் தொடர்புடைய பெண் ஒருவரும் மறுநாள் கைது செய்யப்பட்டார். இன்று அவர் நீதிமன்றத்தில் ஆஜர்படுத்தப்பட்டதையடுத்து, நீதவான் அவரைப் பிணையில் விடுவிக்க உத்தரவிட்டார்.