'இலங்கையில் நிபா வைரஸ் பரவும் அபாயம் மிகக் குறைவு!'

அமைச்சின் செயலாளர் விசேட வைத்திய நிபுணர் அனில் ஜாசிங்க தெரிவித்துள்ளார்.

நிபா வைரஸ் தொடர்பான உண்மைகளை விளக்கி அவர் விடுத்துள்ள ஊடக அறிக்கையிலேயே இவ்விடயம் குறிப்பிடப்பட்டுள்ளது. அண்மைக் காலத்தில் இந்தியாவின் மேற்கு வங்க மாநிலத்தில் சில நிபா வைரஸ் தொற்றாளர்கள் அடையாளம் காணப்பட்டுள்ளதாக அந்த அறிக்கையில் கூறப்பட்டுள்ளது.

எவ்வாறாயினும், இந்த நிலைமையைக் கருத்திற் கொண்டு சர்வதேச பயணக் கட்டுப்பாடுகளை விதிக்குமாறு உலக சுகாதார நிறுவனம் (WHO) பரிந்துரைக்கவில்லை என்றும் அமைச்சின் செயலாளர் சுட்டிக்காட்டியுள்ளார்.

நிபா வைரஸ் குறித்த முக்கிய தகவல்கள் அந்த அறிக்கையில் பின்வருமாறு விளக்கப்பட்டுள்ளன:

பரவல்: இது பிரதானமாக விலங்குகளிடையே, குறிப்பாக வௌவால்களிடையே காணப்படும் ஒரு தொற்று நோயாகும். பாதிக்கப்பட்ட விலங்குகள் அல்லது அவற்றின் கழிவுகளுடன் நெருங்கிய தொடர்பு ஏற்படும் போது மிக அரிதாகவே மனிதர்களுக்குப் பரவுகிறது.

மனிதர்களுக்கு இடையே பரவுதல்: மனிதர்களுக்கிடையிலான தொற்று பரவலானது மிக நெருக்கமான மற்றும் நீண்ட காலத் தொடர்புகள் மூலமாகவே நிகழ்கிறது. இது இன்புளுவென்சா (Influenza) போன்று காற்றின் மூலம் எளிதில் பரவக்கூடிய வைரஸ் அல்ல.

தயார்நிலை: நோயாளிகளை விரைவாகக் கண்டறிவதற்கான வலுவான கண்காணிப்பு அமைப்பு இலங்கையில் செயற்படுத்தப்பட்டுள்ளது. ஏதேனும் பாதிப்புகள் கண்டறியப்பட்டால், உடனடியாகச் செயற்படுவதற்குச் சுகாதார அமைச்சு முழுமையாகத் தயாராக உள்ளது.

பரிசோதனை வசதிகள்: இதற்கான நோய் நிர்ணயப் பரிசோதனைகளை மேற்கொள்வதற்குத் தேவையான ஆய்வக வசதிகள் மருத்துவ ஆராய்ச்சி நிறுவனத்தில் (MRI) தயார் நிலையில் உள்ளன.

சுகாதார அமைச்சு, உலக சுகாதார நிறுவனம் உள்ளிட்ட சர்வதேச அமைப்புகளுடன் இணைந்து பிராந்திய ரீதியிலான நோய் நிலவரங்களைக் கண்காணித்து வருவதாகவும், இது தொடர்பான சரியான தகவல்களுக்கு உத்தியோகபூர்வ அறிவிப்புகள் மற்றும் நம்பகமான ஆதாரங்களை மட்டுமே பயன்படுத்துமாறும் பொதுமக்களுக்கு அறிவுறுத்தப்பட்டுள்ளது.