நிபா வைரஸ் குறித்து தேவையற்ற அச்சம் வேண்டாம்!

அமைச்சர் வைத்தியர் ஹன்சக விஜேமுனி தெரிவித்துள்ளார்.

இந்த வைரஸ் குறித்து நாட்டின் சுகாதாரத் துறையினர் தீவிர அவதானம் செலுத்தி வருவதாகவும் அவர் சுட்டிக்காட்டியுள்ளார்.

நிபா என அழைக்கப்படும் இந்த வைரஸ் ஆசிய பிராந்தியம் முழுவதும் பரவக்கூடும் என கண்டறியப்பட்டதை அடுத்து, ஆசிய பிராந்தியத்தின் பல நாடுகள் இது குறித்து அதிக கவனம் செலுத்தி வருகின்றன. தாய்லாந்து, சிங்கப்பூர், ஹொங்கொங் மற்றும் மலேசியா ஆகிய நாடுகளின் அதிகாரிகள் இது தொடர்பாக விமான நிலைய சோதனைகளையும் ஆரம்பித்துள்ளதாகத் தெரிவிக்கப்படுகிறது.

இது வௌவால்கள் மற்றும் பன்றிகள் போன்ற விலங்குகளிடமிருந்து பரவக்கூடிய ஒரு வைரஸாக அடையாளம் காணப்பட்டுள்ளதுடன், இதன் இறப்பு விகிதம் 40% முதல் 75% வரை இருப்பதாகக் குறிப்பிடப்பட்டுள்ளது. நிபா வைரஸ் ஒருவரிடமிருந்து மற்றொருவருக்கு பரவக்கூடும் என்றாலும், அதன் பரவல் மிகக் குறைந்த அளவிலேயே காணப்படுவதாகத் தெரிவிக்கப்படுகிறது.

ஆசிய பிராந்திய நாடுகள் போன்று இலங்கையும் இந்த வைரஸ் தொடர்பில் அவதானம் செலுத்தியுள்ள நிலையில், இது குறித்து எவ்வித அச்சமும் கொள்ளத் தேவையில்லை என சுகாதார பிரதி அமைச்சர் வைத்தியர் ஹன்சக விஜேமுனி குறிப்பிட்டுள்ளார்.

அவர் மேலும் கூறுகையில்:

"இலங்கைக்கு தற்போது இதனால் எந்தவித அச்சுறுத்தலும் இல்லை. வரலாற்றில் இது ஒருபோதும் பெருந்தொற்றாகப் பரவவில்லை. எனவே நாம் தேவையற்ற முறையில் அச்சப்படத் தேவையில்லை. அதேபோல், இந்த வைரஸ் இருக்கலாம் என சந்தேகிக்கப்படும் நபர்களைப் பரிசோதிப்பதற்கான 'பரிசோதனைக் கருவிகள்' (Testing Kits) இலங்கையிடம் உள்ளன. இவ்வாறான வைரஸ் பரவும்போது, அது இலங்கைக்கு பாதிப்பை ஏற்படுத்துமா என்பது குறித்து நாம் மிக நெருக்கமாக ஆய்வு செய்கிறோம். இதுவரை ஒரு நோயாளியும் பதிவாகவில்லை. நோய்வாய்ப்பட்ட ஒரு நபர் விமானம் மூலம் பயணம் செய்யும் அளவுக்கு ஆரோக்கியமாக இருக்க மாட்டார். எனவே, நோய்வாய்ப்பட்டவர்கள் இலங்கைக்கு வருவதற்கான வாய்ப்புகள் மிகக் குறைவு. அதனால் பயப்பட வேண்டாம்."