கத்தோலிக்க அருட்தந்தை ஒருவர் மீதான தாக்குதல் சம்பவம் தொடர்பாகக் கைது செய்யப்பட்ட கம்பஹா பிராந்திய குற்றப் புலனாய்வுப் பிரிவின் மோட்டார் சைக்கிள் அதிரடிப்படையைச் சேர்ந்த ஆறு பொலிஸ் உத்தியோகத்தர்களில் மூவர் அடையாளம் காணப்பட்டுள்ளனர்.
இன்று (29) கம்பஹா நீதிமன்றத்தில் சந்தேகநபர்கள் அடையாள அணிவகுப்பிற்கு உட்படுத்தப்பட்ட போதே அவர்கள் அடையாளம் காணப்பட்டனர்.
கத்தோலிக்க அருட்தந்தை ஒருவரைத் தாக்கிய சம்பவம் தொடர்பாகக் கைது செய்யப்பட்டு விளக்கமறியலில் வைக்கப்பட்டிருந்த கம்பஹா பிராந்திய குற்றப் புலனாய்வுப் பிரிவின் மோட்டார் சைக்கிள் அதிரடிப்படையைச் சேர்ந்த 6 பொலிஸ் உத்தியோகத்தர்கள், அடையாள அணிவகுப்பிற்காக இன்று (29) நீதிமன்றத்திற்கு அழைத்து வரப்பட்டனர்.
குறித்த வழக்கு இன்றைய தினம் மீண்டும் விசாரணைக்கு எடுத்துக்கொள்ளப்படவுள்ள நிலையில், சிறைச்சாலை அதிகாரிகளினால் சந்தேகநபர்கள் 6 பேரும் கம்பஹா நீதவான் நீதிமன்றத்திற்கு இவ்வாறு அழைத்து வரப்பட்டுள்ளனர்.
இந்தத் தாக்குதல் சம்பவத்திற்கு முகங்கொடுத்த கத்தோலிக்க பாதிரியார் உள்ளிட்ட குழுவினரும் தற்போது நீதிமன்ற வளாகத்திற்கு வருகை தந்துள்ளனர்.