ரூபாய் நட்டத்தை எதிர்நோக்குவதாகத் தெரிவித்துள்ள மின்சார நுகர்வோர் சங்கம் (ECA), இது தொடர்பாக இந்தியா மற்றும் நுரைச்சோலை லக்விஜய மின்நிலையத்திலிருந்து பெறப்பட்ட ஆய்வு அறிக்கைகளை பகிரங்கப்படுத்துமாறு அரசாங்கத்தை வலியுறுத்தியுள்ளது.
மின்சார நுகர்வோர் சங்கத்தின் பொதுச் செயலாளர் சஞ்சீவ தம்மிக்க ஊடகங்களுக்குக் கருத்துத் தெரிவிக்கையில், எரிசக்தி அமைச்சர் குமார ஜயகொடி நிலக்கரி டெண்டர்கள் (ஒப்பந்தப்புள்ளிகள்) மீதான விசாரணைகளை நிறுத்தவும், நுரைச்சோலை மின்நிலையத்தின் உள்வாரி அறிக்கையை வெளியிடுவதைத் தடுக்கவும் தலையிட்டதாகக் குற்றம் சாட்டினார். அத்துடன் மேலதிக விசாரணைகளை நிறுத்துமாறு இந்தியாவிலுள்ள பரிசோதனை ஆய்வகங்களுக்கு அவர் அறிவுறுத்தியுள்ளதாகவும் அவர் குறிப்பிட்டார்.
"இந்தக் கண்டுபிடிப்புகளை மூடிமறைக்க முயற்சிகள் மேற்கொள்ளப்பட்ட போதிலும், நிலக்கரி டெண்டர் தொடர்பான அறிக்கை தற்போது கிடைத்துள்ளது" என்று தம்மிக்க கூறினார். இறக்குமதி செய்யப்பட்ட நிலக்கரியின் கலோரி பெறுமதி (Calorific value), தேவையான தரமான 19,100 கிலோகலோரிகளை (kcal) விட குறைவாக இருப்பதாக ஆய்வகப் பரிசோதனைகள் வெளிப்படுத்தியுள்ளதாக சங்கம் சுட்டிக்காட்டியுள்ளது.
மூன்று கப்பல்களில் நிலக்கரி இறக்குமதி செய்யப்பட்டதாக அவர் தெரிவித்தார். முதல் கப்பல் ஜனவரி 2 முதல் 9 வரையான காலப்பகுதியில் பெறப்பட்டது, இரண்டாவது கப்பல் பயன்படுத்தப்படவில்லை. எவ்வாறாயினும், மூன்றாவது கப்பலில் வந்த நிலக்கரி மின்சார உற்பத்திக்குப் பயன்படுத்தப்பட்டதால் பெரும் நட்டம் ஏற்பட்டுள்ளது.
"மூன்றாவது கப்பலில் இருந்து பெறப்பட்ட நிலக்கரியைப் பயன்படுத்தியதால், லக்விஜய மின்நிலையத்தின் ஒரு மின்பிறப்பாக்கியில் (Generator) 15 மெகாவாட் மின் இழப்பு பதிவாகியுள்ளது. மூன்று மின்பிறப்பாக்கிகளிலும் மொத்தம் 45 மெகாவாட் இழப்பு ஏற்பட்டுள்ளது. ஒட்டுமொத்தமாக சுமார் 100 மெகாவாட் மின்சாரம் உற்பத்தி செய்யப்படவில்லை, இதனால் நாளொன்றுக்கு சுமார் 75 மில்லியன் ரூபாய் நிதி இழப்பு ஏற்பட்டுள்ளது" என தம்மிக்க தெரிவித்தார்.
மின்சார உற்பத்தித் திறன் 16 சதவீதத்திற்கும் அதிகமாக வீழ்ச்சியடைந்தால் அத்தகைய உற்பத்தியை நிராகரிக்க வேண்டும் என பரிந்துரைகள் உள்ளன. இருப்பினும், இறக்குமதி செய்யப்பட்ட நிலக்கரியின் மின் உற்பத்தித் திறன் 11 முதல் 21 சதவீதத்திற்குள் இருப்பதாக விசாரணைகளில் தெரியவந்துள்ளது.
அமைச்சர் நலிந்த ஜயதிஸ்ஸவின் விளக்கம்
இதற்கிடையில், லக்விஜய மின்நிலையத்திற்காக கொண்டு வரப்பட்ட நிலக்கரி தேவையான தரத்தில் இல்லை என்பதை அமைச்சர் நலிந்த ஜயதிஸ்ஸ ஒப்புக்கொண்டுள்ளார். பரிசோதனைக்காக இந்தியாவுக்கு அனுப்பப்பட்ட மாதிரிகளில் தேவையான கிலோகலோரிகள் குறைவாக இருப்பது கண்டறியப்பட்டதாகவும் அவர் கூறினார்.
களுத்துறையில் ஊடகங்களுக்குக் கருத்துத் தெரிவித்த அவர், சம்பந்தப்பட்ட நிறுவனத்திடமிருந்து அபராதம் வசூலிக்க நடவடிக்கை எடுக்கப்படும் எனத் தெரிவித்தார்.
"கொள்முதல் செயல்பாட்டில் எந்தப் பிரச்சினையும் இல்லை. முதல் 60,000 மெட்ரிக் தொன் நிலக்கரி இறக்குமதி செய்யப்பட்ட பின்னர், அதன் மாதிரிகள் இந்தியாவுக்கு அனுப்பப்பட்டன. அதில் கிலோகலோரிகள் குறைவாக இருந்தது கண்டறியப்பட்டது. எனவே, அந்த நிறுவனத்திற்கு இரட்டை அபராதம் விதிக்கப்படுகிறது.
இரண்டாவது 60,000 மெட்ரிக் தொன் ஏற்கனவே இறக்கப்பட்டுவிட்டது, அதன் மாதிரிகளும் பரிசோதனைக்கு அனுப்பப்படும். மூன்றாவது 60,000 மெட்ரிக் தொன் தற்போது இறக்கப்பட்டு வருகிறது. நிலக்கரி இலங்கையில் இறக்கப்பட்ட பிறகு, மாதிரிகள் தரமானதாக இல்லாவிட்டால், சம்பந்தப்பட்ட தரப்பினர் அபராதத்தைச் செலுத்த வேண்டியிருக்கும்" என அமைச்சர் விளக்கமளித்தார்.