சடலமாக மீட்கப்பட்ட சம்பவம் தொடர்பில் பிரதம பொலிஸ் பரிசோதகர் (Chief Inspector) ஒருவர் கைது செய்யப்பட்டுள்ளார்.
முன்னதாக, யாழ்ப்பாணத்தில் முன்னெடுக்கப்பட்ட கூட்டுப் பொலிஸ் நடவடிக்கையின் போது 43 வயதுடைய பிரதான சந்தேகநபர், அவரது மனைவி மற்றும் அவர்களது சிறு குழந்தை ஆகியோருடன் கைது செய்யப்பட்டிருந்தனர்.
அத்துடன், குண்டசாலை பிரதேச சபையுடன் இணைக்கப்பட்ட 49 வயதுடைய சாரதி ஒருவரும் கைது செய்யப்பட்டிருந்தார்.
இச்சம்பவத்தின் மூன்று முக்கிய சந்தேகநபர்களையும் 48 மணித்தியாலங்கள் தடுத்து வைத்து விசாரணை செய்ய பொலிஸாருக்கு நுவரெலியா நீதவான் புத்திக ஹர்ஷனி தர்மதாச அனுமதி வழங்கியுள்ளார்.
நாரம்மல பகுதியைச் சேர்ந்த பிரதான சந்தேகநபரான 43 வயதுடைய ஜயசுந்தர முதியான்சேலாகே சம்திக ஸ்ரீயான் ஜயசுந்தர, அவரது 35 வயதுடைய மனைவி ரத்நாயக்க முதியான்சேலாகே நெத்மி அமாயா ரத்நாயக்க மற்றும் சந்தேகநபர்களுக்கு உதவினார் எனக் குற்றம் சாட்டப்பட்ட குண்டசாலை பிரதேச சபையின் சாரதியான 49 வயதுடைய ஜயசிங்க ஆரச்சிகே ரஜித சாலிய சமரசிங்க ஆகியோருக்கே இந்த தடுப்புக்காவல் உத்தரவு பிறப்பிக்கப்பட்டுள்ளது.
வெள்ளவத்தையிலிருந்து யாழ்ப்பாணம் நோக்கி பயணித்த பேருந்து ஒன்றில் பிரதான சந்தேகநபர், அவரது மனைவி மற்றும் குழந்தை பயணித்த போது, வாலான ஊழல் தடுப்புப் பிரிவின் உத்தியோகத்தர்களால் அவர்கள் இடைமறிக்கப்பட்டதைத் தொடர்ந்தே இந்த திருப்புமுனை ஏற்பட்டதாக பொலிஸார் தெரிவித்தனர்.
தம்பதியினர் கடந்த புதன்கிழமை (24) யாழ்ப்பாணம், கைதடி பகுதியில் வைத்து கைது செய்யப்பட்டு, பின்னர் நுவரெலியா பொலிஸாரிடம் ஒப்படைக்கப்பட்டனர். இதனைத் தொடர்ந்தே, தம்பதியினருக்கு உதவியதாக சந்தேகிக்கப்படும் உள்ளூராட்சி மன்ற சாரதியை புலனாய்வாளர்கள் கைது செய்தனர்.
நேற்று வியாழக்கிழமை (25) இரவு, கண்டியிலுள்ள குண்டசாலை பொலிஸ் பயிற்சி விடுத்தயத்துடன் இணைக்கப்பட்ட பிரதம பொலிஸ் பரிசோதகர் ஒருவரை புலனாய்வாளர்கள் கைது செய்ததைத் தொடர்ந்து இந்த விசாரணை மேலும் விரிவுபடுத்தப்பட்டுள்ளது.
பிரதான சந்தேகநபரின் நெருங்கிய சகா எனக் கூறப்படும் இந்த பொலிஸ் அதிகாரி, சந்தேகநபர் கைது செய்யப்படுவதைத் தவிர்ப்பதற்காக அவருக்கு தங்குமிடம் மற்றும் உதவிகளை வழங்கியதாக பொலிஸார் குற்றம் சாட்டியுள்ளனர்.
சந்தேகநபர் தலைமறைவாக இருந்த காலத்தில் தனது குடும்பத்தினருடன் மூன்று தடவைகள் யாழ்ப்பாணத்திற்குப் பயணித்துள்ளமை விசாரணைகளில் தெரியவந்துள்ளதாக நுவரெலியா பிரிவுக்கு பொறுப்பான உதவி பொலிஸ் அத்தியட்சகர் (ASP) சந்தன பாஸ்நாயக்க தெரிவித்துள்ளார்.
அவர் வெளிநாட்டுக்கு தப்பியோட முயலாமல், நீண்டதூர பேருந்து பயணங்களைப் பயன்படுத்தியும், யாழ்ப்பாணத்தில் தற்காலிகமாக தங்கியிருந்தும், பொலிஸாரிடம் பிடிபடாமல் இருப்பதற்காக தெரிந்தவர்களின் வீடுகளுக்கு மாறி மாறிச் சென்று உள்நாட்டிலேயே தங்கியிருந்ததாக பொலிஸார் நம்புகின்றனர்.
புலனாய்வாளர்களின் கூற்றுப்படி, வெளிநாட்டுக்கு தப்பிச் செல்வதற்குத் தேவையான போதிய நிதி வசதிகள் சந்தேகநபரிடம் இருக்கவில்லை என்பதுடன், அவரது நடமாட்டங்கள் இலங்கைக்குள் கைது செய்யப்படுவதைத் தவிர்ப்பதற்கான முயற்சிகளுக்கு மாத்திரமே மட்டுப்படுத்தப்பட்டிருந்தன.