'மக்களுக்குத் தேவை கைதுகள் பற்றிய பேச்சல்ல, பொருட்களின் விலைகளுக்கான தீர்வுகளே!'

பாராளுமன்றத்தைப் பயன்படுத்த வேண்டாம்" - நாமல் ராஜபக்ஷ

எந்தவொரு விசாரணைக்கும் முகங்கொடுக்கத் தயார்; நீதித்துறை கட்டமைப்பின் மீது முழுமையான நம்பிக்கை உள்ளது

"அரசாங்க உறுப்பினர்களின் ஊழல்-மோசடி குற்றச்சாட்டுகளுக்கு மத்தியில் அதிகாரிகள் மௌனம் காக்கின்றனர்" - தற்போதைய அரசு மீது குற்றச்சாட்டு

பாராளுமன்றத்திற்குள் நபர்களைக் கைது செய்வது மற்றும் விசாரணைகள் குறித்து கலந்துரையாடி நேரத்தை வீணடிக்காது, வேகமாக அதிகரித்து வரும் வாழ்க்கைச் செலவினால் மக்கள் எதிர்கொள்ளும் கடுமையான பொருளாதார சுமைக்கு தீர்வுகளைக் காண்பதில் அரசாங்கம் தனது நேரடி அவதானத்தைச் செலுத்த வேண்டும் என ஸ்ரீலங்கா பொதுஜன பெரமுனவின் தேசிய அமைப்பாளரும் பாராளுமன்ற உறுப்பினருமான நாமல் ராஜபக்ஷ விசேட அறிக்கை ஒன்றின் ஊடாகத் தெரிவித்துள்ளார்.

நாடு முழுவதிலுமுள்ள குடும்பங்கள் எதிர்கொள்ளும் பொருளாதார கஷ்டங்களுக்கு பொதுமக்கள் ஜனாதிபதியிடமிருந்து நடைமுறைச்சாத்தியமான தீர்வுகளையே எதிர்பார்க்கின்றனரே தவிர, தற்போது முன்னெடுக்கப்பட்டு வரும் விசாரணைகள் மற்றும் சட்ட நடவடிக்கைகள் குறித்து அவர் பாராளுமன்றத்தில் ஆற்றும் உரைகள் மீது மக்களுக்கு எந்தவொரு ஆர்வமும் இல்லை என பாராளுமன்ற உறுப்பினர் சுட்டிக்காட்டியுள்ளார்.

கடந்தகால குற்றச்சாட்டுகள் மீதான விசாரணைகள் மற்றும் அடுத்தகட்ட சட்ட நடவடிக்கைகள் தொடர்பாக ஜனாதிபதி அநுர குமார திஸாநாயக்க நேற்றுமுன்தினம் (25) பாராளுமன்றத்தில் ஆற்றிய உரைக்கு பதிலளிக்கும் வகையிலேயே, எதிர்க்கட்சியின் அரசியல் முகாம் தற்போது நிதி நெருக்கடி மற்றும் வாழ்க்கைச் செலவுப் பிரச்சினையை முன்னிறுத்தி அரசாங்கத்தின் முன்னுரிமைகளை கேள்விக்குட்படுத்தியுள்ளது.

நாமல் ராஜபக்ஷ எழுப்பியுள்ள பிரதான விடயங்கள்:

1. சட்ட நடைமுறையின் சுதந்திரத்தன்மை: கைதுகள், விசாரணைகள் அல்லது நீதிமன்றத் தீர்ப்புகள் குறித்து முன்கூட்டியே கணிப்புகளை வெளியிடுவதற்கு ஜனாதிபதி பாராளுமன்ற மேடையைப் பயன்படுத்தக் கூடாது எனத் தெரிவித்துள்ள பாராளுமன்ற உறுப்பினர், விசாரிக்கப்பட வேண்டிய முறைப்பாடுகள் காணப்படின், அதனுடன் தொடர்புடைய சட்ட நடைமுறைகள் அரசியல் தலையீடுகளின்றி சுயாதீனமாக முன்னோக்கி நகர்வதற்கு இடமளிக்கப்பட வேண்டும் எனக் குறிப்பிட்டுள்ளார். தானும் தனது குழுவினரும் எந்தவொரு விசாரணைக்கும் முகங்கொடுக்கத் தயாராக இருப்பதாகவும், நீதித்துறை கட்டமைப்பின் மீது நம்பிக்கை உள்ளதால் எதிலிருந்தும் தப்பியோடப் போவதில்லை என்றும் அவர் வலியுறுத்தியுள்ளார்.

2. வாழ்க்கைச் செலவு நெருக்கடி: பொருட்களின் விலைகள் மற்றும் வீட்டுச் செலவுகள் நாளாந்தம் அதிகரித்து வருவதன் காரணமாக, இந்நாட்டிலுள்ள பெரும்பாலான குடும்பங்கள் தற்போது பாரிய பொருளாதார நெருக்கடிக்கு உள்ளாகியிருப்பதாக நாமல் ராஜபக்ஷ சுட்டிக்காட்டியுள்ளார். தற்போதைய அரசாங்கம் தேர்தல் காலத்தில் வாக்குறுதியளித்த நல்லாட்சிக் கொள்கைகளையும், நிவாரணங்களை வழங்கும் வேலைத்திட்டங்களையும் நடைமுறையில் நிறைவேற்றுவதற்கு முற்றாகத் தவறியுள்ளதாகவும் அவர் குற்றம் சாட்டியுள்ளார்.

3. அரசாங்கத்தின் உள்வாரி ஊழல் குற்றச்சாட்டுகள்: தற்போதைய அரசாங்கத்தின் சில அமைச்சர்கள் மற்றும் உறுப்பினர்களின் மோசடிகள், ஊழல்கள் மற்றும் பொறுப்பற்ற விதத்திலான சொத்துக் குவிப்புகள் தொடர்பில் தற்போது பாரிய கேள்விகள் எழுந்துள்ளதாகத் தெரிவித்துள்ள பாராளுமன்ற உறுப்பினர், அரசாங்கத் தரப்பினருக்கு எதிராக சுமத்தப்படும் இவ்வாறான குற்றச்சாட்டுகள் குறித்து புலனாய்வு அதிகாரிகள் எந்தவொரு நடவடிக்கையும் எடுக்காது மௌனக் கொள்கையைக் கடைப்பிடிப்பது ஏன் என்றும் கேள்வி எழுப்பியுள்ளார்.

கைதுகள் மற்றும் நீதிமன்ற வழக்குகள் போன்ற அரசியல் அறிக்கைகளைத் தற்காலிகமாகப் பக்கவாட்டில் ஒதுக்கிவிட்டு, சாதாரண மக்கள் எதிர்கொள்ளும் உண்மையான பொருளாதார சவால்கள், வாழ்க்கைச் செலவுக் கட்டுப்பாடு மற்றும் அரசாங்கத்திற்குள் இடம்பெறும் ஊழல்கள் குறித்து மக்கள் மத்தியில் நிலவும் கவலைகள் குறித்து ஜனாதிபதி உடனடியாக அவதானம் செலுத்த வேண்டும் என நாமல் ராஜபக்ஷ தனது அறிக்கையின் ஊடாக மேலும் கேட்டுக்கொண்டுள்ளார்.