ஜனாதிபதியின் உரையிலுள்ள 'சொல்லலங்காரங்களுக்கும்' யதார்த்தத்துக்கும் இடையே பாரிய முரண்பாடு!

- தெரிவுசெய்யப்பட்ட நீதி குறித்து குற்றச்சாட்டு

2.5 மில்லியன் டொலர் கொள்ளை, கொள்கலன் மற்றும் நிலக்கரி மோசடிகள் குறித்து அரசாங்கத்தின் மௌனம் கேள்விக்குறியாக்கப்பட்டுள்ளது

"உயர் நீதிமன்ற நியமனங்களை 6 மாதங்கள் தாமதப்படுத்துவது ஒரு ஜனாதிபதிக்கு அழகல்ல" - ஆட்சேர்ப்பு பிரச்சினைகள் சுட்டிக்காட்டுப்பு

ஜனாதிபதி அநுர குமார திஸாநாயக்கவினால் நேற்று (25) பாராளுமன்றத்தில் ஆற்றப்பட்ட உரைக்கு பதிலளிக்கும் வகையில் 'தினன தகுண' (வெற்றிபெறும் தெற்கு) கூட்டமைப்பு விசேட அறிக்கை ஒன்றை வெளியிட்டுள்ளது.

ஆட்சியை விமர்சிப்பதற்கும் எதிர்ப்பதற்கும் எதிர்க்கட்சிகளுக்கு உள்ள சட்டபூர்வமான உரிமையை ஏற்றுக்கொள்வதையும், ஊழல் மற்றும் பாதாள உலகத்தை ஒடுக்குவதற்கு ஜனாதிபதி வெளிப்படுத்திய அர்ப்பணிப்பையும் பாராட்டுவதாக தெரிவித்துள்ள அந்த அமைப்பு, எனினும் அந்த வாக்குறுதிகளுக்கும் தற்போதைய ஆட்சி மாதிரியின் நடைமுறை யதார்த்தத்திற்கும் இடையே பாரிய முரண்பாடுகள் காணப்படுவதாக சுட்டிக்காட்டியுள்ளது.

நாட்டில் தற்போதைய ஆட்சியின் கீழ் சட்டத்தின் ஆட்சி அரசியல் ஆயுதமாக பயன்படுத்தப்படும் அபாயகரமான போக்கு உருவாகி வருவதாக 'தினன தகுண' கூட்டமைப்பு குற்றம் சாட்டியுள்ளது. சிறிய குற்றங்களுக்கு எதிராக சட்டம் கடுமையாக அமுல்படுத்தப்படும் பின்னணியில், உயர்மட்ட நிதி மோசடிகள் மற்றும் கட்டமைப்பு ரீதியான ஊழல்களுக்கு எதிராக அரசாங்க இயந்திரம் தெளிவான மௌனத்தை கடைப்பிடிப்பதன் மூலம், தெரிவுசெய்யப்பட்ட முறையில் நீதியை நிலைநாட்டும் ஒரு வழிமுறை உருவாக்கப்பட்டுள்ளதாக அவர்கள் கருதுகின்றனர்.

'தினன தகுண' கூட்டமைப்பினால் எழுப்பப்படும் 3 பிரதான விவகாரங்கள்:

1. தீர்க்கப்படாத பாரிய நிதி மோசடிகள்: ஊழலை ஒழிப்பதில் அரசாங்கம் உண்மையிலேயே அர்ப்பணிப்புடன் இருக்குமானால், திறைசேரியில் இடம்பெற்ற 2.5 மில்லியன் அமெரிக்க டொலர் கொள்ளை மற்றும் நாடு முழுவதும் பெரும் பரபரப்பை ஏற்படுத்திய கொள்கலன் மோசடி தொடர்பாக அரசாங்கமும் ஜனாதிபதியும் இதுவரையில் மௌனம் காப்பதை நியாயப்படுத்த முடியாது என்றும், இது தொடர்பான வெளிப்படையான பொறுப்புக்கூறலை பொதுமக்களுக்கு உடனடியாக வெளிப்படுத்த வேண்டும் என்றும் அந்த அறிக்கையில் தெரிவிக்கப்பட்டுள்ளது.

2. எரிபொருள் மற்றும் நிலக்கரி கொள்முதல்: எந்தவொரு வெளிப்படைத்தன்மையும் இன்றி அதிக விலைக்கு டீசலை கொள்வனவு செய்வதன் மூலமான பொருளாதார சுமை தொடர்ந்து மக்கள் மீது சுமத்தப்பட்டுள்ளதாக சுட்டிக்காட்டியுள்ள கூட்டமைப்பு, நிலக்கரி கொள்முதல் பிரச்சினை விசாரணை ஆணைக்குழுவொன்றிடம் ஒப்படைக்கப்பட்டு முடக்கப்பட்டுள்ளதாக தெரிவித்தது. மேலும், அண்மையில் இடம்பெற்ற நிலக்கரி உடனடி டெண்டர் (Spot Tender) நடைமுறையின் ஊடாக தற்போதைய நிர்வாகம் தனது நெருக்கமானவர்களுக்கு சாதகமாக செயற்பட்டுள்ளதாகவும் அவர்கள் குற்றம் சாட்டியுள்ளனர்.

3. நீதித்துறையின் சுதந்திரமும் நியமனங்களும்: கீழ் நீதிமன்றங்களுக்கு இளம் நீதவான்களை ஆட்சேர்ப்பு செய்வதில் அரசாங்கத்திற்கு உள்ள நிர்வாக பலவீனமானது, சிரேஷ்ட நீதவான்களின் தொழில்முறை முன்னேற்றத்திற்கு தடையாக அமையக்கூடாது என 'தினன தகுண' கூட்டமைப்பு வலியுறுத்தியுள்ளது. உயர் நீதிமன்ற நீதவான்களின் பதவியுயர்வுகளை 6 மாதங்களுக்கும் மேலாக தாமதப்படுத்தியமை தொடர்பில் பிரதம நீதியரசரை மேற்கோள்காட்டி ஜனாதிபதி முன்வைத்த காரணங்கள், நாட்டை ஆளும் ஒரு ஜனாதிபதிக்கு பொருத்தமானவை அல்ல என்றும், உயர் நீதிமன்ற நீதியரசர்களின் ஓய்வு பெறும் வயது குறித்து பாராளுமன்ற உரையின் போது கருத்து தெரிவிப்பதை ஜனாதிபதி வேண்டுமென்றே தவிர்த்துள்ளார் என்றும் அவர்கள் சுட்டிக்காட்டியுள்ளனர்.

பாராளுமன்றத்தில் நிகழ்த்தப்படும் அரசியல் சொல்லலங்காரங்களுக்கு அப்பால் சென்று, இந்த பாரிய கட்டமைப்பு குறைபாடுகளுக்கு உடனடியாக நடைமுறைச்சாத்தியமான மற்றும் தெளிவான நடவடிக்கைகள் எடுக்கப்பட வேண்டும் என 'தினன தகுண' கூட்டமைப்பின் தலைமைத்துவ சபை மற்றும் செயற்குழு அரசாங்கத்திடம் கோரிக்கை விடுத்துள்ளது. சட்டத்தின் ஆட்சியை சமமாக பேணுவதும், அரசாங்கத்தின் கொள்முதல் செயல்முறைகளில் முழுமையான வெளிப்படைத்தன்மையை உறுதி செய்வதும் நாகரீகமான அரசியலின் அத்தியாவசிய காரணியாகும் என்றும் அவர்கள் மேலும் நினைவூட்டியுள்ளனர்.