ஃபெராரி (Ferrari), தனது வரலாற்றிலேயே முதன்முறையாக வடிவமைத்துள்ள முழுமையான மின்சாரக் காரான "லூஸ்" (Luce) மாடலை உத்தியோகபூர்வமாக அறிமுகப்படுத்தியுள்ளது.
சர்வதேச சந்தையில் இதன் விலை 640,000 அமெரிக்க டொலர்கள் (சுமார் 474,320 பிரித்தானிய பவுண்டுகள்) என நிர்ணயிக்கப்பட்டுள்ளது.
இத்தாலிய மொழியில் 'லூஸ்' என்றால் "ஒளி" என்று பொருள்படும். ஆப்பிள் (Apple) நிறுவனத்தின் முன்னாள் வடிவமைப்புத் தலைவர் சேர் ஜோனி இவ் (Sir Jony Ive) இன் 'லவ்ஃபிரம்' (LoveFrom) நிறுவனத்துடன் இணைந்து பெராரி இதனை வடிவமைத்துள்ளது.
ஃபெராரியின் வழக்கமான ஸ்போர்ட்ஸ் கார் தோற்றத்திலிருந்து முற்றிலும் மாறுபட்டு, இது நிறுவனத்தின் முதலாவது 5 ஆசனங்களைக் (5-Seater) கொண்ட காராக உருவாக்கப்பட்டுள்ளது.
சமூக வலைத்தளங்களில் வெடித்த வாதப்பிரதிவாதங்கள்:
இந்த காரின் விசித்திரமான வடிவமைப்பு சமூக வலைத்தளங்களில் பெரும் விவாதங்களை ஏற்படுத்தியுள்ளது.
-
சில வாகன விமர்சகர்கள் மற்றும் நெட்டிசன்கள், அண்மையில் பிரித்தானியாவின் 'ஜாகுவார்' (Jaguar) கார் நிறுவனம் தனது பாரம்பரிய வடிவமைப்பை மாற்றி விமர்சனத்துக்குள்ளானதை இதனுடன் ஒப்பிட்டுள்ளனர். எக்ஸ் (X) தளத்தில் பதிவிட்டுள்ள ஒருவர், "ஜாகுவாரைப் போல பெராரியும் தனது பிராண்ட் மதிப்பை அழித்துக்கொண்டது; இது குப்பைத் தொட்டிக்குச் செல்ல வேண்டிய கார்" எனக் கடுமையாகச் சாடியுள்ளார்.
-
அதேவேளை, மறுபுறம் காரின் நவீன தொழில்நுட்பத்தைப் பாராட்டியுள்ள சிலர், "இது கார் வடிவமைப்பில் ஒரு மாஸ்டர்கிளாஸ் (Masterclass). வாகன உலகில் ஒரு புதிய புரட்சி" எனப் புகழ்ந்துரைத்துள்ளனர்.
விமர்சனங்கள் குறித்துப் பேசிய /பெராரியின் தலைமை வடிவமைப்பு அதிகாரி பிளவியோ மன்சோனி (Flavio Manzoni), புதிய கண்டுபிடிப்புகளின் போது இவ்வாறான மாறுபட்ட கருத்துக்கள் (Polarising) எழுவது இயல்பானது என்றும், வரும் மாதங்களில் மக்கள் இதன் அருமையைப் புரிந்துகொள்வார்கள் என்றும் தெரிவித்துள்ளார்.
காரின் சிறப்பம்சங்கள் மற்றும் தொழில்நுட்பம்:
-
வேகம்: இந்த காரின் ஒவ்வொரு சக்கரத்திலும் பெராரி நிறுவனத்தால் தயாரிக்கப்பட்ட பிரத்தியேக மின்சார மோட்டார்கள் பொருத்தப்பட்டுள்ளன. இது கார் புறப்பட்டு வெறும் 2.5 விநாடிகளில் மணிக்கு 60 மைல் (96 கி.மீ) வேகத்தைத் தொட உதவுகிறது.
-
மறுவிற்பனை மதிப்பு (Resale Value): காரின் அனைத்து உதிரிப்பாகங்களும் பெராரி நிறுவனத்திற்குள்ளேயே (In-house) தயாரிக்கப்பட்டுள்ளன. இதனால் எதிர்காலத்தில் பழுதுபார்ப்புகளை நிறுவனமே நேரடியாக மேற்கொள்ள முடியும் என்பதால், காரின் மறுவிற்பனை மதிப்பு எப்போதும் குறையாது என நிறுவனம் உறுதியளித்துள்ளது.
மின்சார கார் சந்தையில் உலகளாவிய பின்னடைவு:
கடந்த சில வருடங்களாக சர்வதேச மின்சார வாகன (EV) சந்தை பெரும் சவால்களை எதிர்கொண்டு வருகிறது.
அமெரிக்க அதிபர் டொனால்ட் ட்ரம்ப் தலைமையிலான அரசாங்கம் மின்சார கார் வாங்குபவர்களுக்கான சலுகைகளைக் குறைத்ததாலும், நுகர்வோர் மத்தியில் ஆர்வம் குறைந்ததாலும் ஃபோர்டு (Ford), வோக்ஸ்வாகன் (Volkswagen) போன்ற நிறுவனங்கள் மீண்டும் பெட்ரோல் கார்களின் தயாரிப்பில் கவனம் செலுத்தத் தொடங்கியுள்ளன.
ஃபெராரியின் பிரதான போட்டியாளர்களான லம்போகினி (Lamborghini) மற்றும் போர்ஷே (Porsche) ஆகிய நிறுவனங்கள், போதிய வரவேற்பு இல்லாததாலும் சீன மின்சார கார்களின் கடுமையான விலைப் போட்டியினாலும் தங்களின் முழுமையான மின்சார கார் திட்டங்களைக் கைவிட்டு, ஹைப்ரிட் (Hybrid) கார்களை தயாரிக்கும் முடிவுக்கு மாறியுள்ளன.
இருப்பினும், ஐரோப்பாவின் மிக மதிப்புமிக்க கார் தயாரிப்பு நிறுவனமான பெராரி, பிரத்தியேக வாடிக்கையாளர்களை மட்டுமே நம்பியிருப்பதால் இந்த சவால்களுக்கு மத்தியிலும் மின்சார கார் தயாரிப்பில் இறங்கியுள்ளது.
அத்துடன், மின்சார கார்களுடன் சேர்த்து தங்களின் பாரம்பரிய பெட்ரோல் மற்றும் ஹைப்ரிட் கார்களின் தயாரிப்பையும் தொடர்ந்து முன்னெடுக்கவுள்ளதாகப் ஃபெராரியின் பிரதம நிறைவேற்று அதிகாரி பெனெடெட்டோ விக்னா (Benedetto Vigna) தெரிவித்துள்ளார்.