பிரச்சினையாக நிலக்கரி விவகாரம் உருவெடுத்துள்ளது. இந்த நிலைக்கு அரசாங்கமே பொறுப்புக்கூற வேண்டும் என்று, புபுது ஜாகொட தெரிவித்தார்.
அதற்கமைய, மின்சக்தி அமைச்சு மற்றும் வர்த்தக அமைச்சு என்பன அரசாங்கத்தின் 'அகிலிஸ் ஹீல்' (Achilles' Heel) எனப்படும் பலவீனமான புள்ளிகளாக மாற்றுவதற்கு ஒட்டுமொத்த எதிர்க்கட்சியும் முனைப்புடன் செயற்படுவது புலனாகின்றது.
எந்தவொரு அரசாங்கத்தினதும் பலவீனங்களை எதிர்க்கட்சி சுட்டிக்காட்ட வேண்டியது அவசியமாகும். எதிர்க்கட்சிக்கும் அரசாங்கத்திற்கும் இடையிலான உறவு எவ்வளவு தூரம் பகுத்தறிவு ரீதியானதாக அமைய வேண்டும் அல்லது அதன் தன்மை எவ்வாறிருக்க வேண்டும் என்பதை நாம் விதிகளின் மூலம் தீர்மானிக்க முடியாது.
எனினும், தேசிய மக்கள் சக்திக்கும் (NPP) தற்போதைய எதிர்க்கட்சிக்கும் இடையில் நிலவும் விரோதப் போக்கு போன்றதொரு நிலை, ஐக்கிய தேசியக் கட்சிக்கும் பொதுஜன பெரமுனவிற்கும் இடையிலோ அல்லது வரலாற்றில் வேறு எந்தவொரு நாடாளுமன்ற எதிர்க்கட்சிக்கும் அரசாங்கத்திற்கும் இடையிலோ இருந்திருக்க வாய்ப்பில்லை.
ஆனால், இந்த நிலையை வெறும் 'வர்க்க முரண்பாடு' (Class Antagonism) என மேலோட்டமாக வரையறுத்துவிட்டு இப்பிரச்சினையிலிருந்து தப்பிவிட முடியாது.
இந்த வர்க்க வேர் என்பது மிகவும் சிக்கலான ஒன்றாகும். ரால்ப் டாரண்டோர்ஃப் (Ralf Dahrendorf) சுட்டிக்காட்டுவதைப் போல, இது சிலவேளைகளில் முதலாளியை விடவும், முதலாளித்துவ நிறுவனங்களின் ஆதிக்கம் அல்லது அதிகாரம் (Dominance/Authority) குறித்த பிரச்சினையாகவே காணப்படுகிறது. இதனை அறிவுப்பூர்வமாக பகுப்பாய்வு செய்ய எதிர்க்கட்சி தயாராக இல்லை.
சிலநேரம், தற்போதைய சூழலை முதலாளித்துவ-பாட்டாளி வர்க்கம் என்ற பாரம்பரிய பகுப்பாய்விற்குள் மாத்திரம் அடக்கிவிட முடியாது.
உலகளாவிய ரீதியில் பரந்துள்ள சிக்கலான வணிக வலைப்பின்னல்கள், சர்வதேச புலனாய்வு அமைப்புகள், தரகர் வலைப்பின்னல்கள், அரசாங்கங்களை சீர்குலைக்கும் சர்வதேச தந்திரோபாயங்கள் மற்றும் அவற்றுடன் நுணுக்கமாக செயற்படும் உள்நாட்டு குழுக்களுக்கு இடையிலான ஆழமான மூலோபாய உறவுகள் இதில் நிச்சயம் காணப்படுகின்றன.
ஆனால், ஒரு இடதுசாரியான புபுது ஜயகொட கூட, அந்த ஆழமான கட்டமைப்பைக் கொண்ட முதலாளித்துவ உலகப் பொருளாதார-அரசியல் உறவுகளை நோக்குவதை விட, தற்போதைய அரசாங்கத்தை பகுப்பாய்வு செய்வதில் மேலோட்டமான விடயங்களிலேயே கவனம் செலுத்துவதாகத் தெரிகிறது. தற்போதைய அரசாங்கம் நீண்ட காலம் ஆட்சியில் இருப்பது எந்த உள்நாட்டு மற்றும் சர்வதேச சக்திகளுக்கு மூலோபாய ரீதியாக பாதகமானது?
தமது உறவுப் பிணைப்புகள் — ஊடகங்கள், சில அரச சார்பற்ற நிறுவனங்கள், சில எதிர்க்கட்சிகள், வணிக மற்றும் இடைத்தரக முகாமையாளர்கள், தரகுப் பணம் (Commission) பெறும் வர்க்கம் மற்றும் சமூக ஊடக அமைப்புகள் — ஆகியவற்றைப் பயன்படுத்தி, தற்போதைய "இடதுசாரி, மேட்டுக்குடியற்ற, கிராமிய சிங்கள பௌத்த" அரசாங்கத்தைக் கவிழ்க்கும் நடவடிக்கை முன்னெடுக்கப்படுவதாக நாம் ஏன் கருதக்கூடாது? ஒரு இடதுசாரி சக்தியாக தோழர் புபுதுவிடம் நாம் இந்தக் கேள்வியையே முன்வைக்கிறோம்.
மறுபுறம், வசந்த சமரசிங்க அல்லது குமார ஜயகொடி போன்ற நேரடியாக வர்த்தகம் மற்றும் முதலாளித்துவ விநியோக வலைப்பின்னல்களுடன் தொடர்புபட வேண்டியுள்ள அமைச்சர்கள் மற்றும் அந்த அமைச்சுக்கள் குறித்து விசாரணை நடத்துவது எவ்வகையிலும் தவறானதல்ல.
ஆனால், ஆழமான உண்மை என்னவென்றால், ஒட்டுமொத்த இனவாத, முதலாளித்துவ, ஆணாதிக்க, சுற்றாடல் விரோத, மேட்டுக்குடி எதிர்க்கட்சியின் 'ஆட்சி கவிழ்ப்பு' தந்திரோபாயத்திற்கும், சர்வதேச 'கொள்ளைக்கார' வணிக மாஃபியாக்களின் தந்திரோபாயத்திற்கும் (ஷெல் - Shell என்பது என்ன?) சிக்கி, அரச மறுசீரமைப்பிற்காக கிடைத்துள்ள தற்போதைய சந்தர்ப்பத்தை நாம் இழந்துவிட வேண்டுமா?
அரசாங்கத்தை தலைதூக்க விடாமல், முதலாம் நாளிலிருந்து இன்றுவரை செய்திகள் ஊடாகத் தாக்கி வரும் மக்கள் சார்பற்ற ஊடகங்களின் 'Voice Cut' தேவைகளைப் பூர்த்தி செய்வதை விட, ஒரு நீதியான சமூகத்திற்காக எமக்கு ஆழமான பகுப்பாய்வுகளே அவசியமாகின்றன.