வீடுகளுக்கான மின்சார விநியோகம் துண்டிக்கப்பட்டுள்ளது.
டெக்சாஸ் முதல் நியூ இங்கிலாந்து வரை நீடிக்கும் இந்த "உயிருக்கே ஆபத்தான" வானிலை நிலைமைகள் காரணமாக நாடு முழுவதும் பாடசாலைகள் மற்றும் வீதிகள் மூடப்பட்டுள்ளதுடன், ஆயிரக்கணக்கான விமானப் பயணங்களும் ரத்து செய்யப்பட்டுள்ளதாக தேசிய வானிலை சேவை (NWS) தெரிவித்துள்ளது.
லூசியானாவில் இருவர் குளிரினால் (hypothermia) உயிரிழந்துள்ளனர். அத்துடன் டெக்சாஸ், டென்னசி மற்றும் கன்சாஸ் ஆகிய மாநிலங்களிலும் புயல் தொடர்பான உயிரிழப்புகள் பதிவாகியுள்ளன.
ஞாயிற்றுக்கிழமை பிற்பகல் நிலவரப்படி, 800,000 க்கும் அதிகமான வீடுகள் மின்சாரமின்றி இருளில் மூழ்கியுள்ளன. இதற்கிடையில், 11,000 க்கும் மேற்பட்ட விமானங்கள் ரத்து செய்யப்பட்டுள்ளதாக FlightAware தளம் தெரிவித்துள்ளது.
அமெரிக்காவின் மொத்த சனத்தொகையில் பாதிக்கும் மேலான சுமார் 180 மில்லியன் மக்களைப் பாதித்துள்ள இந்தப் பனிப்புயல், கடும் பனிப்பொழிவு மற்றும் உறைபனி மழையை (freezing rain) ஏற்படுத்தியுள்ளது. இது இன்னும் பல நாட்களுக்கு நீடிக்கக்கூடும் என எதிர்பார்க்கப்படுகிறது.
உயிரிழப்புகள் மற்றும் பாதிப்புகள்:
லூசியானா சுகாதாரத் திணைக்களம் இருவர் கடும் குளிரால் உயிரிழந்ததை உறுதிப்படுத்தியுள்ளது.
டெக்சாஸ் மாநிலத்தின் ஆஸ்டின் மேயர், காலநிலையால் ஒரு மரணம் நிகழ்ந்துள்ளதாகத் தெரிவித்துள்ளார்.
கன்சாஸ் மாநிலத்தில் பனியால் மூடப்பட்ட நிலையில் பெண் ஒருவரின் சடலம் மீட்கப்பட்டுள்ளது.
நியூயோர்க் மேயர் சோஹ்ரான் மம்தானி, சனிக்கிழமை மட்டும் நகரில் ஐந்து பேர் உயிரிழந்துள்ளதாகத் தெரிவித்துள்ளார், எனினும் அவர்களின் மரணத்திற்கான காரணம் இன்னும் உறுதிப்படுத்தப்படவில்லை.
அவசரகால நிலை பிரகடனம்: அமெரிக்காவின் பாதியளவிலான மாநிலங்களில் அவசரகால நிலை பிரகடனப்படுத்தப்பட்டுள்ளது. வாஷிங்டன் மேயர் முரியல் பௌசர் கருத்துத் தெரிவிக்கையில், கடந்த தசாப்தத்தில் வாஷிங்டன் டி.சி கண்ட மிகப்பெரிய பனிப்புயல் இதுவெனக் குறிப்பிட்டுள்ளார். கடும் பனிப்பொழிவு காரணமாக அமெரிக்க செனட் சபையின் திங்கட்கிழமை வாக்கெடுப்புகளும் ரத்து செய்யப்பட்டுள்ளன.
கனடாவின் ஒன்ராறியோ மாகாணத்திலும் 15-30 செ.மீ வரை பனிப்பொழிவு பதிவாகக்கூடும் என எதிர்பார்க்கப்படுவதுடன், அங்கேயும் நூற்றுக்கணக்கான விமானங்கள் ரத்து செய்யப்பட்டுள்ளன.
விஞ்ஞான ரீதியான காரணம்: வானிலை நிபுணர்களின் கூற்றுப்படி, 'துருவ சுழல்' (Polar Vortex) எனப்படும் ஆர்க்டிக் பகுதிக்கு மேலே காணப்படும் கடும் குளிர்காற்று தெற்கு நோக்கி நகர்ந்ததே இந்த கடும் புயலுக்குக் காரணமாகும். இந்த அபாயகரமான குளிரான காலநிலை பிப்ரவரி மாதம் தொடக்கம் வரை நீடிக்கக்கூடும் என எதிர்வு கூறப்பட்டுள்ளது.
புவி வெப்பமடைதல் மற்றும் காலநிலை மாற்றமே துருவ சுழல் இவ்வாறான மாற்றங்களுக்கு உள்ளாவதற்குப் பிரதான காரணம் என சில நிபுணர்கள் சுட்டிக்காட்டுகின்றனர்.