யு.எஸ்.எஸ். ஜெரால்ட் ஆர். ஃபோர்ட் (USS Gerald R. Ford) நேற்று (24) கிரேக்கத்தின் கிரீட் தீவிலுள்ள துறைமுகத்தை வந்தடைந்தது. மத்திய கிழக்கு பிராந்தியத்தை நோக்கிப் பயணிக்கும் வழியில், கப்பலின் சுகாதார வசதிகளைப் புனரமைப்பதற்காகவே அது அங்கு நங்கூரமிட்டதாக சமூக ஊடகத் தகவல்கள் தெரிவிக்கின்றன.
ஈரான் மீது தாக்குதல் நடத்துவதற்குத் தயாராகி வரும் அமெரிக்கப் படைகளின் அண்மைக்கால நகர்வுகள் தொடர்பான புகைப்படங்கள் ஊடகங்களில் வௌியாகியுள்ளன. மத்திய கிழக்கு பிராந்தியத்தில் அமெரிக்கா தனது கடற்படை மற்றும் விமானப்படை அதிகாரத்தை மிகத் தீவிரமாக நிலைநிறுத்தி வருவதை இந்தப் புகைப்படங்கள் உறுதிப்படுத்துகின்றன.
2003 ஆம் ஆண்டு ஈராக் போருக்காக அமெரிக்கப் படைகள் மத்திய கிழக்கில் குவிக்கப்பட்டதன் பின்னர், இதுவரை இல்லாத வகையில் மிகப்பாரிய இராணுவக் குவிப்பு இடம்பெறும் முதல் சந்தர்ப்பம் இதுவெனக் கருதப்படுகிறது.
இராணுவ நகர்வுகள் குறித்த முக்கிய விபரங்கள்:
ஜிப்ரால்டர் நீரிணை ஊடாகப் பயணம்: யு.எஸ்.எஸ். ஜெரால்ட் ஆர். ஃபோர்ட் போர்க்கப்பல் ஜிப்ரால்டர் நீரிணையைக் கடந்து கிரேக்கத்தின் கிரீட் தீவை நோக்கிப் பயணித்துக் கொண்டிருக்கின்றது.
விமானங்களுக்கான எரிபொருள் விநியோகம்: போர்த்துக்கல்லின் கட்டுப்பாட்டிலுள்ள அசோரஸ் தீவுக்கூட்டத்தில் அமைந்துள்ள லெசஸ் (Lajes) விமானத் தளத்தில், போர் விமானங்களுக்கு வானிலேயே எரிபொருள் நிரப்பும் அமெரிக்காவின் விசேட எண்ணெய் தாங்கி விமானங்கள் கடந்த 23ஆம் திகதி நிலைகொண்டிருந்தன.
விமானத் தள அனுமதி: லெசஸ் விமானத் தளத்தில் அமெரிக்க இராணுவ நடவடிக்கைகள் முன்னெடுக்கப்படுவதற்கு தமது அரசாங்கத்தின் விசேட அனுமதி தேவையில்லை என போர்த்துக்கல் அரசு அறிவித்துள்ளது.
ஐரோப்பிய தளங்களில் குவிப்பு: கடந்த 20 ஆம் திகதி பிரித்தானியாவின் ராயல் விமானப்படைக்குச் சொந்தமான மில்டன்ஹால் (Mildenhall) தளத்திற்கும், 19 ஆம் திகதி பல்கேரியாவின் சோபியா சர்வதேச விமான நிலையத்திற்கும் அமெரிக்கப் போர் விமானங்கள் பெருமளவில் வந்து சேர்ந்துள்ளன.
அரபிக்கடல் கண்காணிப்பு: அரபிக்கடலில் பயணிக்கும் அமெரிக்கத் தாக்குதல் கப்பல்களுக்குத் தேவையான எரிபொருளை விநியோகிக்கும் விசேட போர்க்கப்பல்கள் கடந்த 18 ஆம் திகதி அப்பிராந்தியத்தில் நிலைநிறுத்தப்பட்டுள்ளன.
ஈரான் - ரஷ்யா கூட்டுப் பயிற்சி:
மறுபுறம், ரஷ்யா மற்றும் ஈரான் ஆகிய நாடுகளுக்கு இடையே அண்மையில் இடம்பெற்ற கூட்டு இராணுவப் பயிற்சி தொடர்பான புகைப்படங்களும் வௌியாகியுள்ளன. கடந்த 17 ஆம் திகதி தெற்கு ஈரான் கடற்பரப்பில் பயணித்த ஈரானியக் கப்பலொன்றிலிருந்து ஏவுகணை ஏவப்படும் காட்சிகள் அதில் இடம்பெற்றுள்ளன.