சட்ட ரீதியான கட்டமைப்பிற்குள் கொண்டு வருமாறு அரசாங்க நிதி பற்றிய பாராளுமன்றக் குழு (COPF) அதிகாரிகளுக்குப் பணிப்புரை விடுத்துள்ளது.
இது குறித்து விரிவாக விளக்கமளித்த குழுவின் தலைவர், பெருந்தோட்டத் தொழிலாளர்களின் ஊதியத்தை அதிகரிப்பதற்கு குழுவில் எவ்வித எதிர்ப்பும் இல்லை என்பதை வலியுறுத்தினார். எவ்வாறாயினும், இந்தக் கொடுப்பனவை மேற்கொள்வதற்காகப் பயன்படுத்தப்படும் பொறிமுறையின் சட்ட ரீதியான அடிப்படை குறித்து விவாதிக்கப்பட வேண்டும் என அவர் தெரிவித்தார்.
தற்போதைய நிலையில், இந்தக் கொடுப்பனவானது தனியார் தோட்ட நிறுவனங்களுடன் எட்டப்பட்ட புரிந்துணர்வு ஒப்பந்தத்தின் (MoU) அடிப்படையிலேயே வழங்கப்படுவதாகவும், இது தொடர்பாக இதுவரை வர்த்தமானி அறிவித்தல் எதுவும் வெளியிடப்படவில்லை என்பதும் சுட்டிக்காட்டப்பட்டது. இவ்வாறானதொரு தற்காலிக ஏற்பாட்டை எந்த நேரத்திலும் ரத்து செய்ய முடியும் எனவும் குழு எச்சரித்தது. அத்துடன், இந்த 200 ரூபா கொடுப்பனவானது ஊழியர் சேமலாப நிதி (EPF) பங்களிப்பிற்கு உள்ளடக்கப்படவில்லை என்பதையும் அதிகாரிகள் இதன்போது குறிப்பிட்டனர்.
தனியார் தோட்ட நிறுவனங்களுடன் மூன்று ஆண்டு காலப்பகுதிக்காகவே இந்த புரிந்துணர்வு ஒப்பந்தம் மேற்கொள்ளப்பட்டுள்ளதாகவும், இந்தக் காலம் முடிவடைந்த பின்னர் அரசாங்கம் இந்தக் கொடுப்பனவைத் தொடர விரும்பினால், அதற்காகப் புதிய கொள்கை ரீதியான முடிவு எடுக்கப்பட வேண்டும் எனவும் அதிகாரிகள் குழுவிடம் தெரிவித்தனர்.
முறையான நிதி ஒழுக்கங்கள் இன்றி தனியார் நிறுவனங்களின் ஊழியர்களுக்குச் சம்பளம் வழங்குவதற்காக பொது நிதியைப் பயன்படுத்துவது பொருத்தமற்றது என குழுவின் தலைவர் சுட்டிக்காட்டினார். எவ்வாறாயினும், 2026ஆம் ஆண்டுக்கான வரவு செலவுத் திட்டத்தின் கீழ் பாராளுமன்றத்தினால் அங்கீகரிக்கப்பட்டதன் அடிப்படையிலேயே இந்த நிதி வழங்கப்படுவதாக அதிகாரிகள் தரப்பில் விளக்கமளிக்கப்பட்டது.
அங்கீகரிக்கப்பட்ட வரவு செலவுத் திட்ட மதிப்பீடுகளின்படி, இந்தக் கொடுப்பனவுக்கான ஒதுக்கீடு "அபிவிருத்தி மானியம்" (Development Subsidy) என வகைப்படுத்தப்பட்டுள்ளது. அபிவிருத்தி மானியங்கள் பொதுவாக உற்பத்தியை அதிகரிப்பதை நோக்கமாகக் கொண்டவை என்பதால், இதனை "உற்பத்தி ஊக்குவிப்பு" (Production Incentive) என அழைப்பதே பொருத்தமானது என திறைசேரியின் பிரதிச் செயலாளர் பரிந்துரைத்தார். இருப்பினும், ஏற்கனவே ஜனவரி மாதத்திற்காக வழங்கப்பட்ட கொடுப்பனவுகளிலோ அல்லது தொடர்புடைய புரிந்துணர்வு ஒப்பந்தங்களிலோ இவ்வாறான நிபந்தனைகள் நடைமுறையில் குறிப்பிடப்படவில்லை என அவதானிக்கப்பட்டது.
மேலும், இந்த 200 ரூபா தினசரி கொடுப்பனவை ஊழியர் சேமலாப நிதி (EPF) மற்றும் ஊழியர் நம்பிக்கை நிதி (ETF) கணக்கீடுகளில் இருந்து தவிர்ப்பது தொடர்புடைய சட்டங்களுக்கு இணங்குகின்றதா என்றும் குழு கேள்வி எழுப்பியது. இந்தப் புரிந்துணர்வு ஒப்பந்தங்கள் மற்றும் அதனுடன் தொடர்புடைய விடயங்கள் குறித்து சட்டமா அதிபரின் ஆலோசனை பெறப்பட்டதா என வினவியபோது, அவ்வாறான ஆலோசனைகள் எதுவும் பெறப்படவில்லை என அதிகாரிகள் தெரிவித்தனர்.
அதன்படி, இவ்வாறான சிக்கல் நிறைந்த பகுதிகளைச் சீர்செய்து, கொடுப்பனவுகளை மேற்கொள்வதற்கு முறையான சட்ட ரீதியான அடிப்படையை உருவாக்குமாறு குழு அதிகாரிகளுக்கு வலியுறுத்தியது.
பாராளுமன்ற உறுப்பினர் கலாநிதி ஹர்ஷ டி சில்வா தலைமையில் கடந்த வாரம் (பெப்ரவரி 17) நடைபெற்ற இந்தக் கூட்டத்தில், பிரதி அமைச்சர்களான சதுரங்க அபேசிங்க, நிஷாந்த ஜயவீர மற்றும் பாராளுமன்ற உறுப்பினர்களான ரவி கருணாநாயக்க, அஜித் அலக்கோன் உள்ளிட்ட குழுவின் ஏனைய உறுப்பினர்களும் கலந்துகொண்டனர்.