சிறுவர்களுக்கு சமூக ஊடகங்களை தடை செய்யக் கோரி அவசர சட்டமூலம் சமர்ப்பிப்பு!

- நாடாளுமன்ற செயலாளர் நாயகத்திடம் உத்தியோகபூர்வ ஆவணங்கள் கையளிப்பு.

ஆஸ்திரேலியா மற்றும் பிரித்தானியாவை பின்பற்றி இலங்கையிலும் சமூக ஊடகங்களுக்கான குறைந்தபட்ச வயதெல்லைச் சட்டத்தை (Social Media Minimum Age Law) கொண்டு வர ஆயத்தங்கள் மேற்கொள்ளப்பட்டு வருகின்றன.

அதேவேளை, கருத்துச் சுதந்திரத்திற்கும் சிறுவர் பாதுகாப்பிற்கும் இடையிலான சமநிலையை சோதித்துப் பார்க்கும் புதிய அரசியல் திருப்புமுனையாக இது பார்க்கப்படுகிறது.

Minor சிறார்கள் சமூக ஊடகங்களைப் பயன்படுத்துவதைக் கட்டுப்படுத்தி, அதற்கான குறைந்தபட்ச வயதெல்லையை விதிப்பதற்கான 'சமூக ஊடக குறைந்தபட்ச வயதெல்லைச் சட்டமூலத்தை' (Social Media Minimum Age Bill) தனிநபர் முன்மொழிவாக நாடாளுமன்றத்தில் சமர்ப்பிக்க ஜனாதிபதி சட்டத்தரணியும் நாடாளுமன்ற உறுப்பினருமான பைஸர் முஸ்தபா நடவடிக்கை எடுத்துள்ளார்.

இது குறித்துத் தெரிவித்து, நாடாளுமன்ற உறுப்பினரினால் இன்றைய தினம் (24) நாடாளுமன்ற செயலாளர் நாயகத்திடம் உத்தியோகபூர்வ கடிதமும் அது தொடர்பான சட்டமூலமும் கையளிக்கப்பட்டுள்ளது.

இலங்கையில் சிறுவர்களை இலக்கு வைத்து இடம்பெறும் இணையவழிக் குற்றங்கள் (Cyber crimes), இணையவழிப் பாலியல் துஷ்பிரயோகங்கள் (Cyberbullying & Online Grooming) மற்றும் மன அழுத்தங்கள் என்பன வேகமாக அதிகரித்து வரும் பின்னணியிலேயே இந்த முன்மொழிவு கொண்டுவரப்பட்டுள்ளது.

குறிப்பாக, கடந்த 4 மாத காலப்பகுதிக்குள் 486 சிறுமிகள் துஷ்பிரயோகத்திற்கு உள்ளாக்கப்பட்டுள்ளதாக நேற்று (23) மகளிர் மற்றும் சிறுவர் விவகார அமைச்சு வெளியிட்ட அதிர்ச்சியூட்டும் தகவலும், இவ்வாறானதொரு சட்டக் கட்டமைப்பின் அவசியத்தை நோக்கி சமூகத்தின் அவதானத்தைத் திருப்புவதற்கு முதன்மைக் காரணியாக அமைந்துள்ளது.

சர்வதேச ரீதியில் எடுக்கப்பட்டுள்ள நடவடிக்கைகள்

உலகின் முன்னணி ஜனநாயக நாடுகள் ஏற்கனவே சிறார்களை சமூக ஊடகங்களில் இருந்து பாதுகாப்பதற்காக கடுமையான தடைகளையும் கொள்கைகளையும் அறிமுகப்படுத்தியுள்ளன.

• ஆஸ்திரேலியாவின் வயதுக் கட்டுப்பாடு: 16 வயதிற்குட்பட்ட சிறுவர்கள் சமூக ஊடகங்களைப் பயன்படுத்துவதை முற்றாகத் தடை செய்யும் வரலாற்றுச் சிறப்புமிக்க சட்டமூலத்தை ஆஸ்திரேலிய நாடாளுமன்றம் அண்மையில் நிறைவேற்றியது.

• பிரித்தானியாவின் 'Online Safety Act': சிறார்களுக்கு தீங்கு விளைவிக்கும் மற்றும் பாலியல் ரீதியான உள்ளடக்கங்களைக் காட்டும் சமூக ஊடக நிறுவனங்களுக்கு பில்லியன் கணக்கில் அபராதம் விதிக்கும் வகையில் ஐக்கிய இராச்சியம் கடுமையான சட்டங்களை இயற்றியுள்ளது.

• அமெரிக்க மாநிலச் சட்டங்கள்: புளோரிடா உள்ளிட்ட அமெரிக்காவின் சில மாநிலங்கள் 14 வயதிற்குட்பட்ட சிறுவர்கள் சமூக ஊடகக் கணக்குகளை (Accounts) ஆரம்பிப்பதை சட்டவிரோதமாக்கியுள்ளன.

டிஜிட்டல் உரிமைகள் தொடர்பான நிபுணர்கள் சுட்டிக்காட்டுவதற்கு அமைவாக, பிள்ளைகளின் டிஜிட்டல் பாதுகாப்பை உறுதிப்படுத்துவது (Digital Safety) இன்றியமையாதது என்ற போதிலும், அதனை நடைமுறைப்படுத்துவதில் பல நடைமுறைச் சிக்கல்கள் காணப்படுகின்றன. சமூக ஊடகங்கள் ஊடாக பிள்ளைகளின் "உண்மையான வயதை உறுதிப்படுத்தும் தொழில்நுட்பக் கட்டமைப்பு" (Age Verification Technology) இலங்கை போன்றவொரு நாட்டில் செயல்படுத்துவதில் உள்ள சிரமமே இதில் பிரதான பிரச்சினையாகும்.

அத்துடன், இதற்கு முன்னர் நிறைவேற்றப்பட்ட சர்ச்சைக்கரிய 'இணையவழி பாதுகாப்புச் சட்டம்' (OSA) ஊடாக இடம்பெற்றதைப் போன்று, சிறுவர் பாதுகாப்பை மறைப்பாகக் கொண்டு பொதுமக்களின் கருத்துச் சுதந்திரம் மற்றும் தகவலறியும் உரிமையைக் கட்டுப்படுத்துவதற்கு (Censorship) இந்தச் சட்டமூலம் ஓர் அரசியல் ஆயுதமாகப் பயன்படுத்தப்படுமா என்பது குறித்து எதிர்காலத்தில் நாடாளுமன்றத்தில் கடுமையான விவாதங்கள் உருவாகலாம் என எதிர்பார்க்கப்படுகிறது.