ஜி.கே.ஏ. சமிந்த குமார குலரத்ன, உடனடியாக நடைமுறைக்கு வரும் வகையில் பணியிடை நீக்கம் (වැඩ තහනම්) செய்யப்பட்டுள்ளார்.
நாடாளுமன்றத்தில் நேற்று (23) கூடிய நாடாளுமன்ற பணியாளர் ஆலோசனை சபை (Parliamentary Staff Advisory Committee) இந்தத் தீர்மானத்தை எடுத்துள்ளது.
சபாநாயகர், சபை முதல்வர், எதிர்க்கட்சித் தலைவர், நிதியமைச்சர் அல்லது அவரது பிரதிநிதி மற்றும் நாடாளுமன்ற செயலாளர் நாயகம் ஆகியோர் இந்த ஆலோசனை சபையின் உத்தியோகபூர்வ பிரதிநிதிகள் ஆவர். நேற்று நடைபெற்ற கூட்டத்தில் சபாநாயகர் (வைத்தியர்) ஜகத் விக்ரமரத்ன, சபை முதல்வர் அமைச்சர் பிமல் ரத்நாயக்க, எதிர்க்கட்சித் தலைவர் சார்பாக எதிர்க்கட்சியின் முதற்கோலாசர் கயந்த கருணாதிலக்க, நிதியமைச்சர் சார்பாக பிரதி நிதியமைச்சர் அனில் ஜயந்த மற்றும் நாடாளுமன்ற செயலாளர் நாயகம் குஷானி அனுஷா ரோஹணதீர ஆகியோர் கலந்துகொண்டனர்.
குற்றச்சாட்டுக்கு உள்ளாகியுள்ள பிரதிச் செயலாளர் நாயகம் ஜி.கே.ஏ. சமிந்த குமார குலரத்ன அழைக்கப்பட்டு, அவரிடம் விளக்கங்கள் கோரப்படாததால், அது குறித்து விசேட கவனம் செலுத்த வேண்டியதன் அவசியம் குறித்து பிரதி நிதியமைச்சர் அனில் ஜயந்த மற்றும் எதிர்க்கட்சியின் முதற்கோலாசர் கயந்த கருணாதிலக்க ஆகியோர் இதன்போது கருத்துத் தெரிவித்தனர்.
விசாரணைக்கு சவால்!
பிரதிச் செயலாளர் நாயகம் ஜி.கே.ஏ. சமிந்த குமார குலரத்னவை இலக்கு வைத்து நடத்தப்பட்ட "முதற்கட்ட விசாரணை", அரசியலமைப்புச் சட்டம் மற்றும் நிறுவப்பட்ட நிர்வாக விதிகளை பாரதூரமாக மீறும் செயல் என சில ஊடக அறிக்கைகளில் குறிப்பிடப்பட்டுள்ளது.
இந்தச் செயல்முறை வெறும் நிர்வாக ரீதியான நடவடிக்கை மட்டுமல்ல, பழிவாங்கும் நோக்கம் மற்றும் அதிகார துஷ்பிரயோகம் மூலம் முன்னெடுக்கப்பட்டது என்பதற்கு சான்றுகள் உள்ளதாக அந்த ஊடக அறிக்கைகள் தெரிவிக்கின்றன.
இதேவேளை, சபாநாயகரின் தனிப்பட்ட விடயமொன்றை பிரதிச் செயலாளர் நாயகம் வெளிப்படுத்தியுள்ளார் என்ற சந்தேகத்தின் அடிப்படையிலேயே அவருக்கு எதிராக இவ்வாறான நடவடிக்கை எடுக்கப்பட்டுள்ளதாக சில ஊடகங்கள் செய்தி வெளியிட்டுள்ளன.
எவ்வாறாயினும், தனது பணியிடை நீக்கத்திற்கு எதிராக பிரதிச் செயலாளர் நாயகம் நீதிமன்றத்தை நாட தீர்மானித்துள்ளதாக தகவல்கள் தெரிவிக்கின்றன.