'இதயம் வெடித்து' உயிரிழப்பது என்பது உண்மையா?

முடியாத சம்பவங்களின் போது பலர் இவ்வாறு கூறுவதைக் கேட்டிருப்போம். நாம் மருத்துவ மாணவர்களாக இருந்த காலத்தில், பெண் மருத்துவ மாணவர்கள் தமது காதலர்களுடனான பிரிவை நினைவுகூரும்போது இவ்வாறு கூறுவதை நாமும் கேட்டிருக்கிறோம்.

ஆனால், இந்த 'இதயம் வெடித்து இறப்பது' பற்றி நான் முதன்முதலில் சிறுவயதிலேயே கேள்விப்பட்டேன். சித்தார்த்த இளவரசன் கின்தக குதிரை மீது ஏறி அனோமா நதியைக் கடந்த பின், தனது உரிமையாளர் தன்னை விட்டு நிரந்தரமாகப் பிரிகிறார் என்பதை உணர்ந்த கின்தக குதிரை, அந்த ஆற்றங்கரையிலேயே இதயம் வெடித்து உயிரிழந்த சம்பவமே அதுவாகும்.

எவ்வாறாயினும், அதன் பின்னர் கின்தக குதிரை அதே பெயரில் ஒரு தெய்வமாகப் பிறப்பெடுத்ததாக பௌத்த இலக்கியங்களில் குறிப்பிடப்படுவது அக்காலத்தில் எமக்கு ஓரளவுக்கு ஆறுதலாக இருந்தது. இவ்வாறான சம்பவங்களை அடிப்படையாகக் கொண்டு மக்கள் மனதில் பதிந்த 'இதயம் வெடித்து இறப்பது' என்பது, எமது நாட்டு கலாச்சாரம் மற்றும் வரலாற்றில் கடும் துக்கம், அதிர்ச்சி அல்லது வேதனையைத் தாங்கிக்கொள்ள முடியாதபோது ஏற்படும் மரணங்களைக் குறிக்கப் பயன்படுத்தப்படும் ஒரு மிகவும் உணர்ச்சிகரமான சொல்லாடலாகும்.

சிங்கள இலக்கியங்களிலும் நாட்டுப்புறப் பாடல்களிலும் இது இடம்பெற்றுள்ள விதம் அதன் உணர்வுபூர்வமான தன்மையை வெளிப்படுத்துகிறது. இதயம் எதிர்கொள்ளும் தாங்கிக்கொள்ள முடியாத அழுத்தத்தையே இது குறிக்கிறது. "துக்கம் அதிகமாகி இதயம் வெடித்தது" போன்ற பிரயோகங்கள் ஊடாக, மன ரீதியான அதிர்ச்சி எவ்வாறு உடல் ரீதியான மரணத்திற்கு வழிவகுக்கிறது என்பது விவரிக்கப்படுகிறது.

மருத்துவ ரீதியான உண்மை: 'உடைந்த இதய நோய்க்குறி' (Broken Heart Syndrome)

பண்டைய காலத்தில் "இதயம் வெடித்து இறப்பது" எனக் குறிப்பிடப்பட்ட விடயம் நவீன மருத்துவ அறிவியலில் விவரிக்கப்பட்டுள்ளது என்பது பலருக்குத் தெரியாது. இது "உடைந்த இதய நோய்க்குறி" (Broken Heart Syndrome) அல்லது "டாகோட்சுபோ கார்டியோமயோபதி" (Takotsubo Cardiomyopathy) என்று அழைக்கப்படுகிறது.

பொதுவாக 'கார்டியோமயோபதி' என்பது இதயத் தசைகளில் ஏற்படும் ஒரு நோயாகும். இதில் இதயச் சுவர்களில் உள்ள தசைகள் தடிமனாகவோ, விரிவடையவோ அல்லது பலவீனமடையவோ கூடும். இதனால் உடலின் ஏனைய பாகங்களுக்கு இரத்தத்தை இறைக்கும் திறனை இதயம் இழக்கிறது. எனவே, இது "மன அழுத்த கார்டியோமயோபதி" (Stress Cardiomyopathy) என்றும் அழைக்கப்படுகிறது.

ஒருவருக்கு கடுமையான மன அதிர்ச்சி, கோபம் அல்லது துக்கம் ஏற்படும்போது, உடலில் அட்ரினலின் (Adrenaline) போன்ற ஹோர்மோன்கள் அதிகளவில் சுரப்பது இயற்கையானது. இது அந்த ந நபருக்கு ஏற்படும் உடல் மாற்றங்கள் மூலம் வெளிப்படையாகவும் தெரியும். டாகோட்சுபோ கார்டியோமயோபதி நிலையில், இதன் விளைவாக இதயத்தின் செயற்பாடு தற்காலிகமாக செயலிழக்கக்கூடும்.

இது வெளிப்புறமாக மாரடைப்பின் அறிகுறிகளையே காட்டும். அந்தச் சந்தர்ப்பத்தில் "இதயம் வெடிப்பது போன்ற" ஒரு கடுமையான வலி இதயத்தில் ஏற்படுவதால் இதற்கு அந்தப் பெயர் கிடைத்துள்ளது. இது மரணத்திற்குக்கூட வழிவகுக்கக்கூடிய ஒரு உண்மையான உடல் ரீதியான எதிர்வினையாகும்.

'டாகோட்சுபோ' (Takotsubo) என்றால் என்ன?

'டாகோட்சுபோ' என்பது ஒரு ஜப்பானியச் சொல்லாகும். ஜப்பானிய மொழியில் இது ஆக்டோபஸ் (Octopus) மீன்களைப் பிடிக்கப் பயன்படுத்தப்படும், குறுகிய கழுத்தைக் கொண்ட ஒரு மட்பாண்டத்தைக் குறிக்கும். இந்த நோயின் போது இதயத்தின் இடது கீழறை (Left Ventricle) வீங்கி, அந்தப் பாத்திரத்தின் வடிவத்தை எடுப்பதாலேயே இதற்கு இந்தப் பெயர் சூட்டப்பட்டது.

திடீரென ஏற்படும் கடுமையான உணர்ச்சிகரமான அதிர்ச்சி அல்லது உடல் ரீதியான சம்பவங்களால் இந்நோய் ஏற்படலாம். நெருக்கமானவரின் மரணம் அல்லது பிரிவு, தாங்க முடியாத கோபம், பயம் அல்லது அதிர்ச்சி போன்ற சந்தர்ப்பங்களிலும், பெரும் பணப் பரிசு (Lottery) போன்ற அதீத மகிழ்ச்சியான தருணங்களிலும், கடுமையான சத்திர சிகிச்சைகளின் போதும் இது ஏற்பட வாய்ப்புண்டு.

மாரடைப்பிற்கும் இதற்குமுள்ள வேறுபாடு

திடீரென ஏற்படும் கடுமையான நெஞ்சு வலி, மூச்சுத்திணறல், மயக்கம் போன்ற அறிகுறிகள் சாதாரண மாரடைப்பைப் போலவே இருந்தாலும், இது அதிலிருந்து முற்றிலும் வேறுபட்டது. சாதாரண மாரடைப்பு இதயத்திற்கு இரத்தம் செல்லும் குழாய்களில் ஏற்படும் தடையினால் ஏற்படுகிறது. ஆனால், டாகோட்சுபோ நிலையில் இரத்தக் குழாய்களில் அடைப்பு ஏற்படுவதில்லை. மாறாக, மன அழுத்த ஹோர்மோன்களால் இதயத் தசைகள் தற்காலிகமாகப் பலவீனமடைவதே இதற்குக் காரணமாகும்.

இதுவரை நடத்தப்பட்ட ஆய்வுகளின்படி, இந்நோயினால் பாதிக்கப்படுபவர்களில் 90% பேர் பெண்கள் எனத் தெரியவந்துள்ளது. அவர்களிலும் 50 வயதுக்கு மேற்பட்ட அல்லது மாதவிடாய் நின்ற (Menopause) பெண்களிடையே இது அதிகமாகக் காணப்படுகிறது. பதற்றம் (Anxiety) அல்லது மனச்சோர்வு (Depression) உள்ளவர்களுக்கு இதன் பாதிப்பு அதிகம்.

மேலும் பக்கவாதம் (Stroke) அல்லது வலிப்பு நோய் (Epilepsy) உள்ளவர்களுக்கும் இந்நோய் ஏற்படும் அபாயம் அதிகம். எவ்வாறாயினும், ஆண்கள் மற்றும் எவ்வித ஆபத்துக் காரணிகளும் இல்லாதவர்களுக்கும் இந்நோய் ஏற்படலாம் என்பதை நினைவில் கொள்ள வேண்டும்.

குணப்படுத்துதல் மற்றும் தவிர்த்தல்

டாகோட்சுபோ கார்டியோமயோபதியால் மரணம் ஏற்படுவதற்கான வாய்ப்பு மிகக் குறைவாகவே உள்ளது. சரியான மருத்துவ சிகிச்சையின் மூலம் சில வாரங்கள் அல்லது ஒரு மாதத்திற்குள் நோயாளி முழுமையாகக் குணமடைய முடியும். இதில் மருந்து சிகிச்சைகளுடன் மன அழுத்த மேலாண்மை (Stress Management) மற்றும் ஆலோசனைகளும் (Counseling) வழங்கப்படுகின்றன.

சாதாரண மாரடைப்பைப் போல இது இதயத் திசுக்களுக்கு நிரந்தரப் பாதிப்பை (Permanent Damage) ஏற்படுத்தாது என்பதால் குணமடைவது வேகமானது. எனினும், நெஞ்சு வலி ஏற்பட்டால் அது சாதாரண வலியா அல்லது இதயாபாத்தமா என்பதை வீட்டிலிருந்து தீர்மானிக்காமல், உடனடியாக வைத்தியசாலைக்குச் சென்று ECG அல்லது Angiogram பரிசோதனைகளைச் செய்துகொள்வது அவசியமாகும்.

தடுப்பதற்கான வழிகள்:

மன அழுத்த மேலாண்மை: இந்நோய்க்குக் காப்பு மன அழுத்தமே பிரதான காரணம் என்பதால் அதைக் கட்டுப்படுத்துவது அவசியம்.

தியானம் மற்றும் சுவாசப் பயிற்சிகள்: ஆழமான சுவாசம் (Deep Breathing) மற்றும் யோகா மூலம் உடலில் அட்ரினலின் அளவைக் கட்டுப்படுத்தலாம்.

சமூக உறவுகள்: நண்பர்கள் மற்றும் குடும்பத்தினருடன் வெளிப்படையாகப் பேசி மன பாரத்தைக் குறைத்துக்கொள்ள வேண்டும்.

ஆரோக்கியமான வாழ்க்கை முறை: நடைப்பயிற்சி, சரிவிகித உணவு மற்றும் போதிய உறக்கம் (7-8 மணிநேரம்) மன அழுத்த ஹோர்மோன்களைக் குறைக்க உதவும்.

இதயம் வெடித்து இறக்கும் கதையின் இலக்கிய, கலாச்சார மற்றும் தத்துவப் பின்னணியையும், அதன் பின்னால் உள்ள அறிவியல் யதார்த்தத்தையும் புரிந்துகொள்வது உங்களுக்கு மிகவும் பயனுள்ளதாக இருக்கும்.

(மருத்துவப் பேராசிரியர் நாமல் விஜயசிங்க -
இதய நோய் நிபுணர்,
கொத்தலாவல பாதுகாப்பு பல்கலைக்கழகம்)