பிரதிப் பொலிஸ் மா அதிபர் ஒருவரின் தலைமையின் கீழ் விசேட குழுவொன்று நியமிக்கப்படவுள்ளதாக ஜனாதிபதி அநுர குமார திசாநாயக்க அறிவித்துள்ளார்.
அம்பாறை மாவட்டச் செயலகத்தில் நடைபெற்ற விசேட மாவட்ட ஒருங்கிணைப்புக் குழுக் கூட்டத்தில் கலந்துகொண்டு உரையாற்றும் போதே ஜனாதிபதி இந்த முக்கிய தீர்மானத்தை வெளியிட்டார்.
அரசியல் அதிகாரத்தினால் நில ஆக்கிரமிப்பு
இது குறித்து ஜனாதிபதி மேலும் கருத்துத் தெரிவிக்கையில்:
"கிழக்கு மாகாணத்தில் கடந்த காலங்களில் சிலர் தங்களின் அரசியல் அதிகாரத்தைப் பயன்படுத்தி சட்டவிரோதமான முறையில் காணிகளை ஆக்கிரமித்துள்ளனர். இந்த நில ஆக்கிரமிப்பு காரணமாகவே கிழக்கு மாகாணத்தில் தற்போது பல்வேறு சமூக மற்றும் நிர்வாகப் பிரச்சினைகளும், தேவையற்ற முரண்பாடுகளும் தோற்றம் பெற்றுள்ளன."
இதன் காரணமாகவே, இனிவரும் காலங்களில் அரசியல் தலையீடுகளின்றி காணி விவகாரங்களைக் கையாள்வதற்கும், காணிகளைப் பாதுகாப்பதற்கும் பொலிஸ் உயராதிகாரியின் கீழ் இந்த விசேட குழு நியமிக்கப்படவுள்ளதாக அவர் சுட்டிக்காட்டினார்.
அம்பாறை மாவட்டத்தில் நீண்டகாலமாக நிலவி வரும் ஆசிரியர் பற்றாக்குறை மற்றும் கல்வித்துறை சார்ந்த பிரச்சினைகள் குறித்தும் இந்த கூட்டத்தில் விரிவாக ஆராயப்பட்டது.
இது குறித்துப் பேசிய ஜனாதிபதி, கல்வி அலுவலகங்கள் மற்றும் பிரதேச செயலகங்கள் போன்ற அரச நிர்வாகக் கட்டமைப்புகளை உருவாக்குவதும், அவற்றுக்கான எல்லைகளை நிர்ணயிப்பதும் முற்றிலும் ஒரு நிர்வாகச் செயற்பாடே அன்றி, அது அரசியல்வாதிகளின் அரசியல் பணி அல்ல என்பதைத் திட்டவட்டமாகத் தெரிவித்தார்.
அரசியல் தேவைகளுக்காக நிர்வாகக் கட்டமைப்புகளில் கைவைக்கக் கூடாது எனவும், மக்களின் தேவைக்கேற்ப தகுதி மற்றும் சரியான நிர்வாக நடைமுறைகளைப் பின்பற்றியே ஆசிரியர் இடமாற்றங்கள் மற்றும் வெற்றிடங்கள் நிரப்பப்பட வேண்டும் எனவும் ஜனாதிபதி அநுர குமார திசாநாயக்க, அதிகாரிகளுக்கு மேலும் அறிவுறுத்தினார்.