-
64 வருட கால அமெரிக்க பொருளாதாரத் தடைகளால் உருக்குலைந்த பொருளாதாரத்தை மீட்க 176 அம்சங்களைக் கொண்ட வரலாற்றுச் சிறப்புமிக்க புதிய சட்டமூலம் கியூபா நாடாளுமன்றத்தில் ஏகமனதாக நிறைவேற்றம்.
-
1959 கம்யூனிச புரட்சியின் பின்னர் முதன்முறையாக தனியார் துறை மற்றும் வெளிநாட்டு முதலீடுகளுக்கு கதவுகளை முழுமையாகத் திறந்தது கியூபா அரசு.
-
அரசாங்கத்தின் 80% பொருளாதார ஏகபோகம் முறியடிப்பு; தனியார் நிறுவனங்கள் 100 க்கும் மேற்பட்ட ஊழியர்களை வேலைக்கு அமர்த்த அனுமதி.
சுமார் 64 வருடங்களுக்கும் மேலாக அமெரிக்காவினால் விதிக்கப்பட்டுள்ள கடுமையான பொருளாதாரத் தடைகள் (US Sanctions) மற்றும் மிக மோசமான எரிபொருள் தட்டுப்பாடு காரணமாக மிகக் கடுமையான பொருளாதார நெருக்கடியை எதிர்கொண்டுள்ள கியூபா, தனது பாரம்பரிய மத்திய திட்டமிடல் சோசலிச கட்டமைப்பை (Centralized Socialist Model) உடைத்தெறிந்துவிட்டு, சந்தைப் பொருளாதாரத்தை நோக்கி பயணிப்பதற்கான வரலாற்று முக்கியத்துவம் வாய்ந்த 176 அம்சங்களை உள்ளடக்கிய சீர்திருத்த சட்டமூலத்தை கியூபா நாடாளுமன்றத்தில் (National Assembly) ஏகமனதாக நிறைவேற்றியுள்ளது.
1959ஆம் ஆண்டு பிடெல் காஸ்ட்ரோவின் (Fidel Castro) கம்யூனிச புரட்சிக்குப் பின்னர், நாட்டின் ஒட்டுமொத்த உற்பத்தி மற்றும் விநியோகத்தில் அரசாங்கம் தன் வசம் வைத்திருந்த 80 சதவீத பொருளாதார ஏகபோக உரிமை (State Monopoly) இதன் மூலம் முழுமையாக முடிவுக்கு வருகிறது.
இதுவரை வெறும் சிறு மற்றும் நடுத்தர அளவிலான வணிகங்களுக்கு (SMEs) மாத்திரம் மட்டுப்படுத்தப்பட்டிருந்த கியூபாவின் தனியார் துறைக்கு, இனிவரும் காலங்களில் 100 க்கும் மேற்பட்ட ஊழியர்களைக் கொண்டு பெரிய அளவிலான நிறுவனங்களை உருவாக்கவும், அரச நிறுவனங்களுடன் நேரடியாகப் போட்டியிடவும் எவ்வித கட்டுப்பாடுகளுமற்ற முழு அதிகாரம் வழங்கப்பட்டுள்ளது. இது சீனா மற்றும் வியட்நாம் ஆகிய நாடுகள் வெற்றிகரமாகப் பின்பற்றிய "சோசலிச சந்தைப் பொருளாதார" (Socialist Market Economy) மாதிரிக்கு முற்றிலும் ஒப்பானதாகும்.
புதிய சட்டமூலத்தின் 4 முக்கிய சீர்திருத்தங்கள்
1. வெளிநாட்டு மூலதனம் மற்றும் நிதிச் சுதந்திரம்
வெளிநாட்டு முதலீட்டாளர்கள் கியூபாவில் புதிய வணிகங்களைத் தொடங்கும்போது, அவர்கள் கட்டாயமாக அரசாங்கத்துடன் கூட்டுச் சேர வேண்டும் (Joint Venture) என்ற பல தசாப்த கால பழைய நிபந்தனை முற்றாக நீக்கப்பட்டுள்ளது. அத்துடன், கியூப குடிமக்கள் தனிப்பட்ட ரீதியில் வெளிநாட்டு நாணயக் கணக்குகளைப் (Foreign Currency Accounts) பேணுவதற்கும், அவற்றைப் பயன்படுத்துவதற்குமான முழு சுதந்திரமும் வழங்கப்பட்டுள்ளது.
2. அரச நிறுவனங்களை தனியார்மயமாக்கல்
போக்குவரத்து, மொத்த வர்த்தகம் மற்றும் சேவைத் துறைகள் (Services Sector) போன்ற முக்கிய துறைகள் அனைத்தும் வணிக நிறுவனங்களாக மாற்றப்பட்டு, அவற்றின் பங்குகளைக் (Shares) கொள்முதல் செய்வதற்கான வாய்ப்பு தனியார் துறைக்கு வழங்கப்பட்டுள்ளது. மேலும், கியூப குடிமக்கள் ஒன்றுக்கும் மேற்பட்ட வணிகங்களை சொந்தமாக வைத்திருக்கவும், ஏனைய நிறுவனங்களின் பங்குகளை வாங்குவதற்கும் சட்டப்பூர்வ அனுமதி அளிக்கப்பட்டுள்ளது.
3. எரிசக்தி மற்றும் விவசாயத் துறைக்கான சலுகைகள்
பெட்ரோலியம், புதுப்பிக்கத்தக்க எரிசக்தி (Renewable Energy) மற்றும் சூரிய சக்தி பேனல்கள் (Solar Panels) போன்ற துறைகளில் வெளிநாட்டு நிறுவனங்கள் நேரடியாக முதலீடு செய்வதற்கான கதவுகள் திறக்கப்பட்டுள்ளதுடன், சூரிய சக்தி பேனல் இறக்குமதிகளுக்குப் பாரிய வரிச் சலுகைகளும் அறிவிக்கப்பட்டுள்ளன. விவசாய நிலங்கள் தொடர்ந்து அரசின் கட்டுப்பாட்டில் இருந்தாலும், காட வளர்ப்பு, விவசாய சுற்றுலா (Agri-tourism) மற்றும் புகையிலைச் செய்கை ஆகியவற்றில் தனியார் துறையினர் முதலீடு செய்ய தாராளமாக அனுமதி வழங்கப்பட்டுள்ளது.
4. அரசாங்க சொத்துக்களை நேரடியாக விற்பனை செய்தல்
கடந்த 2011ஆம் ஆண்டு முதல் மக்களுக்குப் பகுதி அளவிலான தனியார் வீட்டு உரிமை வழங்கப்பட்டிருந்த போதிலும், பெருமளவிலான சொத்துக்கள் அனைத்தும் அரசாங்கத்திற்கே சொந்தமாக இருந்தன. ஆனால், புதிய சட்டத்தின் கீழ் நாட்டின் சுற்றுலாத்துறையை (Tourism Sector) வேகமாக மேம்படுத்துவதற்காக, அரசாங்கத்திற்குச் சொந்தமான பிரம்மாண்ட சொத்துக்களை தனியார் துறையினர் நேரடியாக விலைக்கு வாங்குவதற்கான வரலாற்றுச் சிறப்புமிக்க சந்தர்ப்பம் உருவாக்கப்பட்டுள்ளது.
அமெரிக்காவிற்கு கியூப அதிபர் விடுத்துள்ள நேரடிச் செய்தி
இப்புதிய வரலாற்றுச் சட்டமூலம் நாடாளுமன்றத்தில் நிறைவேற்றப்பட்டதன் பின்னர் உரையாற்றிய கியூப அதிபர் மிகுவேல் டயஸ்-கனெல் (Miguel Díaz-Canel), நாட்டில் நிலவும் தேவையற்ற அரச அதிகாரத்துவத்தையும் (Bureaucracy) மந்தகதியிலான நிர்வாக முறைகளையும் முற்றாக ஒழித்து, சீனா மற்றும் வியட்நாம் நாடுகளின் வழிமுறைகளைப் பின்பற்றி மிக விரைவாக நாட்டின் ஸ்திரமான மேக்ரோ-பொருளாதாரத்தை (Macroeconomic Stability) கட்டியெழுப்புவோம் என உறுதியளித்தார்.
அத்துடன் அமெரிக்காவிற்கு உத்தியோகபூர்வமாக நேரடி எச்சரிக்கை கலந்த செய்தியொன்றை விடுத்துள்ள அதிபர்:
"அமெரிக்காவிற்கு உண்மையில் கியூப மக்கள் மீது அக்கறை இருக்குமாயின், முதலில் எங்களை சுதந்திரமாக வாழ விடுங்கள்! எமது நாட்டு மக்கள் வாழ்வதற்குத் தேவையான அத்தியாவசிய மருந்துகள், எரிபொருட்களை இறக்குமதி செய்வதற்கும், உலக நாடுகளுடன் நாங்கள் சாதாரண சுமுகமான உறவுகளைப் பேணுவதற்கும் முட்டுக்கட்டையாக நீங்கள் விதித்துள்ள அனைத்து மனிதாபிமானமற்ற தடைகளையும் உடனடியாக நீக்குங்கள்!"
என மிகக் கடுமையான தொனியில் அமெரிக்காவைச் சாடியுள்ளார்.