நாணயமாக (Worst Performing Currency) இலங்கை ரூபாய் பதிவாகியுள்ளதாக உலகப் புகழ்பெற்ற நிதி மற்றும் வணிக ஊடகமான 'புளூம்பெர்க்' (Bloomberg) உத்தியோகபூர்வமாக அறிக்கை விடுத்துள்ளது.
கடந்த சில நாட்களாக அமெரிக்க டாலருக்கு நிகரான இலங்கை ரூபாயின் மதிப்பு தொடர்ந்து சரிவைச் சந்தித்து வருவதுடன், வரும் நாட்களிலும் இந்த வீழ்ச்சி மேலும் தொடரக்கூடும் என அந்த அறிக்கையில் எச்சரிக்கப்பட்டுள்ளது.
சர்வதேச நிதியியல் ஊடகமொன்று இலங்கையின் நாணய நிலவரத்தை இவ்வாறு விவரித்துள்ளமை நாட்டின் பொருளாதார ரீதியாக உன்னிப்பாகக் கவனிக்கப்பட வேண்டிய ஒரு தீவிர சூழ்நிலையாகப் பார்க்கப்படுகிறது.
ரூபாய் வீழ்ச்சிக்கான பிரதான காரணங்கள்:
குறுகிய காலப்பகுதிக்குள் நாணயத்தின் மதிப்பு இவ்வளவு வேகமாக சரிவடைவதற்குப் பின்வரும் முக்கிய பொருளாதாரக் காரணிகள் செல்வாக்குச் செலுத்தியுள்ளதாகப் பொருளாதார நிபுணர்கள் சுட்டிக்காட்டுகின்றனர்:
-
டாலருக்கான தேவை அதிகரிப்பு: இறக்குமதி நடவடிக்கைகள் மற்றும் வெளிநாட்டுக் கடன்களை மறுசெலுத்துகை செய்வதற்காக உள்நாட்டு சந்தையில் திடீரென அமெரிக்க டாலருக்கான தேவை (Demand) அதிகரித்துள்ளமை.
-
உலகளாவிய அரசியல் மற்றும் பொருளாதார நெருக்கடிகள்: உலகச் சந்தையில் மசகு எண்ணெய் (Crude Oil) விலையேற்றம் மற்றும் மத்திய கிழக்கில் நிலவும் போர் பதற்றம் காரணமாக முதலீட்டாளர்கள் பாதுகாப்பான முதலீடாகக் கருதி டாலரை நோக்கி நகர்கின்றமை.
-
மத்திய வங்கி கொள்கைகள்: வட்டி வீதங்கள் மற்றும் வெளிநாட்டு நாணய மாற்றுச் சந்தையைக் கையாள்வதில் எடுக்கப்படும் சில நிதிக்கொள்கை உத்திகள்.
"ரூபாயின் வீழ்ச்சி தற்காலிகமானது"
இதேவேளை, நேற்று (20) மட்டக்களப்பு மாவட்ட விசேட அபிவிருத்தி வேலைத்திட்டத்தில் கலந்துகொண்டு உரையாற்றிய ஜனாதிபதி அනුර குமார திசாநாயக்க, ரூபாயின் இந்த வீழ்ச்சியானது தற்காலிகமானது (Short-term) என்றும், இதற்கு அனைவரும் தைரியமாக முகம் கொடுக்க வேண்டும் என்றும் கேட்டுக்கொண்டார்.
மத்திய கிழக்கு பிராந்தியத்தில் ஏற்பட்டுள்ள யுத்த சூழ்நிலையே இலங்கைக்குள் மீண்டும் ஒரு டாலர் நெருக்கடி ஏற்படுவதற்குக் பிரதான காரணமாக அமைந்துள்ளது எனச் சுட்டிக்காட்டிய ஜனாதிபதி, இந்நிலைமையைக் கட்டுப்படுத்துவது மற்றும் அதற்கான ஆலோசனைகளைப் பெற்றுக்கொள்வது குறித்து சர்வதேச நாணய நிதியத்துடன் (IMF) ஏற்கனவே கலந்துரையாடல்களை மேற்கொண்டுள்ளதாகவும் தெரிவித்தார்.
இந்த நெருக்கடி காரணமாக இலங்கைக்குள் மீண்டும் ஒருமுறை பேரழிவை ஏற்படுத்தும் வகையிலான பொருளாதாரச் சரிவு ஏற்படுவதற்குத் தான் ஒருபோதும் இடமளிக்கப் போவதில்லை என ஜனாதிபதி இங்கு உறுதியளித்தார்.
அத்துடன், தற்போதைய நாட்டின் பொருளாதார மேலாண்மையானது சர்வதேச நாணய நிதியத்தின் நீடிக்கப்பட்ட கடன் வசதித் திட்டத்துடன் (EFF) பிணைக்கப்பட்டுள்ளதால், அவர்களின் பரிந்துரைகளுக்கு உட்பட்டே அரசாங்கம் பொறுப்புடன் செயலாற்றும் என்றும் ஜனாதிபதி அநுர குமார திசாநாயக்க மேலும் தெளிவுபடுத்தியுள்ளார்.
ரூபாய் வீழ்ச்சியைக் கட்டுப்படுத்த அரசாங்கம் கடுமையான முடிவுகளை எடுக்க வேண்டும்!
கொழும்பு: இலங்கை ரூபாயின் வீழ்ச்சியானது எரிபொருள், எரிவாயு, மருந்துப் பொருட்கள் மற்றும் அத்தியாவசிய உணவுப் பொருட்களின் விலையேற்றம் ஊடாக சாதாரண பொதுமக்களை நேரடியாகப் பாதிக்கும் என முன்னாள் நிதியமைச்சரும் நாடாளுமன்ற உறுப்பினருமான ரவி கருணாநாயக்க தெரிவித்துள்ளார்.
ஜனாதிபதி அනුர குமார திசாநாயக்க குறிப்பிடுவது போல, இந்த நாணய வீழ்ச்சியானது ஒரு "குறுகிய கால" பின்னடைவாக மட்டுமே அமைய வேண்டுமாயின், அரசாங்கம் பின்வரும் மூன்று முக்கிய மூலோபாயங்களை உடனடியாகப் பின்பற்ற வேண்டும் என அவர் சுட்டிக்காட்டியுள்ளார்:
-
சர்வதேச நாணய நிதியத்தின் (IMF) நிதியுதவிகள் மற்றும் ஒத்துழைப்புகளை எவ்வித தடையுமின்றி தொடர்ச்சியாகப் பெற்றுக்கொள்ளல்.
-
வெளிநாட்டுத் தொழிலாளர்களின் பணப்பரிமாற்றங்கள் (Remittances) மற்றும் சுற்றுலாத்துறை மூலமான வருமானத்தை ஸ்திரமான மட்டத்தில் பேணுதல்.
-
அத்தியாவசியமற்ற இறக்குமதிகளை (Non-essential imports) உடனடியாகக் கட்டுப்படுத்துவதற்கான கடுமையான நடவடிக்கைகளை எடுத்தல்.
"நாளை அழுத்தம் வரும்போது முடிவுகளை மாற்றக் கூடாது"
பொருளாதாரம் என்பது மிகவும் சிக்கலான ஒரு விடயமாகும் என விவரித்த ரவி கருணாநாயக்க, இவ்வாறானதொரு இக்கட்டான சூழ்நிலையில் நாட்டின் அரசியல் ஸ்திரத்தன்மையும், சரியான நிதிக்கொள்கைகளும் தேசத்தின் எதிர்காலத்தைத் தீர்மானிக்கும் மிக முக்கிய காரணிகளாக அமையும் என வலியுறுத்தினார்.
இது குறித்து அவர் மேலும் கருத்துத் தெரிவிக்கையில்;
"இந்த இக்கட்டான தருணத்தில் ஜனாதிபதி எவ்வித அச்சமுமின்றி தீர்க்கமான, நேரடியான முடிவுகளை (Straight decisions) எடுக்க வேண்டும். இன்று எடுக்கப்படும் கொள்கை ரீதியான முடிவுகளுக்கு நாளை மக்கள் மத்தியிலிருந்தோ அல்லது அரசியல் தரப்பிலிருந்தோ அழுத்தங்கள் வரும் போது, எடுத்த முடிவுகளை மீண்டும் பின்னோக்கி மாற்றியமைக்கக் கூடாது. திட்டமிட்ட இலக்கின் படியே அரசாங்கம் முன்னோக்கி நகர வேண்டும்."
ஆசிய நாடுகளிடமிருந்து இலங்கை கற்றுக்கொள்ள வேண்டும்
தற்போதைய உலகளாவிய பொருளாதார நெருக்கடிக்கு முகம் கொடுப்பதற்காக இந்தியா உட்பட பல ஆசிய நாடுகள் ஏற்கனவே மிகவும் கடுமையான கொள்கை ரீதியான முடிவுகளை (Stringent policy decisions) எடுத்துள்ளதை ரவி கருணாநாயக்க சுட்டிக்காட்டினார்.
எனவே, அண்டை நாடுகள் இந்த நெருக்கடிகளைக் கையாள்வதற்காகப் பின்பற்றும் வெற்றிகரமான பொருளாதார உத்திகளைப் பார்த்து, இலங்கை அரசாங்கமும் பாடம் கற்றுக்கொண்டு அதற்கேற்பச் செயல்பட வேண்டும் என அவர் மேலும் வலியுறுத்தியுள்ளார்.