எரிபொருள் விநியோகத்தை முறைப்படுத்துவதற்கான QR குறியீடு (QR Code) முறைமையைக் காலவரையறையின்றி தொடர இலங்கை தீர்மானித்துள்ளது.
மத்திய கிழக்கு பிராந்தியத்தில் ஏற்பட்டுள்ள மோதல் நிலைமையைத் தொடர்ந்து, எரிபொருள் சேமிப்பு நடவடிக்கையாக இலங்கை அரசாங்கம் மீண்டும் QR குறியீடு முறைமையை அறிமுகப்படுத்தியது.
தற்போது, உலகளாவிய எரிபொருள் போக்குவரத்தில் சுமார் 20 சதவீத பங்களிப்பை வழங்கும் ஹோர்முஸ் நீரிணை (Strait of Hormuz) பகுதியில் நிலவும் தளம்பல் நிலைமை, விநியோகச் சங்கிலியில் பாதிப்பை ஏற்படுத்தியுள்ளதுடன் விலைகளிலும் மாற்றங்களை உருவாக்கியுள்ளது.
எரிபொருள் சந்தையின் எதிர்காலம்:
உலகளாவிய சூழ்நிலைகளுக்கு மத்தியில் இலங்கையின் எரிபொருள் சந்தையின் எதிர்காலம் குறித்து வினவியபோது, இலங்கை கனிம எண்ணெய் கூட்டுத்தாபனத்தின் (CPC) தலைவர் டி.ஜே. ராஜகருண, உலகளாவிய நெருக்கடி இன்னும் முடிவுக்கு வரவில்லை என்று தெரிவித்தார்.
எனவே, தற்போதுள்ள QR குறியீடு முறைமையின் கீழ் சில்லறை எரிபொருள் விநியோகம் காலவரையறையின்றி தொடரும் என அவர் குறிப்பிட்டார்.
உலகளாவிய விநியோகத் தடைகள் இருந்தபோதிலும், உள்நாட்டுச் சந்தையில் எரிபொருள் கிடைப்பதை இலங்கை உறுதி செய்துள்ளது. எவ்வாறாயினும், தற்போதைய QR முறைமையில் தேவைக்கேற்ப மாற்றங்கள் செய்யப்படும் என ராஜகருண மேலும் கூறினார்.
எதிர்காலத் திட்டங்கள்:
"நாங்கள் கொடுப்பனவுகளில் டிஜிட்டல் மாற்றத்தை (Digital transformation) நோக்கி நகர விரும்புகிறோம். அத்துடன், நிலைமைகளைப் பொறுத்து பல்வேறு வகையான வாகனங்களுக்கு வழங்கப்படும் எரிபொருளின் அளவையும் திருத்தம் செய்வோம். சமூகத்தின் பல்வேறு பிரிவினருக்கான எரிபொருள் மானியங்கள் குறித்தும் பரிசீலிக்கப்படும். இந்த அனைத்து நோக்கங்களுக்காகவும் QR குறியீடு முறைமை நீண்ட காலத்திற்குப் பராமரிக்கப்படும்" என அவர் தெரிவித்தார்.
சாத்தியமான எரிபொருள் நெருக்கடியைக் கருத்திற்கொண்டு, போதுமான கையிருப்புகளைப் பராமரிப்பதற்காக இந்தியா, சீனா மற்றும் ரஷ்யா ஆகிய நாடுகளிடம் இருந்து எரிபொருள் விநியோகத்தை அரசாங்கம் கோரியுள்ளமை குறிப்பிடத்தக்கது.