உச்ச நீதிமன்றம் வழங்கிய தீர்ப்பானது 'பெரும் ஏமாற்றமளிப்பதாக' அமெரிக்க ஜனாதிபதி டொனால்ட் ட்ரம்ப் வர்ணித்துள்ளார். அத்துடன், அனைத்து இறக்குமதிகளுக்கும் 10 சதவீத புதிய வரியினை விதிக்கப்போவதாகவும் அவர் அறிவித்துள்ளார்.
அவசரகாலச் சட்டத்தைப் பயன்படுத்தி ஜனாதிபதி தன்னிச்சையாக வரி விதிக்க முடியாது எனத் தெரிவித்து, 6-3 என்ற நீதிபதிகளின் பெரும்பான்மை வாக்குகளின் அடிப்படையில் இந்தத் தீர்ப்பு வெள்ளிக்கிழமை வழங்கப்பட்டது.
தேசிய அவசரகால நிலைமைகளுக்காக உருவாக்கப்பட்ட சட்டத்தின் கீழ் இத்தகைய பாரிய வரிகளை விதிப்பது ஜனாதிபதியின் அதிகார வரம்பிற்கு அப்பாற்பட்டது எனவும், இறக்குமதி வரிகளுக்கு காங்கிரஸின் (அமெரிக்க நாடாளுமன்றம்) அனுமதி அவசியம் எனவும் நீதிமன்றம் சுட்டிக்காட்டியுள்ளது.
இந்தத் தீர்ப்பானது ட்ரம்பின் 'விடுதலை நாள்' (Liberation Day) வரி விதிப்புகளுக்கு மாத்திரம் பொருந்தும் என்பதுடன், குறிப்பிட்ட சில நாடுகளுக்கு எதிராக விதிக்கப்பட்ட ஏனைய வரிகளில் இது மாற்றத்தை ஏற்படுத்தாது எனக் கூறப்படுகிறது.
நீதிமன்றத்தின் இந்தத் தீர்ப்பினைக் கடுமையாகச் சாடியுள்ள ஜனாதிபதி ட்ரம்ப், குறித்த வரிகளை மீண்டும் நடைமுறைப்படுத்துவதற்கான மாற்று வழிகளை ஆராயப்போவதாகக் குறிப்பிட்டுள்ளார். எனினும், இதற்கான சட்ட ரீதியான நகர்வுகள் குறித்த விரிவான தகவல்கள் எதனையும் அவர் வெளியிடவில்லை.
ஜனாதிபதி ட்ரம்பின் வர்த்தகக் கொள்கைகளுக்கு இந்தத் தீர்ப்பு பெரும் பின்னடைவாகக் கருதப்படுகின்ற போதிலும், புதிதாக அறிவிக்கப்பட்டுள்ள 10 சதவீத வரியினை அமுல்படுத்துவது குறித்த மேலதிக விபரங்களை வெள்ளை மாளிகை இன்னும் உத்தியோகபூர்வமாக வெளியிடவில்லை என்பது குறிப்பிடத்தக்கது.