நிலக்கரி டெண்டர் விவகாரத்தால் அரசாங்கத்துக்கு கறைபடிந்ததா?

சந்தேகத்தையும் ஏற்படுத்திய நுரைச்சோலை லக்விஜய மின் உற்பத்தி நிலையத்தின் நிலக்கரி டெண்டர் தொடர்பாக, நேற்று (20) நாடாளுமன்றத்தில் அரசாங்கத் தரப்பிலிருந்து பதில்கள் வழங்கப்பட்டன.

நிலக்கரி டெண்டர் ஊழல் தொடர்பாக நாடாளுமன்றத்தில் முதன்முதலில் அறிக்கை வெளியிட்டவர் பொதுஜன பெரமுன நாடாளுமன்ற உறுப்பினர் டி.வி. சானக்க ஆவார். அதனைத் தொடர்ந்து, ஐக்கிய மக்கள் சக்தியின் நாடாளுமன்ற உறுப்பினர்களான அஜித் பி. பெரேரா மற்றும் எஸ்.எம். மரிக்கார் ஆகியோரும் நிலக்கரி டெண்டரில் ஊழல் நடந்துள்ளதாகக் கூறி நாடாளுமன்றத்தில் பெரும் பரபரப்பை ஏற்படுத்தினர்.

இதற்கிடையில், நிலக்கரி டெண்டரில் ஊழல் நடந்துள்ளதாகவும், இது குறித்து எந்தவொரு ஊடக அலைவரிசையிலும் பகிரங்க விவாதத்திற்கு வருமாறும் டி.வி. சானக்க, மின்சக்தி மற்றும் எரிசக்தி அமைச்சர் குமார ஜயகொடிக்கு சவால் விடுத்தார். உங்களால் முடிந்தால் இந்த ஊழல் கதையை நாடாளுமன்றத்திற்கு வெளியே வந்து கூறுமாறு அமைச்சர் சானக்க எம்.பி.யிடம் தெரிவித்தார்.

ராஜபக்ஷக்களின் நிறுவனம் கூட மேல்முறையீடு செய்யவில்லை...

கடந்த மூன்று ஆண்டுகளாக எந்தவித டெண்டர் கோரலும் இன்றி, டி.வி. சானக்க எம்.பி.யுடனும் தொடர்புடைய ராஜபக்ஷக்களின் நெருங்கிய நண்பர் ஒருவருக்கு, அமைச்சரவை அங்கீகாரத்தின் அடிப்படையில் மாத்திரம் ரஷ்யாவிலிருந்து நிலக்கரி இறக்குமதி செய்ய ஆர்டர்கள் வழங்கப்பட்டிருந்ததாகவும், அந்த நிலக்கரி இறக்குமதி நிறுவனம் தகுதியற்ற ஒரு நிறுவனம் என்றும் அமைச்சர் தெரிவித்தார்.

அதேபோல், இம்முறை டெண்டர் வழங்கப்பட்டது 2023 ஆம் ஆண்டிற்கு முன்னர் நிலக்கரி கொள்வனவு செய்யப்பட்ட முறையான டெண்டர் நடைமுறையின் அனைத்து விவரக்குறிப்புகளுக்கும் (Specifications) உட்பட்டே என்று கூறிய அமைச்சர், எந்த நிபந்தனைகளும் தளர்த்தப்படவில்லை என்று உறுதியளித்தார்.

வரலாற்றில் அதிகளவான டெண்டர் விண்ணப்பதாரர்கள் இந்த டெண்டருக்காக ஏலம் கோரியுள்ளதைச் சுட்டிக்காட்டிய அமைச்சர், 2023 முதல் இந்த டெண்டரைப் பெற்று வந்த ராஜபக்ஷக்களுக்கு நெருக்கமான நிறுவனம், இம்முறை அந்த டெண்டரைப் பெறுவதற்கு முடிந்த அனைத்து முயற்சிகளையும் மேற்கொண்ட போதிலும், அவர்கள் முன்வைத்த அதிக விலை காரணமாக அவர்கள் நிராகரிக்கப்பட்டனர் என்பதையும் வெளிப்படுத்தினார்.

டெண்டரைப் பெற்ற நிறுவனத்திற்கு எதிராக ராஜபக்ஷக்களின் அந்த நிறுவனம் கூட எந்த மேல்முறையீட்டையும் தாக்கல் செய்யவில்லை என்று அமைச்சர் சுட்டிக்காட்டினார். தாம் பிரதிநிதித்துவப்படுத்தும் ஆட்சியின் நெருங்கிய நண்பருக்கு நிலக்கரி டெண்டர் கிடைக்காத வேதனையின் முனகலையே இந்த நாடாளுமன்ற உறுப்பினரிடம் கேட்பதாக அமைச்சர் கூறினார்.

இந்த டெண்டர் ஊடாகக் கொண்டுவரப்பட்டது தரம் குறைந்த நிலக்கரி அல்ல என்றும் அமைச்சர் வலியுறுத்தினார். நிலக்கரிக்கான 09 விவரக்குறிப்புகளில் 06 விவரக்குறிப்புகளைக் கேள்விக்குள்ளாக்கப்படும் நிலக்கரித் தொகுதி பூர்த்தி செய்துள்ளதாக அவர் கூறினார். தோல்வியடைந்த விவரக்குறிப்புகளில் ஒன்றான, ஒரு கிலோவிற்கான கிலோ கலோரி (Kilo Calories) அளவில் குறைபாடு இருப்பதை ஏற்றுக்கொண்ட அமைச்சர், நிலக்கரிச் சுரங்கங்களில் இருந்து பெறப்படும் நிலக்கரியில் இவ்வாறான ஏற்றத்தாழ்வுகள் ஏற்படுவது அசாதாரணமானது அல்ல என்று சுட்டிக்காட்டினார். 2020 முதல் 2022 வரையிலான காலப்பகுதியில் இத்தகைய சந்தர்ப்பங்கள் ஏற்பட்டதாகவும், அவ்வாறான சந்தர்ப்பங்களில் அரசாங்கத்திற்கோ அல்லது நிலக்கரி நிறுவனத்திற்கோ நஷ்டம் ஏற்படாத வகையில் ஒப்பந்தத்தில் குறிப்பிட்டுள்ளவாறு நிலக்கரி இறக்குமதி நிறுவனத்திடம் இருந்து அபராதம் அறவிடப்படுவதாகவும் அவர் கூறினார்.

இம்முறை அதற்காக 02 மில்லியன் அமெரிக்க டாலர்களுக்கும் அதிகமான தொகையை சம்பந்தப்பட்ட நிறுவனத்திடம் இருந்து அறவிட நடவடிக்கை எடுத்து வருவதாகக் கூறிய அமைச்சர், அதன் பின்னர் நாட்டுக்கு வந்த இரண்டு நிலக்கரி கப்பல் தொகுதிகளும் உரிய விவரக்குறிப்புகளைப் பூர்த்தி செய்துள்ளதைச் சுட்டிக்காட்டினார்.

எதிர்க்கட்சித் தலைவர் எழுப்பிய கேள்விகளுக்கு மின்சக்தி மற்றும் எரிசக்தி அமைச்சர் வழங்கிய பதில்கள்: 

நாடாளுமன்றத்தில் இந்த நீண்ட உரையாடல் நேற்று எதிர்க்கட்சித் தலைவர் சஜித் பிரேமதாசவினால் 27-2 நிலையியற் கட்டளையின் கீழ் நிலக்கரி டெண்டர் தொடர்பாக மீண்டும் கேள்வி எழுப்பப்பட்டதையடுத்து ஏற்பட்டது.

"நிலக்கரி விநியோகம் தொடர்பான டெண்டர் நடைமுறையின் தோல்வி மற்றும் வெளிப்படைத்தன்மையற்ற தன்மை குறித்து இன்று நாடு முழுவதும் பொதுமக்களின் கவனம் திரும்பியுள்ளது. எனவே, தேசிய முக்கியத்துவம் வாய்ந்த கேள்விகளாக பின்வரும் கேள்விகளை சம்பந்தப்பட்ட அமைச்சரிடம் முன்வைக்க எதிர்பார்க்கிறேன்" என்று கூறி எதிர்க்கட்சித் தலைவர் எழுப்பிய கேள்விகளும், அதற்கு அமைச்சர் வழங்கிய விரிவான பதில்களும் வருமாறு:

கேள்வி: சர்ச்சைக்குரிய நிலக்கரி டெண்டர் எவ்விதம் கோரப்பட்டது? இது ஒரு தொழில்நுட்பக் கோளாறு அல்ல, நாட்டின் எரிசக்தி பாதுகாப்பு மற்றும் பொதுப் பணத்தை ஆபத்தில் ஆழ்த்திய நிர்வாகத் தோல்வி என்பதை அமைச்சர் ஏற்றுக்கொள்கிறாரா?

ஏனென்றால், குறிப்பாக 900 மெகாவாட் மின் உற்பத்தி நிலையத்திற்கு ஒரு நாளைக்கு 2500 மெட்ரிக் தொன் நிலக்கரி, அதாவது வருடாந்தம் 1.5 முதல் 1.7 மில்லியன் தொன் வரை பயன்படுத்தப்படுகிறது. மே மாதம் முதல் ஆகஸ்ட் வரை கடல் கொந்தளிப்பு காரணமாக நிலக்கரியை இறக்க முடியாது என்பதால், அடுத்த ஆண்டிற்கான போதிய நிலக்கரியை ஏப்ரல் மாதத்தில்தான் ஆர்டர் செய்ய வேண்டும். ஆனால் அரசாங்கம் இந்த நடைமுறைக்கு மாறாக ஆகஸ்ட் மாதத்தில்தான் டெண்டர் கோருகிறது. இது குறித்து விளக்கம் எதிர்பார்க்கிறேன்.

பதில்: இல்லை. 2025 மற்றும் 2026 ஆம் ஆண்டுகளுக்கான கொள்முதல், லங்கா நிலக்கரி நிறுவனத்தினால் பதிவு செய்யப்பட்டு முன்தகுதி பெற்ற கொள்முதல் வழிகாட்டுதலின் 1.3 இன் படி, வரையறுக்கப்பட்ட போட்டி ஏல முறையின் கீழ் தெரிவு செய்யப்பட்ட நிலக்கரி விநியோகஸ்தர்களிடமிருந்து ஏலங்கள் கோரப்பட்டன. தொழில்நுட்பக் கோளாறோ அல்லது பொதுப் பணம் தவறாகப் பயன்படுத்தப்பட்டதோ அல்லது எரிசக்தி பாதுகாப்பிற்கு இடையூறோ ஏற்படவில்லை. எனவே, இது நிர்வாகத் தோல்வி என்பதை நான் ஏற்கமாட்டேன். இந்த டெண்டர் தொடர்பாக எந்தவொரு ஏலதாரரிடமிருந்தும் மேல்முறையீடு வரவில்லை.

கேள்வி: டெண்டருக்காக வழங்கப்பட வேண்டிய கால அவகாசம் 21 நாட்களாகக் குறைக்கப்பட்டதாகத் தெரிகிறது. சாதாரணமாக 42 நாட்கள் வழங்கப்படும். யாருடைய அனுமதியின் கீழ் இது குறைக்கப்பட்டது?

பதில்: தேசிய கொள்முதல் ஆணைக்குழுவின் பரிந்துரையின் பேரில், உயர்மட்ட கொள்முதல் குழுவின் அங்கீகாரம் பெற்ற பின்னரே இது செய்யப்பட்டது. அத்தோடு, ஏலதாரர்களின் கோரிக்கையை ஏற்று மேலும் 07 நாட்கள் நீடிக்கப்பட்டு, மொத்தம் 28 நாட்கள் கால அவகாசம் வழங்கப்பட்டது.

கேள்வி: இதற்கு முன்னர் நிலக்கரி டெண்டருக்கு விண்ணப்பிக்கத் தேவையான தொழில்நுட்ப நிதித் தகுதிகள் யாவை?

பதில்: இதற்கு முன்னைய டெண்டர்களிலும் தற்போதுள்ள அதே தொழில்நுட்பத் தகுதிகளே கோரப்பட்டன. அதாவது கடந்த 36 மாதங்களில் ஒரு கிலோவிற்கு 5900 கிலோ கலோரி கொண்ட 1 இலட்சம் மெட்ரிக் தொன் நிலக்கரி வழங்கியிருக்க வேண்டும் மற்றும் மொத்தம் 5 இலட்சம் மெட்ரிக் தொன் வழங்கிய அனுபவம் இருக்க வேண்டும். 2023க்கு முன்னர் இருந்த அதே நிபந்தனைகளே இதிலும் பின்பற்றப்பட்டுள்ளன.

கேள்வி: இம்முறை அரசாங்கம் நிபந்தனைகளைத் தளர்த்தியுள்ளதா? ஒரு மில்லியன் மெட்ரிக் தொன் வழங்கியிருக்க வேண்டும் என்ற நிபந்தனை ஒரு இலட்சமாக ஏன் குறைக்கப்பட்டது? டெண்டர் மதிப்பீட்டு அறிக்கையைச் சமர்ப்பிக்க முடியுமா?

பதில்: கௌரவ சபாநாயகர் அவர்களே, 2023 முதல் இந்த டெண்டர் வரை முறையான டெண்டர் கோரல்கள் இன்றி, ஊழல் நிறைந்த அமைச்சரவை அங்கீகாரங்கள் மூலம் எவ்வித தகுதியும் இல்லாத ஒரேயொரு விநியோகஸ்தருக்கு, ரஷ்யா ஊடாக சட்டவிரோதமாக நிலக்கரி வழங்க வாய்ப்பளிக்கப்பட்டது. முந்தைய ஆட்சியில் தமக்கு இருந்த உறவுமுறை மூலம் ஒரு நிறுவனம் இதனைச் செய்து வந்தது. அவர்கள் வேறு எந்த நாட்டிற்கும் நிலக்கரி வழங்கிய அனுபவம் இல்லாதவர்கள்.

கேள்வி: தெரிவு செய்யப்பட்ட விநியோகஸ்தருக்கு நுரைச்சோலை போன்ற பெரிய மின் நிலையங்களுக்கு நிலக்கரி வழங்கிய அனுபவம் இருந்ததா?

பதில்: ஆம். பதிவு செய்யும் போதே அனுபவம் உள்ள நிறுவனங்களே பதிவு செய்யப்படுகின்றன. இந்த நிறுவனம் 2026 ஏப்ரல் வரை 15 இலட்சம் மெட்ரிக் தொன் நிலக்கரி வழங்க மட்டுமே ஒப்பந்தம் செய்துள்ளது.

கேள்வி: ஒரு கிலோவிற்கு 5900 கிலோ கலோரி (NCV) இருக்க வேண்டும் என்ற நிபந்தனை மீறப்பட்டுள்ளதா? பரிசோதனை முடிவுகள் வருவதற்கு முன்னரே நிலக்கரி பாய்லர்களுக்குள் (Boilers) போடப்பட்டதா?

பதில்: NCV 5900 ஆக இருக்க வேண்டும் என்பது உண்மையில்லை. Gross Calorific Value (GCV) தான் 5900 முதல் 6150 வரை இருக்க வேண்டும். முதல் கப்பலில் GCV 5520 ஆக இருந்தது. இதற்காக ஒப்பந்தப்படி 2 மில்லியன் அமெரிக்க டாலர் அபராதம் அறவிடப்படும். ஆனால் இரண்டாவது கப்பலில் GCV 6017 ஆக இருந்தது, அது சரியான தரத்தில் உள்ளது. ஏற்றி அனுப்பிய துறைமுகத்தின் (Loading Port) அறிக்கையின்படி தரம் சரியாக இருந்ததால் அவை பாய்லர்களுக்குள் பயன்படுத்தப்பட்டன.

கேள்வி: நிலக்கரி மாதிரிகள் இந்தியாவுக்கு அனுப்பப்பட்டதா? தரம் குறைந்த நிலக்கரி காரணமாக பாய்லர்களில் நிலக்கரி எரியும் அளவு அதிகரித்துள்ளதா?

பதில்: ஆம், இந்தியாவுக்கு அனுப்பப்பட்டது. இலங்கையில் சர்வதேச தரம் வாய்ந்த ஆய்வகம் இல்லை. இந்த ஆண்டு ITI உடன் இணைந்து ஆய்வகத்தை அமைக்க நடவடிக்கை எடுத்து வருகிறோம். தென்னாப்பிரிக்க நிலக்கரியில் இவ்வாறான மாற்றங்கள் சகஜம். அதற்காகவே அபராத நிபந்தனைகள் உள்ளன. இதன் மூலம் நாட்டுக்கோ நிறுவனத்திற்கோ எவ்வித நஷ்டமும் ஏற்படாது.

கேள்வி: இதனால் நாட்டுக்கு 10 பில்லியன் ரூபா நஷ்டம் ஏற்பட்டுள்ளதை ஏற்கிறீர்களா? நிலக்கரி கையிருப்பு சீக்கிரம் தீர்ந்துவிடும் அபாயம் உள்ளதா?

பதில்: இல்லை, இதனை நிராகரிக்கிறேன். 09 அளவுருக்களில் (Parameters) 03 மாத்திரமே குறைந்திருந்தது. இதனை தரம் குறைந்தது என்று கூற முடியாது. இதன் மூலம் பொருளாதார நஷ்டம் ஏற்படாது.

கேள்வி: இதனால் பாய்லர்களுக்கு பாதிப்பு ஏற்படுமா?

பதில்: இல்லை. ஒரு கப்பல் தொகுதியை வைத்து வருடாந்த கணிப்புகளைச் செய்ய முடியாது. பாய்லர்களுக்கு பாதிப்பு ஏற்படாது. ஜூன் மாதம் வரை நிலக்கரி கையிருப்புக்கு எந்தப் பிரச்சினையும் இல்லை. தற்போது 4,50,000 மெட்ரிக் தொன் கையிருப்பில் உள்ளது.

விமர்சனங்களை ஆக்கப்பூர்வமாகச் செய்யுங்கள். தமது விநியோகஸ்தருக்கு (Supplier) டெண்டர் கிடைக்காததால் சிலர் துடிக்கிறார்கள். முந்தைய ஆட்சியில் முறைகேடாகச் செய்தவர்கள் இப்போது போட்டியிட முடியாமல் போய்விட்டது. எதிர்க்கட்சித் தலைவர் அவர்களே, இவர்களுக்காக நீங்கள் பேசும் போது எச்சரிக்கையாக இருங்கள்.