2008ஆம் ஆண்டில் ஏறாவூர் பொலிஸ் பிரிவுக்குட்பட்ட பகுதியில் தேவதாஸ் சுரேஷ் குமார் என்ற நபரை வான் ஒன்றில் கடத்திச் சென்று கொலை செய்த சம்பவம் தொடர்பான வழக்கில், 8 பிரதிவாதிகளுக்கு மட்டக்களப்பு மேல் நீதிமன்றத்தினால் இன்று (19) மரண தண்டனை விதிக்கப்பட்டுள்ளது.
இச்சம்பவம் தொடர்பாகக் கைது செய்யப்பட்டு வழக்குத் தொடரப்பட்ட 9 சந்தேகநபர்களில் ஒருவரை விடுதலை செய்யுமாறும் மட்டக்களப்பு மேல் நீதிமன்ற நீதிபதி டீ.ஜே. பிரபாகரன் உத்தரவிட்டுள்ளார்.
சம்பவம் மற்றும் விசாரணையின் பின்னணி
-
கடத்தல் மற்றும் கொலை: 2008 ஜூன் 19 ஆம் திகதி, அப்போதைய செங்கலடி முகாமில் தங்கியிருந்த ஈ.பி.டி.பி (EPDP) உறுப்பினர்கள் சிலர் சுரேஷ் குமார் என்பவரை வான் ஒன்றில் கடத்திச் சென்று கொலை செய்து, சடலத்தைக் குழிதோண்டிப் புதைத்து அதன் மீது வாழைக்கன்று ஒன்றை நட்டிருந்தமை நீதிமன்ற விசாரணையில் தெரியவந்தது.
-
நீதிமன்ற நடவடிக்கை: இச்சம்பவம் தொடர்பாக ஏறாவூர் பொலிஸாரால் 9 ஈ.பி.டி.பி உறுப்பினர்கள் கைது செய்யப்பட்டு மட்டக்களப்பு நீதவான் நீதிமன்றத்தில் வழக்குத் தாக்கல் செய்யப்பட்டது. ஆரம்பகட்ட நீதவான் விசாரணைகளின் பின்னர், 2016 ஆம் ஆண்டில் மேலதிக விசாரணைகளுக்காக இவ்வழக்கு மட்டக்களப்பு மேல் நீதிமன்றத்திற்கு மாற்றப்பட்டது.
தீர்ப்பு மற்றும் சிறையில் அடைப்பு
கடத்தலுக்குப் பயன்படுத்தப்பட்டதாகக் கூறப்படும் வானும் கைப்பற்றப்பட்ட நிலையில், மேல் நீதிமன்றத்தில் தொடர்ச்சியாக வழக்கு விசாரணை முன்னெடுக்கப்பட்டது. நீண்டகால வழக்கு விசாரணையின் பின்னர் குற்றச்சாட்டுக்களில் குற்றவாளிகளாகக் காணப்பட்ட 8 பிரதிவாதிகளுக்கு இவ்வாறு மரண தண்டனை விதித்துத் தீர்ப்பளிக்கப்பட்டது.
தீர்ப்பு அறிவிக்கப்பட்டதைத் தொடர்ந்து, மரண தண்டனை விதிக்கப்பட்ட பிரதிவாதிகள் மட்டக்களப்பு சிறைச்சாலைக்கு அழைத்துச் செல்லப்பட்டனர்.


