யாழ்ப்பாண மனிதப் புதைகுழிகள்: பொலிஸார் காலந்தாழ்த்துவதாகக் குற்றச்சாட்டு!

யாழ்ப்பாணத் தீவுப் பகுதியில் காணப்படுவதாக ஒரு வருடத்திற்கு முன்னர் முறைப்பாடுகள் கிடைக்கப்பெற்ற பல மனிதப் புதைகுழிகள் தொடர்பான முழுமையான விசாரணை அறிக்கையை நீதிமன்றத்திற்குச் சமர்ப்பிப்பதில் பொலிஸார் தொடர்ச்சியாகக் காலந்தாழ்த்தி வருவதாகக் குற்றச்சாட்டுகள் எழுந்துள்ளன.

முப்பத்தாறு ஆண்டுகளுக்கு முன்னர் காணாமல் ஆக்கப்பட்ட தமது உறவினர்கள் புதைக்கப்பட்டுள்ளதாகக் கூறப்படும் வேலணை, அராலி சந்தி, மண்கும்பான் கணபதி கோயிலுக்கு அருகில், அல்லைப்பிட்டி மற்றும் மண்டைதீவு ஆகிய ஐந்து இடங்களில் அகழ்வுகளை மேற்கொண்டு முறையான விசாரணை நடத்துமாறு பாதிக்கப்பட்ட குடும்பங்களின் உறுப்பினர்கள் ஊர்காவற்துறை பொலிஸாரிடம் 2025 ஓகஸ்ட் மாதத்தில் முறைப்பாடு செய்திருந்தனர்.

இராணுவ முகாம்களின் தகவல்களைத் தேடும் பொலிஸார்

பொலிஸார் சுட்டிக்காட்டியுள்ளவாறு, மனித உடல்கள் புதைக்கப்பட்டுள்ளதாகச் சந்தேகிக்கப்படும் இடங்களுக்கு அருகில் அக்காலத்தில் இயங்கிய இராணுவ முகாம்கள் குறித்த தகவல்களைக் கண்டறிவது கடினமான ஒரு காரியமாகும்.

வேலணை பிரதேச சபையின் சுயேச்சை உறுப்பினர் சுவாமிநாதன் பிரகலாதன் தெரிவிக்கையில், குறித்த வழக்கு 2026 நவம்பர் 10 ஆம் திகதி ஊர்காவற்துறை (கයිற்ஸ்) நீதவான் நீதிமன்றத்தில் விசாரணைக்கு எடுத்துக்கொள்ளப்பட்ட போது, புதைகுழிகள் இருப்பதாகச் சந்தேகிக்கப்படும் இடங்களுக்கு அருகில் 36 ஆண்டுகளுக்கு முன்பு இராணு முகாம் ஒன்று செயற்பட்டதா என்பது தொடர்பிலும், அதனைப் பொறுப்பேற்று நடாத்தியவர்கள் யார் என்பது தொடர்பிலும் கண்டறிவது கடினம் என்றாலும் அது குறித்து முயற்சி செய்ய முடியும் என மாவட்ட குற்றத்தடுப்புப் பிரிவின் தலைவர் நீதிமன்றத்திற்கு அறிவித்தார்.

"மாவட்ட குற்றத்தடுப்புப் பிரிவின் சி.ஐ (CI) அதாவது பிரதான பொலிஸ் பரிசோதகர் நீதிமன்றத்திற்கு வந்திருந்தார். அவர் கூறியது, 36 ஆண்டுகளுக்கு முன்பு அங்கு இராணுவ முகம் ஒன்று இருந்ததா, அது பொறுப்பில் இருந்த அதிகாரிகள் யார் என்ற விவரங்களை இராணுவத்திடமிருந்து பெற்று, அதனுடன் தொடர்புடையவர்களுக்குத் தகவல்களை வழங்கி அவர்களது வாக்குமூலங்களைப் பெற வேண்டும் என்பதும், 36 ஆண்டுகளுக்கு முன்பு நடந்த விஷயம் என்பதால் அவர்கள் உயிரோடு இருக்கிறார்களா என்பது தெரியவில்லை என்றாலும் அப்படி முயற்சித்துப் பார்ப்பேன் என்பதும், அல்லது நீதிமன்ற உத்தரவின் கீழ் அகழ்வுகளை மேற்கொள்வதற்குத் தமக்கு எந்த எதிர்ப்பும் இல்லை என்பதையும் அறிவித்தார்," என அவர் குறிப்பிட்டார்.

பாதிக்கப்பட்டவர்களின் எதிர்ப்பால் வழக்கு ஒத்திவைப்பு

இப் புதைகுழிகள் தொடர்ச்சியான முழுமையான விசாரணை அறிக்கையை நீதிமன்றத்திற்குச் சமர்ப்பிப்பதில் மாவட்ட குற்றத்தடுப்புப் பிரிவு தொடர்ந்தும் காலந்தாழ்த்துவது தொடர்பில் பாதிக்கப்பட்ட தரப்பு சார்பில் நீதிமன்றத்தில் ஆஜரான வழக்கறிஞர்கள் தெரிவித்த எதிர்ப்பை அடுத்து, 2027 ஜனவரி மாதத்தில் வழக்கை மீண்டும் விசாரணைக்கு எடுத்துக்கொள்ள ஊர்காவற்துறை நீதவான் அனீஃபா ரஜீவ் உத்தரவிட்டுள்ளதாக வேலணை பிரதேச சபையின் சுயேச்சை உறுப்பினர் சுவாமிநாதன் பிரகலாதன் ஊடகவியலாளர்களிடம் மேலும் தெரிவித்தார்.

"எங்கள் சார்பில் லெனினும், பலவந்தமாகக் காணாமல் ஆக்கப்பட்டோரின் உறவினர்கள் சார்பில் பூரணி மரியாநாயகமும் கலந்துகொண்டனர். அவர்கள் இருவரும் இராணுவத்திடம் விசாரிப்பதாகக் கூறி காலத்தைக் கடத்தாமல் விரைவாக அறிக்கையைச் சமர்ப்பிக்குமாறு விடுத்த கோரிக்கைக்கு இணங்க, ஜனவரி மாதம் 05 ஆம் திகதி வழக்கை விசாரணைக்கு அழைக்க உத்தரவிடப்பட்டது," என்றார் அவர்.

இக் வழக்கு 2026 செப்டம்பர் 22 ஆம் திகதி விசாரணைக்கு எடுத்துக்கொள்ளப்பட்ட போதிலும், விசாரணைகள் இன்னும் நிறைவடையவில்லை எனக் கூறி அதற்காகப் பொலிஸார் தொடர்ந்தும் நீதிமன்றத்திடம் அவகாசம் கோரியிருந்தனர்.

மண்டைதீவு கிணற்றில் அறுபது சடலங்களா?

யாழ்ப்பாணம் மண்டைதீவு வத்து நிலக் கிணற்றில் மாத்திரம் அறுபதுக்கும் அதிகமான சடலங்கள் இருப்பதாக வேலணை பிரதேச சபையின் சுயேச்சை உறுப்பினர் சுவாமிநாதன் பிரகலாதன் 2025 ஓகஸ்ட் 20 ஆம் திகதி வெளிப்படுத்தியிருந்தார்.

அக்கிணற்றில் போடப்பட்டிருப்பதாக நம்பப்படும் சடலங்கள் தொடர்பாகக் கண் கண்ட சாட்சியாளர் ஒருவர் தற்போதும் உயிருடன் வாழ்ந்து வருவதாகவும் அவர் அன்றைய தினம் மேலும் வெளிப்படுத்தியிருந்தார்.

முப்பத்தாறு ஆண்டுகளுக்கு முன்னர் அரச படைகள் மேற்கொண்ட தேடுதல் நடவடிக்கை ஒன்றை நினைவுகூர்ந்த பிரதேச சபை உறுப்பினர், அன்றைய தினம் இராணுவத்தினரால் தமது கட்டுப்பாட்டிற்குள் கொண்டுவரப்பட்டவர்களில் 84 பேருக்கு ஏற்பட்ட கதி என்ன என்பது குறித்து இதுவரை எந்தத் தகவலும் இல்லை என வலியுறுத்தியிருந்தார்.

இராணுவத்தால் பிடிக்கப்பட்டவர்களில் ஒரு பகுதியினரைக் கொன்று கிணறுகளில் வீசியதாகச் சுப்பிரமணியம் பிரகலாதன் அன்றைய தினம் மேலும் அம்பலப்படுத்தியிருந்தார்.

சட்டத்தரணி ஹர்ஷண நானயக்கார தனியார் தொலைக்காட்சி நிகழ்ச்சி ஒன்றில் கலந்துகொண்டு கடந்த ஆண்டின் முற்பகுதியில் முதன்முறையாகத் தெரிவித்த கருத்தின்படி, இலங்கையில் இதுவரை 17 புதைகுழிகள் கண்டறியப்பட்டுள்ளன.

 எவ்வாறாயினும், மனித உரிமைச் செயற்பாட்டாளர்கள் சுட்டிக்காட்டுவது போன்று இலங்கைத் தீவு முழுவதும் ஏராளமான புதைகுழிகள் பரந்து காணப்படுகின்றன.