க்ரெகரி வாவியின் சுற்றுலா படகுச் சேவையை ஒழுங்குபடுத்தத் திட்டம்!

முறைப்படி ஒழுங்குபடுத்த நடவடிக்கை எடுக்கப்படும் என நுவரெலியா மாநகரசபை முதல்வர் உபாலி வனிகசேகர தெரிவித்துள்ளார்.

சுற்றுலாப் பயணிகளுடன் சென்ற இரண்டு படகுகள் நேற்று (19) விபத்துக்குள்ளானதை அடுத்தே இந்தத் தீர்மானம் எடுக்கப்பட்டுள்ளதாகத் தெரிவிக்கப்படுகிறது.

க்ரெகரி வாவியில் சுமார் 120 சுற்றுலா படகுகள் சேவையில் ஈடுபடுகின்றன. நேற்று இடம்பெற்ற விபத்தைத் தொடர்ந்து, படகு உரிமையாளர்கள் மற்றும் ஓட்டுநர்களை அழைத்து இது தொடர்பான அறிவுறுத்தல்களை வழங்கியதாக முதல்வர் மேலும் குறிப்பிட்டார்.

இதற்கமைய:

• சுற்றுலாப் பயணிகளுக்கு கட்டாயம் பாதுகாப்பு கவச அங்கிகள் (Life Jackets) வழங்கப்பட வேண்டும்.

• படகுகளின் வேகத்தைக் குறைத்து, ஒழுக்கமான முறையில் பயணங்களை மேற்கொள்ள வேண்டும்.

நேற்று (19) பிற்பகல் 2:30 மணியளவில் இரு சுற்றுலாப் பயணிகளுடன் சென்ற படகு ஒன்றின் மீது, அதிவேகமாக வந்த மற்றொரு படகு மோதியுள்ளது. இதனால் சுற்றுலாப் பயணிகள் பயணித்த படகு வாவியில் கவிழ்ந்து விபத்துக்குள்ளானது.

எனினும், ஏனைய படகோட்டிகளால் வாவியில் விழுந்த இரு சுற்றுலாப் பயணிகளும் படகோட்டியும் பத்திரமாக மீட்கப்பட்டனர்.

சம்பவம் தொடர்பாக இரு படகோட்டிகள் கைது செய்யப்பட்டு பிணையில் விடுவிக்கப்பட்டுள்ளனர். சந்தேகநபர்களுக்கு எதிராக நுவரெலியா நீதவான் நீதிமன்றில் சட்ட நடவடிக்கை எடுக்கப்படும் என பொலிஸார் தெரிவித்தனர்.