அம்பேவெல, வர்விவத்தை பகுதியில் 8 வயது சிறுமி மற்றும் இரண்டரை வயது சிறுவன் ஆகியோரைத் தடிகளால் தாக்கி, கொடூரமாகச் சித்திரவதை செய்த குற்றச்சாட்டில் தாய் மற்றும் அவரது கள்ளக்காதலன் ஆகியோர் இன்று (20) கெப்பெட்டிபொல பொலிஸாரால் கைது செய்யப்பட்டுள்ளனர்.
அம்பேவெல, வர்விவத்தை கீழ்ப்பகுதியைச் சேர்ந்த குறித்த சிறுவர்களின் 31 வயதுடைய தாய் மற்றும் 35 வயதுடைய மூன்று பிள்ளைகளின் தந்தையான அவரது கள்ளக்காதலன் ஆகியோரே இவ்வாறு கைது செய்யப்பட்டுள்ளதாக பொலிஸார் தெரிவித்தனர்.
தடிகளால் தாக்கப்பட்டதில் காயமடைந்து சித்திரவதைக்கு உள்ளான 8 வயது சிறுமியும் இரண்டரை வயது சிறுவனும் மேலதிக சிகிச்சைக்காக பதுளை போதனா வைத்தியசாலையில் அனுமதிக்கப்பட்டுள்ளதாக பொலிஸார் மேலும் குறிப்பிட்டனர்.
இந்தக் குழந்தைகள் இருவரும் தமது தாய் மற்றும் 38 வயதுடைய சட்டபூர்வமான தந்தையுடன் மிரஹவத்தை பகுதியில் வசித்து வந்துள்ளனர். கைது செய்யப்பட்டுள்ள சந்தேகநபர், குழந்தைகளின் தந்தையின் நெருங்கிய நண்பர் எனவும் பொலிஸ் விசாரணைகளில் தெரியவந்துள்ளது.
சம்பவம் தொடர்பில் கெப்பெட்டிபொல பொலிஸார் மேலதிக விசாரணைகளை முன்னெடுத்து வருகின்றனர்.