கஸ்ஸப தேரரைப் பிணையில் எடுக்க திருகோணமலைக்கு நேரடியாகச் சென்ற சட்ட மா அதிபர்!

குற்றச்சாட்டின் கீழ் விளக்கமறியலில் வைக்கப்பட்டுள்ள பலங்கொடை கஸ்ஸப தேரர் உள்ளிட்ட 09 சந்தேகநபர்களுக்கு எதிரான வழக்கு நேற்று (19) திருகோணமலை நீதவான் சம்சுதீன் முன்னிலையில் விசாரணைக்கு எடுத்துக்கொள்ளப்பட்டது.

இதன்போது, சட்டமா அதிபர் தரப்புக்கும் பொலிஸாருக்கும் இடையில் ஏற்பட்ட நேரடி வாக்குவாதம் காரணமாக வழக்கின் அடுத்தகட்ட நகர்வுகள் குறித்து பெரும் இழுபறி நிலை உருவானது.

குற்றச்சாட்டுகளை மீளப்பெறுவதில் சர்ச்சை
வழக்கு விசாரணைக்கு வந்தபோது, சட்டமா அதிபர் சார்பில் முன்னிலையான அரசாங்க சட்டத்தரணி, மேன்முறையீட்டு நீதிமன்றத்தில் உள்ள ஒரு ரிட் மனுத் தொடர்பான இணக்கப்பாட்டின் அடிப்படையில், சந்தேகநபர்களுக்கு எதிரான கடலோரப் பாதுகாப்புச் சட்டத்தின் கீழ் உள்ள முதலாவது குற்றச்சாட்டை மீளப்பெற சட்டமா அதிபர் தீர்மானித்துள்ளதாக அறிவித்தார். இந்தக் குற்றச்சாட்டு நீக்கப்பட்டால் மட்டுமே, நீதவான் நீதிமன்றினால் சந்தேகநபர்களுக்கு பிணை வழங்குவது குறித்து பரிசீலிக்க முடியும் என நீதவான் சுட்டிக்காட்டினார்.

எனினும், சட்டமா அதிபரின் இந்தத் தீர்மானத்திற்கு திருகோணமலை பிரிவுக்குப் பொறுப்பான சிரேஷ்ட பொலிஸ் அத்தியட்சகர் உள்ளிட்ட பொலிஸ் குழுவினர் கடும் எதிர்ப்புத் தெரிவித்தனர். வழக்கை பொலிஸாரே தாக்கல் செய்துள்ளதால், இந்தக் குற்றச்சாட்டுகளை மீளப்பெற தாம் உடன்படவில்லை என அவர்கள் திட்டவட்டமாகத் தெரிவித்தனர்.

நீதிமன்றில் நிலவிய பதற்றம்
இதன் காரணமாக அரசாங்க சட்டத்தரணிக்கும் பொலிஸாருக்கும் இடையில் நீதிமன்ற அறைக்குள்ளேயே வாக்குவாதம் ஏற்பட்டது. இரு தரப்பு வாதங்களையும் கேட்ட நீதவான் பின்வரும் விடயங்களை வலியுறுத்தினார்:

ஒரு வழக்கை சட்டமா அதிபர் தனது பொறுப்பின் கீழ் எடுக்க அதிகாரம் இருந்தாலும், அதற்கு பொலிஸாரின் அறிக்கையும் அவசியமானது.

குற்றச்சாட்டுகளை மீளப்பெறாமல் அல்லது சந்தேகநபர்கள் குற்றத்தை ஒப்புக்கொள்ளாமல் பிணை வழங்க சட்ட இடமில்லை.

இந்த வழக்கையொட்டி பெருமளவிலான தேரர்கள் நீதிமன்ற வளாகத்தில் திரண்டிருந்ததோடு, பாதுகாப்பு கருதி 100-க்கும் மேற்பட்ட பொலிஸார் கடமையில் ஈடுபடுத்தப்பட்டிருந்தனர். பொலிஸாருக்கும் சட்டத்தரணிகளுக்கும் இடையிலான முரண்பாட்டைத் தீர்த்துக்கொள்ள அவகாசம் வழங்கி, நீதவான் வழக்கை பிற்பகல் 2:30 மணி வரை ஒத்திவைத்தார்.

பிணை கோரிக்கை நிராகரிப்பு
பிற்பகல் மீண்டும் வழக்குத் தொடங்கியபோது, சந்தேகநபர் தரப்பு சட்டத்தரணிகள் இச்சம்பவம் குறித்து உயர்நீதிமன்றத்தில் அடிப்படை உரிமை மனுவும், மேன்முறையீட்டு நீதிமன்றத்தில் ரிட் மனுவும் தாக்கல் செய்யப்பட்டுள்ளதாகக் கூறினர். அந்த மனுக்களைத் திரும்பப் பெறப் போவதில்லை என்றும் அவர்கள் குறிப்பிட்டனர்.

இதனையடுத்து கருத்துத் தெரிவித்த அரசாங்க சட்டத்தரணி, விசாரணை அதிகாரிகளை இலக்கு வைத்தே இந்த மனுக்கள் தாக்கல் செய்யப்பட்டுள்ளதால், வழக்கை இணக்கப்பாட்டுடன் முடிவுக்குக் கொண்டுவர முடியாது என்றும், எனவே கடலோரப் பாதுகாப்புச் சட்டத்தின் கீழ் உள்ள குற்றச்சாட்டுகளை இந்தத் தருணத்தில் மீளப்பெறப் போவதில்லை என்றும் நீதிமன்றிற்கு அறிவித்தார்.

திருகோணமலை கடற்கரையில் உள்ள புத்தர் சிலையை மறைப்பதற்காக அமைக்கப்பட்ட கட்டுமானம் சட்டவிரோதமானது அல்ல என சந்தேகநபர் தரப்பு வாதிட்ட போதிலும், கடலோரப் பாதுகாப்புத் திணைக்கள அதிகாரியிடம் விசாரணை நடத்திய நீதவான், அங்கு ஒரு கட்டுமானம் இடம்பெற்றுள்ளதை உறுதிப்படுத்தினார்.

நீதவானின் தீர்ப்பு
கடலோரப் பாதுகாப்பு மற்றும் கடலோர வளங்கள் முகாமைத்துவச் சட்டத்தின் கீழ் குற்றச்சாட்டுகள் நிலுவையில் உள்ள நிலையில், அந்தச் சட்டத்தின் 31H பிரிவின்படி நீதவானுக்கு பிணை வழங்க எந்த சட்ட அதிகாரமும் இல்லை என நீதவான் அறிவித்தார்.

இந்த வழக்கை விரைவாக முடிக்க வேண்டுமானால், குற்றத்தை ஒப்புக்கொண்டு அபராதத்தை செலுத்தி முடிவுக்குக் கொண்டு வரலாம் என்றும், அல்லது குற்றச்சாட்டுகள் மீளப்பெறப்பட்டால் மட்டுமே பிணை குறித்துப் பரிசீலிக்க முடியும் என்றும் அவர் குறிப்பிட்டார். பிணை தொடர்பான இந்த உத்தரவை சவாலுக்கு உட்படுத்த வேண்டுமானால் மேல் நீதிமன்றத்தை நாட முடியும் என நீதவான் சுட்டிக்காட்டினார்.