நிலைநாட்டவில்லை என வடக்கின் பிரதான தமிழ் அரசியல் கட்சியின் தலைவர் குற்றம் சுமத்தியுள்ளார். நீதி கிடைக்கின்ற நாடொன்றை எதிர்பார்த்த போதிலும், நீதி கிடைக்காத நாட்டிலேயே வாழ வேண்டியுள்ளதாக அவர் செய்துள்ளார்.
"அந்த அநீதிக்கு இன்னும் நீதி கிடைக்கவில்லை. இந்நாட்டில் இடம்பெற்ற தாக்குதல்கள், அழிவுகள் மற்றும் துயரங்களுக்கு நீதி கிடைக்காது என்பதற்கான ஆரம்பமே 74-ஆம் ஆண்டு இடம்பெற்ற இந்தச் சம்பவம். இந்த அரசாங்கம் இதுவரை நீதியை வழங்கவில்லை. இனப்படுகொலைகளுக்கு நீதி கிடைக்கவில்லை. மறுபுறம், நீதி கிடைக்கும் நாட்டை நாம் எதிர்பார்த்தாலும், நாம் நீதி இல்லாத நாட்டிலேயே வாழ்கிறோம்."
யாழ்ப்பாணத்தில் 52 ஆண்டுகளுக்கு முன்னர் பொலிஸாரின் துப்பாக்கிச் சூட்டில் கொல்லப்பட்ட ஒன்பது பேரின் நினைவேந்தல் நிகழ்வில் கலந்துகொண்டு உரையாற்றியபோதே, இலங்கைத் தமிழ் அரசுக் கட்சியின் (ITAK) தலைவர் சி.வி.கே. சிவஞானம் இதனைத் தெரிவித்தார். வடக்கில் இடம்பெற்ற சர்வதேச மாநாடொன்றின் இடையே இந்த நினைவேந்தல் நடைபெற்றது.
நான்காவது சர்வதேச தமிழாராய்ச்சி மாநாட்டின் இறுதி நாளில், 1974-ஆம் ஆண்டு பொலிஸார் நடத்திய தாக்குதலில் உயிரிழந்த ஒன்பது பேரை நினைவு கூரும் வகையில் யாழ்ப்பாணம் வீரசிங்கம் மண்டபத்திற்கு முன்னால் அமைந்துள்ள நினைவுத் தூபிக்கு, இலங்கைத் தமிழ் அரசுக் கட்சி உறுப்பினர்கள், தமிழ் மக்கள் பிரதிநிதிகள் மற்றும் சிவில் அமைப்புச் செயற்பாட்டாளர்கள் மலர் தூவி, சுடர் ஏற்றி அஞ்சலி செலுத்தியதாக எமது பிரதேச செய்தியாளர்கள் தெரிவித்தனர்.
தமிழ் மக்கள் எத்தகைய அழிவுகளைச் சந்தித்தாலும், தமது இனத்தின் சுயநிர்ணய உரிமைக்காகப் போராடுவோம் என அந்த நினைவுச் சின்னத்திற்கு முன்னால் இலங்கைத் தமிழ் அரசுக் கட்சியின் தலைவர் உறுதியளித்தார்.
"தமிழ் இனம் மீண்டும் மீண்டும் எத்தகைய அழிவுகளைச் சந்தித்தாலும், மீண்டெழும் இனமாக, எமது தன்னாதிக்கத்தையும் சுயநிர்ணய உரிமையையும் ஏதோ ஒரு வகையில் நிலைநிறுத்துவோம் என இவர்களின் ஆன்மாக்கள் முன்னிலையில் நாம் சபதமேற்கிறோம். அமைதி வழியில் அரசியல் விடுதலையைப் பெற்றுக்கொள்ள நாம் உறுதிகொள்வோம்."
1974-ஆம் ஆண்டு பொலிஸ் தாக்குதலில் ஒன்பது பேர் உயிரிழந்த போது, இலங்கைத் தமிழ் அரசுக் கட்சியைப் பிரதிநிதித்துவப்படுத்தி அன்றைய நாடாளுமன்ற உறுப்பினராக இருந்த சொலமன் எஸ். சிரில் மற்றும் யாழ் மாநகரசபையின் முன்னாள் முதல்வர் விவேகானந்தராஜா மதிவதனி ஆகியோரும் இந்த நினைவேந்தலில் கலந்துகொண்டனர்.
50-க்கும் மேற்பட்டோர் காயம்
உள்நாட்டு மற்றும் வெளிநாட்டு அறிஞர்களின் பங்களிப்புடன் 1974 ஜனவரி 3-ஆம் திகதி ஆரம்பமாகி ஒரு வாரகாலமாக நடைபெற்ற நான்காவது சர்வதேச தமிழாராய்ச்சி மாநாட்டின் இறுதி நாளன்று, எவ்வித முன்னறிவிப்புமின்றி மாநாட்டு மைதானத்திற்குள் நுழைந்த யாழ் உதவிப் பொலிஸ் அத்தியட்சகர் எஸ்.கே. சந்திரசேகர தலைமையிலான பொலிஸ் குழுவினர் துப்பாக்கிச் சூடு நடத்தினர். புகழ்மிக்க தமிழக அறிஞர் பேராசிரியர் நைனா முஹம்மது உரையாற்றிக் கொண்டிருந்த போதே இத்தாக்குதல் நடத்தப்பட்டது.
மாநாட்டை கொழும்பில் நடத்துமாறு சிறிமா பண்டாரநாயக்க அரசாங்கம் விடுத்த அழுத்தங்களையும் தடைகளையும் மீறி, யாழ்ப்பாணத்திலேயே அதனை மிகச்சிறப்பாக நடத்த ஏற்பாட்டாளர்கள் நடவடிக்கை எடுத்திருந்தனர்.
ஜீப் மற்றும் வேன்களில் வந்த பொலிஸார், யாழ் வீரசிங்கம் மண்டபத்திற்கு முன்னால் அமைக்கப்பட்டிருந்த மேடைக்கு அருகில் திரண்டிருந்த ஆயிரக்கணக்கான மக்கள் மீது தடியடி நடத்தியும், துப்பாக்கிப் பிடியால் தாக்கியும், துப்பாக்கிச் சூடு நடத்தியும் தாக்குதல் மேற்கொண்டதாக அந்தச் சம்பவத்தில் உயிர் தப்பியவர்கள் பின்னர் தெரிவித்தனர்.
பொலிஸார் நடத்திய துப்பாக்கிச் சூட்டினால் அறுந்து விழுந்த மின்சாரக் கம்பிகள், தாக்குதலிலிருந்து தப்பிக்க ஓடிய மக்கள் மீது விழுந்தன. இந்த பொலிஸ் தாக்குதலில் ஒன்பது பேர் கொல்லப்பட்டதோடு, நகரைச் சூழவுள்ள சொத்துக்கள் சேதமடைந்ததுடன் 50-க்கும் மேற்பட்டோர் படுகாயமடைந்தனர்.
'சேவையே அன்றிப் படை அல்ல'
இச்சம்பவம் குறித்து விசாரணை நடத்துவதற்காக முன்னாள் உயர்நீதிமன்ற நீதியரசர் ஒஸ்வால்ட் லெஸ்லி டி கிரெட்சர் தலைமையில் நியமிக்கப்பட்ட மூவர் கொண்ட குழு, பொலிஸார் தமது கடமையைச் சரியாகப் புரிந்துகொள்ளாமல் முன்னெடுத்த இத்தாக்குதலை எவ்விதத்திலும் நியாயப்படுத்த முடியாது எனத் தீர்ப்பளித்தது.
"பொலிஸ் அதிகாரிகள் தங்களது கடமை ஒரு 'பொலிஸ் சேவையில்' உள்ளதே தவிர 'பொலிஸ் படையில்' அல்ல என்பதை உணர்ந்து கொள்ள வேண்டும்" என 'ஜனவரி 10 சோகம்' (January 10 Tragedy) எனும் அந்த விசாரணை அறிக்கை குறிப்பிட்டுள்ளது.
உயர்நீதிமன்ற நீதியரசர் வி. மாணிக்கவாசகர் மற்றும் யாழ் முன்னாள் பேராயர் சபாபதி குலேந்திரன் ஆகியோர் உறுப்பினர்களாக இருந்த இக்குழு, 1974 பெப்ரவரி 18-ஆம் திகதி வெளியிட்ட அறிக்கையில் பின்வருமாறு தெரிவிக்கப்பட்டுள்ளது:
"ஆயுதமற்ற பிரஜைகள் மீது அந்த இரவில் (1974 ஜனவரி 10) வன்முறையான மற்றும் தேவையற்ற தாக்குதலை நடத்தியமைக்காக பொலிஸார் குற்றவாளிகள் என்பதே எமது தவிர்க்க முடியாத முடிவாகும். மிகவும் இக்கட்டான சூழ்நிலைகளில் கூட நிதானமாகச் செயற்பட வேண்டிய சிவில் பொலிஸ் படையினரிடம் எதிர்பார்க்கப்படும் சரியான தீர்மானத்தை எடுக்கும் திறன் அவர்களிடம் இல்லாமை எமது ஆழ்ந்த கவலையைத் தருகிறது. உயிரிழப்புகளும் சொத்துச் சேதங்களும் ஒரு பொலிஸ் அதிகாரியின் முற்றிலும் தவறான மற்றும் முட்டாள்தனமான தீர்மானத்தினால் விளைந்த தொடர் சம்பவங்களால் அப்பாவி மக்கள் பலியானதாலேயே ஏற்பட்டன. பாதுகாப்பற்ற மற்றும் நிராயுதபாணி பிரஜைகள் மீது ஏவிவிடப்பட்ட பொலிஸ் தாக்குதலை ஒருபோதும் நியாயப்படுத்த முடியாது."
இந்தக் குற்றத்திற்காக எவரும் தண்டிக்கப்படாத போதிலும், தாக்குதலுக்குத் தலைமை தாங்கிய உதவிப் பொலிஸ் அத்தியட்சகர் சந்திரசேகர அதே வருடத்தில் பொலிஸ் அத்தியட்சகராகப் பதவியுயர்வு பெற்றார் என்பது குறிப்பிடத்தக்கது.