முன்னாள் ஜனாதிபதி கோட்டாபயவின் மனு இன்று பரிசீலனை!

• ஈஸ்டர் ஞாயிறு பயங்கரவாதத் தாக்குதல் விசாரணைகளில் தன்னை சிஐடி கைது செய்வதைத் தடுக்குமாறு கோரி கோட்டாபய ராஜபக்ஷவினால் ரிட் மனு தாக்கல்.

• மனுதாரர் தரப்பில் ஜனாதிபதி சட்டத்தரணி ரொமேஷ் டி சில்வாவும், பிரதிவாதிகள் தரப்பில் பிரதி சொலிசிட்டர் ஜெனரல் சுஹார்ஷி ஹேரத்தும் ஆஜர்.

• பிரதிவாதிகளாக பொலிஸ் மா அதிபர், சிஐடி பணிப்பாளர் ஷானி அபேசேகர, பொறுப்பதிகாரி மாதவ குணவர்தன மற்றும் சட்டமா அதிபர் ஆகியோர் பெயரிடப்பட்டுள்ளனர்.

2019ஆம் ஆண்டு நடத்தப்பட்ட ஈஸ்டர் ஞாயிறு பயங்கரவாதத் தாக்குதல் சம்பவங்கள் தொடர்பாக மேற்கொள்ளப்பட்டு வரும் விசாரணைகளுக்கு அமைவாக, தன்னைக் குற்றப்புலனாய்வுத் திணைக்களத்தினால் கைது செய்வதைத் தடுக்கும் இடைக்கால தடை உத்தரவொன்றைப் பிறப்பிக்குமாறு கோரி முன்னாள் ஜனாதிபதி கோட்டாபய ராஜபக்ஷவினால் சமர்ப்பிக்கப்பட்ட ரிட் மனு இன்று (18) மேல்முறையீட்டு நீதிமன்றத்தில் பரிசீலனைக்கு எடுத்துக்கொள்ளப்படவுள்ளது.

மேல்முறையீட்டு நீதிமன்றத்தின் தலைவரான நீதியரசர் ரொஹான்த அபேசூரிய மற்றும் நீதியரசர் சரத் திஸாநாயக்க ஆகியோரைக் கொண்ட இருவர் அடங்கிய மேல்முறையீட்டு நீதிமன்ற நீதியரசர்கள் குழாம் முன்னிலையில் இந்த மனு இன்று பரிசீலிக்கப்படவுள்ளது.

இதன்போது மனுதாரரான முன்னாள் ஜனாதிபதி கோட்டாபய ராஜபக்ஷ சார்பாக ஜனாதிபதி சட்டத்தரணி ரொமேஷ் டி சில்வா நீதிமன்றத்தில் வாதங்களை முன்வைக்கவுள்ளதுடன், பிரதிவாதிகள் தரப்பு சார்பாக பிரதி சொலிசிட்டர் ஜெனரல் சுஹார்ஷி ஹேரத் ஆஜராகிக் கருத்துக்களை முன்வைக்கவுள்ளார்.

குறித்த ரிட் மனுவில் பிரதிவாதிகளாக பொலிஸ் மா அதிபர், குற்றப்புலனாய்வுத் திணைக்களத்தின் பணிப்பாளர் ஷானி அபேசேகர, அதன் பொறுப்பதிகாரி மாதவ குணவர்தன மற்றும் சட்டமா அதிபர் ஆகியோர் பெயரிடப்பட்டுள்ளமை குறிப்பிடத்தக்கதாகும்.