செய்யப்பட்டுள்ள சட்டத்தரணி சமிந்த குலரத்ன, இலங்கை மேன்முறையீட்டு நீதிமன்றத்தில் ரிட் மனு (CA (Writ) 109/2026) ஒன்றைத் தாக்கல் செய்துள்ளார்.
இன்று (18) தாக்கல் செய்யப்பட்டுள்ள இந்த மனுவில், நாடாளுமன்ற சபாநாயகர் கலாநிதி ஜகத் விக்ரமரத்ன, அவருடைய தனிப்பட்ட செயலாளர் சமீரா காலகே மற்றும் சபாநாயகரினால் சட்டவிரோதமான முறையில் விசாரணை அதிகாரியாக நியமிக்கப்பட்டதாகக் கூறப்படும் ஓய்வுபெற்ற மேலதிக செயலாளர் எஸ்.கே. லியனகே உள்ளிட்ட 14 பேர் பிரதிவாதிகளாகக் குறிப்பிடப்பட்டுள்ளனர்.
மனுவில் குறிப்பிடப்பட்டுள்ள முக்கிய விடயங்கள்:
நியமனத்தின் சட்டபூர்வத்தன்மை: தனது நியமனம் மற்றும் ஆட்சேர்ப்பு நடவடிக்கைகள் அனைத்தும் சட்டபூர்வமாகவும் வெளிப்படைத்தன்மையுடனும் இடம்பெற்றதாக சமிந்த குலரத்ன தெரிவித்துள்ளார். வர்த்தமானி அறிவித்தலின் பிரகாரம் தேவையான அனைத்து கல்வி மற்றும் தொழில்சார் தகைமைகளையும் தான் பூர்த்தி செய்துள்ளதாகவும், நேர்முகத் தேர்வில் அதிகூடிய புள்ளிகளைப் பெற்றே தான் தெரிவு செய்யப்பட்டதாகவும் அவர் சுட்டிக்காட்டியுள்ளார்.
ஓய்வூதிய உரிமைகள்: 1953ஆம் ஆண்டின் 9ஆம் இலக்க நாடாளுமன்ற பணியாளர் சட்டம் மற்றும் ஏனைய நியதிச்சட்ட விதிகளின்படி, தனது முன்னைய சேவைக்காலத்தை தற்போதைய பதவிக்காலத்துடன் இணைத்து ஓய்வூதியத்தைக் கணிப்பிடுவதற்கு தமக்கு சட்டபூர்வ உரிமை உள்ளதாக மனுதாரர் குறிப்பிட்டுள்ளார்.
பழிவாங்கும் நடவடிக்கை: 2025 ஜூன் 18 அன்று சபாநாயகரின் பிரத்தியேக உணவகத்தில் இடம்பெற்ற ஒரு சம்பவத்தை நேரில் கண்டமை மற்றும் சபாநாயகரின் ஊழல் நடவடிக்கைகளுக்கு எதிர்ப்புத் தெரிவித்தமை காரணமாகவே, தன் மீது காழ்ப்புணர்ச்சியுடன் விசாரணை நடத்தப்பட்டதாக அவர் குற்றம் சுமத்தியுள்ளார். தகைமையற்ற ஒருவரை விசாரணை அதிகாரியாக நியமித்து, இயற்கை நீதிக்கொள்கைக்கு முரணாகத் தயாரிக்கப்பட்ட அறிக்கையின் அடிப்படையிலேயே தனது பணிநீக்கம் இடம்பெற்றுள்ளதாக அவர் மனுவில் குறிப்பிட்டுள்ளார்.
இரகசியத் தகவல்கள்: சபாநாயகரின் உணர்வுபூர்வமான (Sensitive) தகவல்கள் வெளித்தரப்பினருக்குக் கசிந்தமை தொடர்பில் நாடாளுமன்ற பொதுச்செயலாளரினால் தயாரிக்கப்பட்ட விசாரணை அறிக்கையை நீதிமன்றத்தில் முன்னிலைப்படுத்துமாறு அவர் கோரிக்கை விடுத்துள்ளார்.
வரலாற்று முக்கியத்துவம் வாய்ந்த வழக்கு
இலங்கை நாடாளுமன்ற வரலாற்றில், பதவியில் உள்ள ஒரு சபாநாயகருக்கு எதிராக, நாடாளுமன்றின் இரண்டாவது சிரேஷ்ட அதிகாரியான பிரதிப் பொதுச்செயலாளர் ஒருவர் இவ்வாறானதொரு மனுவைத் தாக்கல் செய்திருப்பது இதுவே முதல் முறையாகும்.
மனுதாரரான சமிந்த குலரத்ன சார்பில் ஜனாதிபதி சட்டத்தரணி சஞ்சீவ ஜயவர்தன தலைமையிலான சட்டத்தரணிகள் குழாம் நீதிமன்றத்தில் முன்னிலையாகவுள்ளது. முன்னதாக, சபாநாயகருக்கு எதிராக 8 ஊழல் குற்றச்சாட்டுகளை முன்வைத்து சமிந்த குலரத்ன இலஞ்ச ஊழல் விசாரணை ஆணைக்குழுவிலும் முறைப்பாடு செய்திருந்தமை குறிப்பிடத்தக்கது.