வடக்கில் மீட்கப்பட்ட கோடிக்கணக்கான ரூபாய் பெறுமதியான தங்க நகைகள் மத்திய வங்கியின் பாதுகாப்புப் பெட்டகங்களில் வைப்பு!

• இறுதிக்கட்டப் போரின் போது வடக்கில் மீட்கப்பட்டு, இராணுவப் புலனாய்வுப் பிரிவின் வசம் இருந்த சுமார் 10,000 தங்கப் பொருட்கள் மத்திய வங்கியிடம் ஒப்படைப்பு.

• தேசிய இரத்தினக்கல் மற்றும் ஆபரண அதிகார சபையுடன் இணைந்து ஒரு வருட காலமாக முன்னெடுக்கப்பட்ட எடை மற்றும் பெறுமதி மதிப்பீட்டுப் பணிகள் நிறைவு.

• தங்கப் பொருட்கள் குறித்த விரிவான அறிக்கையை நீதிமன்றத்தில் சமர்ப்பிக்குமாறு கொழும்பு பிரதான நீதவான் சிஐடிக்கு (CID) அதிரடி உத்தரவு.

இலங்கையின் வடக்கே மனிதாபிமான நடவடிக்கைகள் (இறுதிக்கட்டப் போர்) இடம்பெற்ற பகுதிகளில் இருந்து கண்டெடுக்கப்பட்டு, இராணுவத்தின் வசம் பாதுகாப்பாக வைக்கப்பட்டிருந்த கோடிக்கணக்கான ரூபா பெறுமதியான சுமார் பத்தாயிரம் (10,000) தங்க ஆபரணப் பொருட்கள் ஸ்ரீலங்கா மத்திய வங்கியின் (CBSL) பாதுகாப்புப் பெட்டகங்களுக்கு (Safes) மாற்றப்பட்டுள்ளதாகக் குற்றப்புலனாய்வுத் திணைக்களம் (CID) கொழும்பு பிரதான நீதவான் நீதிமன்றத்திற்கு நேற்று முன்தினம் (15) அறிவித்துள்ளது.

இராணுவப் புலனாய்வுப் பணிப்பகத்தின் (Army Intelligence Directorate) வசமிருந்த பாதுகாப்புப் பெட்டகங்களில் வைக்கப்பட்டிருந்த இந்தத் தங்க ஆபரணங்கள், கடந்த ஒரு வருட காலமாகத் தேசிய இரத்தினக்கல் மற்றும் ஆபரண அதிகார சபையின் (NGJA) அதிகாரிகளுடன் இணைந்து விசேடமாகப் பரிசோதிக்கப்பட்டதாக சிஐடி அதிகாரிகள் நீதிமன்றத்தில் தெரிவித்தனர்.

அவற்றின் எடை மற்றும் உண்மையான சந்தைப் பெறுமதி என்பன துல்லியமாக அளவிடப்பட்ட பின்னரே, அவை ஸ்ரீலங்கா மத்திய வங்கியின் பொறுப்பில் ஒப்படைக்கப்பட்டதாகக் கொழும்பு பிரதான நீதவான் அசங்க போதரகம்ம முன்னிலையில் குற்றப்புலனாய்வுத் திணைக்களத்தினர் விவரித்தனர்.

விரிவான அறிக்கை கோரியது நீதிமன்றம்

மத்திய வங்கியிடம் ஒப்படைக்கப்பட்டுள்ள குறித்த தங்க ஆபரணப் பொருட்கள் தொடர்பான அனைத்து விபரங்களையும் உள்ளடக்கிய விரிவான மற்றும் சவிஸ்தாரமான அறிக்கையொன்றை நீதிமன்றத்தில் சமர்ப்பிக்குமாறு பிரதான நீதவான், குற்றப்புலனாய்வுத் திணைக்களத்திற்கு உத்தரவிட்டுள்ளார்.

முன்னதாக நீதிமன்றம் வழங்கிய உத்தரவுக்கு அமைவாகவே, இராணுவத்தின் வசமிருந்த இந்தத் தங்கத் தொகுதி முழுமையாகப் பரிசோதிக்கப்பட்டு மத்திய வங்கிக்கு அனுப்ப நடவடிக்கை எடுக்கப்பட்டதாகச் சுட்டிக்காட்டிய சிஐடி அதிகாரிகள், இராணுவப் பாதுகாப்பில் இருந்த அனைத்துத் தங்க ஆபரணங்களும் தற்போது அளவிடப்பட்டு மத்திய வங்கியிடம் முழுமையாக ஒப்படைக்கப்பட்டு விட்டதாக மேலும் உறுதிப்படுத்தினர்.

வடக்கு மற்றும் கிழக்கு மனிதாபிமான நடவடிக்கைகள் (யுத்தம்) இடம்பெற்ற காலத்தில், அப்பிரதேசங்களில் காணப்பட்ட எல்.டி.டி.ஈ (LTTE) அமைப்பின் முகாம்கள், வங்கிகள் மற்றும் வீடுகள் உள்ளிட்ட கட்டிடங்களைப் பரிசோதித்த போதே இந்தத் தங்க ஆபரணங்கள் கண்டெடுக்கப்பட்டிருந்தன.

அவை இதுவரைகாலமும் இலங்கை இராணுவத்தின் பாதுகாப்பிலேயே வைக்கப்பட்டிருந்தமை குறிப்பிடத்தக்கது.