உலகச் சந்தையில் எண்ணெய் விலைகள் அதிரடி வீழ்ச்சி!

• பிரெண்ட் மற்றும் டபிள்யூடிஐ (WTI) ஆகிய இரு பிரதான கச்சா எண்ணெய் வகைகளின் விலைகளும் 80 டொலர் எல்லைக்கும் கீழ் சரிவு.

• மர்பன் (Murban) கச்சா எண்ணெய் விலை ஒரே நாளில் 7.02 வீதத்தால் பாரிய வீழ்ச்சி.

• மத்திய கிழக்கு யுத்த சூழலுக்கு முந்தைய விலையான 68 - 70 டொலர் எல்லையை நோக்கி நகரும் உலகச் சந்தை.

உலகச் சந்தையில் கச்சா எண்ணெய் பேரல் ஒன்றின் விலை இன்று (17) 80 அமெரிக்க டொலர்கள் என்ற எல்லைக்கும் கீழ் வீழ்ச்சியடைந்துள்ளதாக சர்வதேச ஊடகங்கள் செய்தி வெளியிட்டுள்ளன.

இதற்கமைய, அமெரிக்காவின் டபிள்யூடிஐ (WTI) ரக கச்சா எண்ணெய் பேரல் ஒன்றின் விலை இன்று 76.28 அமெரிக்க டொலர்களுக்கு நெருக்கமானதொரு மதிப்பில் வர்த்தகம் செய்யப்பட்டுள்ளது.

அதேபோன்று, சர்வதேச சந்தையின் பிரதான அளவுகோலான பிரெண்ட் (Brent) ரக கச்சா எண்ணெய் பேரல் ஒன்றின் விலை 79.13 அமெரிக்க டொலர்களாகப் பதிவாகியுள்ளது.

மர்பன் எண்ணெயும் வீழ்ச்சி

இதேவேளை, இலங்கை உள்ளிட்ட நாடுகள் அதிகளவில் இறக்குமதி செய்யும் வளைகுடா பிராந்தியத்தின் மர்பன் (Murban) ரக கச்சா எண்ணெய் பேரல் ஒன்றின் விலையும் 7.02 வீதத்தால் அதிரடியாகச் சரிவடைந்து, 71.81 அமெரிக்க டொலர்கள் வரை குறைவடைந்துள்ளது.

மத்திய கிழக்கு பிராந்தியத்தில் கடுமையான யுத்த சூழல் ஆரம்பமாவதற்கு முன்னர், உலகச் சந்தையில் கச்சா எண்ணெய் பேரல் ஒன்றின் விலை 68 டொலர்கள் முதல் 70 டொலர்கள் வரையான எல்லைக்குள்ளேயே காணப்பட்டது. தற்போதைய இராஜதந்திர நகர்வுகள் மற்றும் அமைதி முயற்சிகளுக்கு மத்தியில், எண்ணெய் விலைகள் மீண்டும் பழைய நிலையை நோக்கி வேகமாக வீழ்ச்சியடைந்து வருகின்றமை குறிப்பிடத்தக்கது.