செம்மணி மனிதப் புதைகுழி அகழ்வாராய்ச்சியில் திடீர் திருப்பம்!

• இலங்கையின் இரண்டாவது பெரிய மனிதப் புதைகுழியின் 79ஆவது நாள் அகழ்வாராய்ச்சியில் மேலும் 5 மனித உடல்கள் மீட்பு.

• மீட்கப்பட்ட உடல்களுள் பச்சிளம் குழந்தைகள் மற்றும் சிறுவர்களின் உடல்களும் அடங்குவதாக சட்டத்தரணிகள் தகவல்.

• மன்னார் சத்தொச புதைகுழிக்கு அடுத்தபடியாக இலங்கையின் மிகப்பெரிய இரண்டாவது புதைகுழியாக மாறியுள்ளது செம்மணி.

இலங்கையில் தற்போது கண்டறியப்பட்டுள்ள இரண்டாவது மிகப்பெரிய மனிதப் புதைகுழியின் (Mass Grave) அகழ்வாராய்ச்சிப் பணிகள் இடம்பெற்று வரும் 79ஆவது நாளில், புதிதாகக் கண்டெடுக்கப்பட்ட 5 மனித உடல்களுடன் சேர்த்து, புதைகுழியிலிருந்து அடையாளம் காணப்பட்ட ஒட்டுமொத்த மனித உடல்களின் எண்ணிக்கை 360 ஆக உயர்வடைந்துள்ளது.

அகழ்வாராய்ச்சிப் பணிகளைக் கண்காணித்து வரும் சட்டத்தரணிகள் தெரிவிக்கையில், ஜூலை 15ஆம் திகதி தோண்டி எடுக்கப்பட்டு முன்னதாக அடையாளம் காணப்பட்ட 10 உடல்களுக்குள் சிறுவர்கள் மற்றும் பச்சிளம் குழந்தைகளின் உடல்களும் உள்ளடங்குவதாகக் குறிப்பிட்டுள்ளனர்.

செம்மணி சித்துப்பாத்தி (Chemmani Sithubathi) மனிதப் புதைகுழியின் மூன்றாம் கட்ட அகழ்வாராய்ச்சிப் பணிகளின் 25ஆவது நாளான ஜூலை 10ஆம் திகதி முடிவடைந்த போது, புதைகுழியிலிருந்து இதுவரை அடையாளம் காணப்பட்ட ஒட்டுமொத்த 360 மனித உடல்களில் 351 உடல்கள் முழுமையாகத் தோண்டி எடுக்கப்பட்டுள்ளன.

அகழ்வாராய்ச்சிப் பணிகள் குறித்த விபரங்களைச் சேகரித்து வரும் பிராந்திய ஊடகவியலாளர்கள் தெரிவிக்கையில், நேற்றைய தினத்திற்கான அகழ்வுப் பணிகள் மேலதிக நீதவான் நவுஃபர் நஜ்மி ஹுசைன் மற்றும் யாழ்ப்பாணம் நீதவான் நீதிமன்றத்தின் நேரடி மேற்பார்வையின் கீழ் முன்னெடுக்கப்பட்டதாகக் குறிப்பிட்டுள்ளனர்.

கண்டெடுக்கப்பட்ட குழந்தைகளின் விளையாட்டுப் பொருட்கள்

செம்மணி சித்துப்பாத்தி மனிதப் புதைகுழியிலிருந்து மனித எலும்புக்கூடுகளுடன் சேர்த்து, இதுவரை தோண்டி எடுக்கப்பட்ட நூற்றுக்கு நெருக்கமான ஏனைய சான்றுப் பொருட்களுள் (Artifacts / Personal belongings) பச்சிளம் குழந்தைகளுக்கான பால் போத்தல்கள், பொம்மை உள்ளிட்ட விளையாட்டுப் பொருட்கள், சிறுவர்களின் காலணிகள், பாடசாலைப் பைகள் மற்றும் சில நாணயக் குற்றிகளும் அடங்குகின்றன.

நீதிமன்ற உத்தரவுக்கு அமைய, தடயவியல் தொல்பொருள் ஆய்வாளர் பேராசிரியர் ராஜ் சோமதேவ மற்றும் யாழ்ப்பாண போதனா வைத்தியசாலையின் சட்ட மருத்துவ அதிகாரி செல்லையா பிரணவன் ஆகியோரின் வழிநடத்தலில் யாழ்ப்பாணம் செம்மணி சித்துப்பாத்தி மனிதப் புதைகுழியின் அகழ்வாராய்ச்சிப் பணிகள் முதன்முறையாக கடந்த 2025ஆம் ஆண்டு மே மாதம் 15ஆம் திகதி ஆரம்பிக்கப்பட்டிருந்தன.

இலங்கையின் புதைகுழி வரலாறுகள்

இலங்கையில் இதுவரை கண்டறியப்பட்ட ஆகப் பெரிய மனிதப் புதைகுழியாகக் கருதப்படுவது 28 சிறுவர்கள் உட்பட 376 மனித உடல்களின் எச்சங்கள் கண்டெடுக்கப்பட்ட மன்னார் சத்தொச (Mannar Sathosa) மனிதப் புதைகுழியாகும். அதற்கு அடுத்தபடியாக தற்போது செம்மணி புதைகுழி மாறியுள்ளது.

இவ்விடய தானம் குறித்த மேலதிக விபரங்களைத் திரட்டும் நோக்கில், அகழ்வாராய்ச்சிப் பணிகள் தொடர்ந்து முன்னெடுக்கப்பட்டு வருகின்றமை குறிப்பிடத்தக்கது.