நீரில் மூழ்கிக் காணாமல் போனவர்களில் மேலும் நால்வரின் சடலங்கள் இன்று (17) காலை மீட்கப்பட்டுள்ளன.
இதன்படி, இந்தத் துரதிர்ஷ்டவசமான சம்பவத்தில் உயிரிழந்தவர்களின் மொத்த எண்ணிக்கை 6ஆக உயர்வடைந்துள்ளதாக பொலிஸார் உறுதிப்படுத்தியுள்ளனர். ஏனைய இருவர் தொடர்ந்தும் வைத்தியசாலையில் சிகிச்சை பெற்று வருகின்றனர்.
நீரில் அடித்துச் செல்லப்பட்டு இன்னும் கண்டெடுக்கப்படாத ஏனைய இருவரைத் தேடி கடற்படையினர் மற்றும் பொலிஸார் இணைந்து விசேட தேடுதல் நடவடிக்கைகளை முன்னெடுத்து வருகின்றனர்.
கடவத்தை (Kadawatha) பகுதியிலிருந்து கொபெய்கனே (Kobeigane) பகுதியில் உள்ள உறவினர் ஒருவரின் வீட்டுக்குச் சென்ற 7 பேர், அங்கிருந்த ஏனையவர்களுடன் இணைந்து மொத்தம் 15 பேராகத் தெதுருஓயா ஆற்றில் நீராடச் சென்றுள்ளனர்.
இதன்போதே இந்த அனர்த்தம் இடம்பெற்றுள்ளதாக நிக்கவரட்டிய பொலிஸார் தெரிவித்துள்ளனர்.
சித்திரைப் புத்தாண்டு விடுமுறைக் காலத்தில் இடம்பெற்றுள்ள இந்தச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
நேற்று (16) பிற்பகல் இடம்பெற்ற இந்த அனர்த்தத்தின் போது, நீரில் மூழ்கியவர்களில் இருவர் மீட்கப்பட்டு வைத்தியசாலையில் அனுமதிக்கப்பட்டுள்ளனர்.
நீரில் அடித்துச் செல்லப்பட்ட நிலையில் மேலும் 6 பேரைக் காணவில்லை எனவும், அவர்களைத் தேடும் பணிகள் தீவிரமாக முன்னெடுக்கப்பட்டு வருவதாகவும் பொலிஸார் நேற்று அறிவித்திருந்த நிலையிலேயே, சடலங்கள் மீட்கப்பட்டுள்ளன.
கடவத்தை (Kadawatha) பகுதியைச் சேர்ந்த 7 பேர் கொபெய்கனே பகுதியில் உள்ள உறவினர் வீடொன்றுக்குச் சென்றுள்ளனர்.
அங்கிருந்து உறவினர்கள் உட்பட 15 பேர் கொண்ட குழுவினர் குரட்டியாகஹமுல்ல (Kuratiyagahamulla) எனும் இடத்தில் தெதுரு ஓயாவில் நீராடச் சென்றபோதே இந்தத் துரதிர்ஷ்டவசமான சம்பவம் இடம்பெற்றுள்ளது.
மேலதிக விசாரணைகளை கொபெய்கனே பொலிஸார் மேற்கொண்டு வருகின்றனர்.
கடந்த 5 நாட்களில் 20 பேர் நீரில் மூழ்கிப் பலி
கடந்த ஏப்ரல் 12 ஆம் திகதி முதல் இதுவரையான காலப்பகுதியில் 20 பேர் நீரில் மூழ்கி மிகவும் துரதிர்ஷ்டவசமான முறையில் உயிரிழந்துள்ளதாக பொலிஸ் ஊடகப் பேச்சாளர் உதவி பொலிஸ் அத்தியட்சகர் எஃப்.யு. வுட்லர் (F.U. Woodler) தெரிவித்துள்ளார்.
இன்று (16) ஊடகங்களுக்குக் கருத்துத் தெரிவித்த அவர், நீச்சல் தெரியாதவர்கள் பாதுகாப்பற்ற இடங்களில் நீராடச் சென்றமையே இந்த உயிரிழப்புகளுக்குப் பிரதான காரணம் எனச் சுட்டிக்காட்டினார்.
அத்துடன், பெரியவர்கள் மற்றும் பெற்றோர்கள் தமது பொறுப்புக்களைச் சரியாக நிறைவேற்றத் தவறியுள்ளதாகவும் அவர் குற்றம் சுமத்தியுள்ளார்.
பொலிஸ் ஊடகப் பேச்சாளரின் அறிக்கை:
"கடந்த ஏப்ரல் 12 ஆம் திகதி முதல் இன்று வரை 20 பிரஜைகள் நீரில் மூழ்கிப் பலியாகியுள்ளதை மிகவும் கவலையுடன் தெரிவித்துக்கொள்கிறேன். குறிப்பாகப் பெற்றோர்கள் தமது கடமைகளைத் தட்டிக்கழித்துள்ளனர். நீச்சல் தெரியாத நிலையில், மதுபோதையில் அல்லது போதைப்பொருள் பயன்படுத்தியவாறு ஆளில்லாத பாதுகாப்பற்ற இடங்களை நீராடுவதற்காகத் தெரிவு செய்துள்ளமை விசாரணைகளில் தெரியவந்துள்ளது."
பொதுமக்களுக்கான அறிவுறுத்தல்: நாளை முதல் சுற்றுலாப் பயணங்களை மேற்கொள்ளத் திட்டமிட்டுள்ளவர்கள் மிகவும் பொறுப்புடன் செயற்பட வேண்டும் எனப் பொலிஸார் மீண்டும் வலியுறுத்தியுள்ளனர்.
-
அங்கீகரிக்கப்பட்ட இடங்கள்: நீராடுவதற்காக ஒதுக்கப்பட்ட மற்றும் உயிர்காப்புப் பிரிவினர் (Life Guards) கடமையில் ஈடுபட்டுள்ள இடங்களை மாத்திரம் தெரிவு செய்யுமாறு அறிவுறுத்தப்பட்டுள்ளது.
-
எச்சரிக்கைப் பலகைகள்: நீர் நிலைகளுக்கு அருகில் காட்சிப்படுத்தப்பட்டுள்ள எச்சரிக்கைப் பலகைகளை உதாசீனம் செய்ய வேண்டாம் எனக் கோரப்பட்டுள்ளது.
நாட்டின் இளைய தலைமுறையினர் மற்றும் உழைக்கும் வர்க்கத்தினர் இவ்வாறு அகால மரணமடைவது தேசத்திற்குப் பாரிய இழப்பாகும் என உதவி பொලිஸ் அத்தியட்சகர் வுட்லர் மேலும் தெரிவித்தார்.