மிகுந்த அவதானத்துடன் இருக்குமாறு பரீட்சைகள் ஆணையாளர் நாயகம் ஏ.கே.எஸ். இந்திகா குமாரி லியனகே விசேட அறிவித்தல் விடுத்துள்ளார்.
நாளை (17) ஆரம்பமாகவுள்ள சாதாரண தரப் பரீட்சை தொடர்பில் ஊடகங்களுக்கு கருத்துத் தெரிவிக்கும் போதே அவர் இதனைத் தெரிவித்தார். இது தொடர்பாக அவர் மேலும் குறிப்பிட்டதாவது:
உத்தியோகபூர்வ நேரசூசியைப் பின்பற்றுங்கள்
பரீட்சைத் திணைக்களத்தின் உத்தியோகபூர்வ இணையத்தளம் மற்றும் உத்தியோகபூர்வ முகநூல் பக்கத்தில் வெளியிடப்பட்டுள்ள நேரசூசியை மட்டுமே பரீட்சார்த்திகள் பின்பற்ற வேண்டும். கடந்த வருடங்களுடன் ஒப்பிடுகையில், இம்முறை பரீட்சையின் 5, 6, 7 மற்றும் 8ஆம் நாட்களில் பாடவரிசை மாற்றியமைக்கப்பட்டுள்ளதால், தவறான நேரசூசிகளைப் பயன்படுத்த வேண்டாம் என அவர் வலியுறுத்தினார்.
பரீட்சை நிலையங்களுக்குச் செல்லும் நேரம்
நாளை காலை 8.30 மணிக்கு பரீட்சைகள் ஆரம்பமாகவுள்ளன. காலை அமர்வுக்காகத் தோற்றும் பரீட்சார்த்திகள் ஒரு மணித்தியாலத்திற்கு முன்னரே (காலை 7.30 மணி) பரீட்சை நிலையங்களுக்குச் செல்ல வேண்டும். அதேபோல், பிற்பகல் 1.30 மணிக்கு ஆரம்பமாகும் பரீட்சைகளுக்காகப் பரீட்சார்த்திகள் நண்பகல் 12.30 மணிக்கே நிலையங்களுக்குச் சமுகமளிக்க வேண்டும்.
தடைசெய்யப்பட்ட பொருட்கள் மற்றும் அடையாள உறுதிப்படுத்தல்
பரீட்சை மண்டபத்திற்குள் கைத்தொலைபேசிகள் (Mobile Phones), புளூடூத் (Bluetooth) கருவிகள், ஸ்மார்ட் கடிகாரங்கள் (Smart Watches), மேலதிக குறிப்புக்கள் அல்லது ஆவணங்களை எடுத்துச் செல்வது முற்றாகத் தடை செய்யப்பட்டுள்ளது.
அனைத்துப் பரீட்சார்த்திகளும் பரீட்சை முடியும் வரை தமது அடையாள அட்டையை வைத்திருக்க வேண்டும். பாடசாலைப் பரீட்சார்த்திகள் தேசிய அடையாள அட்டை, வாகன சாரதி அனுமதிப்பத்திரம் அல்லது வெளிநாட்டு கடவுச்சீட்டு (Passport) ஆகியவற்றைப் பயன்படுத்தலாம்.
தனியார் பரீட்சார்த்திகள் தேவையேற்படின் கிராம உத்தியோகத்தரினால் அத்தாட்சிப்படுத்தப்பட்ட புகைப்படத்துடனான தற்காலிக அடையாள அட்டையைப் பயன்படுத்த முடியும் எனவும் ஆணையாளர் நாயகம் தெரிவித்தார்.
வினாத்தாள் மற்றும் விடைத்தாள் தொடர்பான அறிவுறுத்தல்கள்
விடையளிக்கத் தொடங்குவதற்கு முன்னர் வினாத்தாளில் உள்ள அறிவுறுத்தல்களைத் தெளிவாக வாசிக்க வேண்டும்.
தமக்குத் தேவையான அனைத்துப் பகுதிகளும் வினாத்தாளில் உள்ளனவா என்பதை உறுதிப்படுத்திக் கொள்ள வேண்டும்.
நேர முகாமைத்துவம் பேணுவதுடன், பரீட்சை இலக்கத்தை (Index Number) சரியாகக் குறிப்பிட வேண்டும்.
கையெழுத்துத் தெளிவாக இருக்க வேண்டும். எந்தவொரு சந்தர்ப்பத்திலும் அழிப்பான்களை (Tippex) பயன்படுத்தக் கூடாது. தவறு ஏற்படின் அதனை ஒரு கோட்டினால் வெட்டிவிட்டு மீண்டும் எழுத வேண்டும்.
ஒழுக்க விதிகள்
பரீட்சை நிலையங்களில் முகத்தை தெளிவாக அடையாளம் காணக்கூடிய வகையில் பரீட்சார்த்திகள் வருகை தர வேண்டும். ஏனைய பரீட்சார்த்திகளுக்கு இடையூறு விளைவிக்கும் வகையில் எவரும் செயற்படக் கூடாது. அவ்வாறு ஒழுக்கமற்ற முறையில் நடந்துகொண்டால் பரீட்சைப் பெறுபேறுகள் இடைநிறுத்தப்படக் கூடும் என எச்சரிக்கப்பட்டுள்ளது.
இடைவேளை நேரங்களிலும் ஏனையவர்களுக்கு அசௌகரியம் ஏற்படாதவாறு நடந்துகொள்ளுமாறு பரීட்சைகள் ஆணையாளர் நாயகம் கேட்டுக்கொண்டுள்ளார்.